École des chartes » ELEC » LI DIX-NEUVIESMES LIVRES » XXIX. Dedanz quel tens l'en doit respondre de forfet où a péril de cors.

XXIX. Dedanz quel tens l'en doit respondre de forfet où a péril de cors.

§ 1.

Uns hom se plaint et dit issint : Gaubert féri mon cosin dou costel parmi le cors, dont il prist mort ; et s'il viaut dire que ce ne soit voirs si comme je di, je sui prez de mostrer et de l'avérer, si comme je devrai, comme cil qui le sot de voir et de savoir. Gaubert demende en quel tens ce fet fu fet. Et il dit qu'il a deus anz et plus. Et Gaubert respont : Comme il soit teuz tant longuement de ceste demende qu'il me fet, et demender puet, plus apert qu'il soit copables de la mort celui que autres ; par quoi je ne li en voil respondre, se droiz n'est.

L'en demende qu'en dit droiz ? Et l'en dit que l'en ne l'en respondra pas, quant li anz et li jors est passez et l'en ne li a demendé riens. Enprès tel tens, l'en ne li doit pas respondre ; quar il apert qu'il se consente plus au fet qui fu fez que cil à qui l'en demende.

Enten que se aucuns demende à autre de murtre, de rat, de larrecin, de traïson, d'omecide, de membre tolu, et li anz et li jorz passe avant qu'il face sa demende, l'en ne doit pas estre oïz. Mès dedanz l'an et dedanz le jor, l'en li en doit respondre.