École des chartes » ELEC » LI DIX-NEUVIESMES LIVRES » I. Comment l'en doit apeler home de larrecin.
[p. 287]

I. Comment l'en doit apeler home de larrecin.

§ 1.

Uns hons dit que un autre li a enblé un cheval, et l'en a veu sési, qui bien valoit cent sols, et l'anmena ; et s'il viaut dire que ce ne soit voirs, il est prez de mostrer et de l'avérer que ce est voirs, si comme la cort agardera que il fere le doie. A ce l'on li respont : comme il ne die pas qu'il sache ce de voir ne de savoir, l'en ne li viaut respondre à tel demende, se droit n'est. Et droiz dit qu'il i doit respondre, com, se la chose fust prise apertement, ce ne fut pas larrecin, mès manière de larrecin, ansint comme ravissement.

§ 2.

Autre qui apèle autre de larrecin, n'i doit pas metre le voir ne le savoir. Car qui apèle autre de larrecin, assez i mest que de son cors. Et quiconques apèlera autre de larrecin, et dira de quoi, et est sa persone nécessere : ou cil conoistra le larrecin, ou il s'en deffendra vers l'autre par gage de bataille.

§ 3.

Uns si apela un autre, et dist que il estoit lierres, et estoit prez de mostrer, s'il le voloit nier. Cil fist encontre tel ni comme il dut. Et l'an dit que an tel chose n'a point de gage, comme l'en n'i voie pas chose de quoi.