IX. De quitances [rubr.]

Modestins dit : quitance est delivrance par coi li uns et l’autres de cez qui sont obligié ensenble est assos de tot l’obligement.

Ulpians dit : il nos plest que orfelins puisse estre delivrez par quitance sanz l’autorité à son deffendeor.

Paulus dit : nus ne puet quiter ne estre quitez par procurator sanz commandemant.

Ponponius dit : quitance ne puet estre fete soz ‹condicion›.

Ulpians dit : quitance qui est fete à terme n’est de nule valeur ; car quitance selt delivrer autresi comme paiemenz.

Cil moismes dit : quitance puet estre fete se li uns demande issi : « me quites tu de ceste convenance ? », et li autres respont : « oïl ».

Cil moismes dit : l’en demande se cil a point de force de con[167vB]venant en quitance qui rien ne vaut ? Et sanz dote se il n’i a consentement, il n’i a point de force de convenant. Aucuns demande donc se il puet estre que il n’i ait consentement ? Et je ne voi pas por quoi il ne puisse estre ; car se cil qui fesoit la quitance savoit bien que ele ne valoit rien, tuit sievet que il n’i a point de force de convenant desque il ne se consenti au convenant fere. ¶ {1} Autressi comme li sers communs puet aquerre convenance à un de ses seigneurs, li puet il aquerre quitance et delivrer del tot ; et Octavenus le cuide eissi. {2} Li sers communs puet aquerre quitance à un de ses seigneurs malgré à l’autre ; et issi plet il à Labeo. Aprés escrit Labeo que se li sers qui a deus seignors a tant fet que li uns a promis une chose à l’autre, il priet l’autre que il le quit, et il le puet delivrer par quitance autresi comme il l’avoit obligié. Et issi sera li obligemenz aquis et ostez par un meisme serf. ¶ {3} L’en ne puet quiter par paroles fors obligemant qui est fez par paroles, car ce qui n’est pas fet par paroles ne puet pas estre depeciez par paroles. ¶ {4} Se li filz qui est en baill promet aucunne chose, il n’oblige pas son pere mes soi meismes ; et por ce puet li filz demander delivrance por quiter soi, car il est obligiez. Et se li peres demande quitance, il ne fet rien, car il n’est pas obligiez mes ses filz. Ce moisme doit l’en dire do serf, car il puet estre delivrez par quitance. Et li obligemanz de coi li sires estoit obligiez par lui sont osté ; et nos usons de cest droit, quar quitance soit do droit as genz. Et por ce croi ge que quitance puet estre fete en grec, por coi por qui ele soit fete en autretel forme comme ele estoit fete en latin.

Paulus dit : quitance puet estre fete d’une partie de ce qui a convenencié, non pas tant solement se l’en dit eissi : « quites me tu les .v. des .x. deners que je te promis ? », mes se l’en dit eissi : « quites me tu la moitié de ce que je te promis ? », et li autres respont : « oïl ».

Ponponius dit : mes se denier n’ont pas esté mis en la convenance, mes uns certains cors, si comme un serf, quitance ne puet estre fete d’une partie. ¶ Quitance puet estre fet à un des oirs.

Paulus dit : une maniere d’aquerre est delivrer son seignor d’obligemant ; et por ce, se li sers de coi avo‹n›s a l’usaire [168rA] puet delivrer celui qui en a l’usaire por porchacier la quittance, car il senble que il aquiert de ses choses meisme. Autresi dirons nos do serf en coi nos n’avons que l’usage set en celui qui nos sert en bone foi et as autres qui sont sozmis à nostre droiture. Et se je quit à un serf ce que je li promis, je n’avrai nule auction contre son seignor, ne de son chetel ne de ce qui est mis en son preu. ¶ {2} Se li sers d’un heritage demande ainz que l’eritages soit receuz quitance de ce que li morz me promist, et je li octroi, je croi que li heritages est delivrés par ce. {3} Et se ses sires estoit en chetivoison, l’en doit dire que la quitance sera confermee quant il sera revenuz ; car sers puet bien fere convenance el non à son seignor qui est en chetivoison.

Ponponius dit : ce qui est deu à terme ou soz condicion puet estre osté par quitance se la condicion avient ou li termes vient.

