École des chartes » ELEC » LI DIX-NEUVIESMES LIVRES » XXXVI. De traire avoié, et de garanz.

XXXVI. De traire avoié, et de garanz.

§ 1.

Un home dit issit : Par moi et par garanz, vez-le-ci ; et s'il ne dit issit : Et se jor n'i a de cestui, par autre qui fere le porra et devra  ; et il trée son garant, et il li soit refusez, porra-il recovrer à amener garanz ? L'en dit que oïl. Et toz jorz die cest most, toz jorz porra recouvoir à amener garanz, jà tant ne li en refusera l'en.

§ 2.

L'en doit avoir garanz tantost comme l'en l'offre. Mès d'Orliens, non, par la chartre le Roi, qui dit que, se aucuns n'a son garant au premer jor qu'il li sera nomez, por ce ne perde pas sa cause.

§ 3.

En cause don home doit estre dampnez, li moz ne vaut riens : « si jor n'i a de cestui, » ne ne doit avoir jor dou traire, ançois l'en doit traire tantost et sanz jor. Et s'il est refusez par droite cause, il pert sa querele.

§ 4.

L'en ne puet bataille tenir ou tens que l'en ne fet noces (et cist tens est apelez les lois), se n'est de murtre, de rat, de larrecin, de traïsson, d'omecide ; et de toz ces cinq cas puet l'en tenir bataille en toz tens.