Ulpians dit : la convenance de servises qui a esté fete par le seremant à celui qui a esté franchiz puet estre ostee par quitance. ¶ {1} Se ce qui a esté convenencié ne puet estre parti, la quitance qui est fete d’une partie n’est de nule valeur, si comme se il a esté mis en convenant que uns chans doie servise. ¶ Se usaires est mis en convenance, si comme li usaires d’un champ, quitance en puet estre fete d’une partie si que cil qui l’avoit de tot le champ ne l’ait que d’une partie. ¶ Se voie est promise à aucun parmi un champ et il cuide que il n’i ait mie voie ne charriere, ceste quitance n’est de nule valeur. Autresi doit l’en dire se la charriere est quitee, mes se li santier et les charrieres sunt quités, l’en doit dire que cil qui promist la voie est delivrés. ¶ {2} Il est aperte chose et certaine que se cil à qui uns chans a esté promis en quite l’usaire ou la voie, la quitance ne vaut rien ; car cil qui quite doit quiter ce qui li a esté promis ou tot ou en partie. Mes cez choses ne sont par parties del champ, ne plus que se une meson a esté promise à aucun et il en quite les pierres ou les fenestres ou les chevrons. ¶ {3} Se usaires a esté promis à aucun, et il en quite l’usage, si li usages puet estre establiz sanz le fruit, la quitance vaut. ¶ {4} Se cil à qui uns sers a esté promis quite Stic, Julians dit que la quitance vaut, et que ele oste tot l’obligemant. Se cil qui a promis puet paier une chose à celui à qui il a promis, et cil ne puet refuser que il ne [168rB] la preigne se il la quite, il donne delivrance. ¶ {5} Il est certaine chose que cil à qui uns chans a esté promis ne puet pas quiter la cause de tricherie qui fu mise en la convenance ; car ce n’est pas partie de la dete, ainz est autre chose que ce qui est deu. ¶ {6} Se cil à qui l’en promist un serf ou .x. solz soz condicion quite le serf, et li sers muert ainz que la condicion aviegne, li .x. solz remaindront en l’obligemant, autresi comme se la quitance n’eust onques esté fete. ¶ {7} Se quitance est fete ou plege quant li deteurs est obligiez par chose et ne mie par paroles, l’en demande se li deteurs est delivrés. Et nos usons de cest droit ; que ja sé ce que li deteurs n’est pas obligiez à paroles, neporquant il soit delivrés par la quitance qui est fete au plege. ¶ {8} Se quitance est fete au ploige de lés qui sont lessiez soz condicion, li lés seront aprés deu se la condicion avient. ¶ {9} Se pleige fut pris en ceste maniere : « tu es ploing de quancque je pretoi à Tyce », et li creanciers li quite la plevine ainz que il prest rien à Tyce, Tyces n’est pas obligiez ; mes quanque la prant, sera obligiez à lui ; car se nos disons que li pleges ne puet estre delivrez devant que une chose fu prestee au deteur por ce que il n’estoit obligiez à rien, neporquant li deteurs ne puet pas estre delivrez par quitance qui fu fete ainz que il fust obligiez. ¶ {10} Li deffenderres à l’orfelin et li procureors au forsené ne puent pas quiter lor detes, ne procurators ne puet fere quitance, mes tuit cil qui puent renoveler obligement. Et en tele maniere puet il quiter, et autresi ne luer puet l’en fere quitance, mes il puet estre delivré par renoveler obligement, que nos solons user de cest remede au la persone à cex qui ne sont pas presant ; car nos feson por renoveler l’obligemant que uns autres nos promet à rendre ce que cil nos doit qui n’est pas presanz, et issi le quiton nos. Et cil qui est hors do païs est issi presanz par le renovelement et est delivrez par quitance. ¶ {11} Tuit oir puent quiter et estre quité. {12} Se une meisme chose à esté promise à plusors ensenble et li uns la quite, cil qui la promist est toz delivrés.

Paulus dit : se la quitance ne s’acorde [168vA] à l’obligemant, et se ce n’est voirs qui est dit à fere la quittance, ele n’est pas perfete ; car il convient que les paroles s’acordent ensenble.

Ponponius dit : se cil qui promist Stic demande issi : « je te promis Stic, me quites tu Stic et Panfile ? », et cil respont : « oïl » ; je croi que la quitance vaut, et mancion est por noiant fete por Panfile. Autresi comme cil qui promist .x. solz demande issi : « je te promis .x. solz, me quites tu .xx. solz ? », et cil respont : « oïl », il sera delivréz de .x. solz.

Ulpians dit : se plusor sont obligié à une moisme chose et quitance est fete à l’un, il seus n’est pas delivrez, mes tuit cil qui estoient obligié à lui ; ce n’est pas par la reson de la quitance, mes por ce que il senble que il aist paié. ¶ {1} Se plege est pris de la chose juigie et quitance li est fete, cil qui fut condempnez est delivrés.

Julians dit : se cil à qui .x. solz ou uns sers furent promis quite les .v. solz, il oste une partie de la convenance et puet demander les autres .v. solz, ou la moitié do serf.

Florentins dit : quitance et delivrance puet estre fete d’un marchié ou de plusors qui sont certain ou qui ne sont pas certain et de totes causes. {1} Gaius Aquillius mostre issi la convenance de quoi quitance doit estre fete : ¶ « tu me promz quant que il convient que tu me faces ou donges par aucunne cause, ou orendroit ou à terme, de quoi je puis avoir aucion contre toi et que je te puis demander, et quant que tu as do mien et que tu en porsiz, et tant comme ces choses valent », et cil doivent respondre : « je le te promet ». Et la quitance doit estre fete en cest maniere : « quites me tu tos les choses que je t’oi promises ? », et cil doit respondre : « je les te quist ».

Julians dit : se quitance est fete à celui qui est obligiez par chose et ne mie par paroles, il ne sera pas delivrés, mes il se porra deffendre par excepcion de tricherie ou de convenant. ¶ {1} Il a tel difference entre quitance et letres de poiemant : que cil à qui quitance est fete est delivrés, ja sé ce que il n’ait pas paié les deners, mes cil qui a letres de poiement n’est pas delivres se il n’a poié les deners.

Cil moismes dit : se la cause de chose juigee est quitee, tote la convenance faut, si comme Marciaus dit, car ele i est mise que la [168vB] chose puisse estre juigee.

Renulcius dit : se uns m’a esté lessiez soz condicion, et je faz convenance por cause de renoveler obligemant que il me soit donnz, et je le quit enprés ce, avant ce que la condicion avigne, Nerva dit que se la condicion avient, aucion ne m’apartient pas ; par le testamant, por ce que li obligemanz est renovelz ; par la convenance, por ce que quitance en a esté fete.

Gaius dit : sers ne puet pas fere quitance neïs par le commandemant son seignor.

Labeo dit : se je t’ai quité, por ce ne sui je pas quités à toi. Et Paulus dit : mes por ce que loages et achaz et vantes sont fez par assentemant, ja soit ce que nule chose n’est encore baillie, l’une et l’autre partie puet estre quitee de tot obligemant. Ja soit ce que l’une sole partie face la quitance.