École des chartes » ELEC » LI DIX-NEUVIESMES LIVRES » VIII. Comment l'en doit apeler home de rat
[p. 291]

VIII. Comment l'en doit apeler home de rat

§ 1.

Comment l'en doit apeler home de rat. — Marie dit issi devant le juige : Je me plain de G..., qui vint à moi en une meson où je estoie, et just à force à moi charnelment, et fist tel force que sis poers venqui le mien, à tel jor. Et s'il viaut dire que ne m'oit ce fet, et à force, je sui prez do mostrer et de l'avérer comme je doi. Et cil fet encontre tel ni et tel deffansse comme il doit. Et droiz dit qu'il est loisanz de prendre la prove à la feme, et dire que c'est voirs, ou d'escondire par gage de bataille. Cil l'esconduit, si comme juigement le aporte, comme home qui a essoine.

Or dit l'en que la feme se puet changier, et mestre avoié por soi : car costume est que fame ne se doit pas conbatre. Et cil se puet changier, s'il mostre essoine parant.

Antant que nus ne puet apeler autre de rat, se n'est li cors de la feme à qui le mesfet aura esté fet. Et qu'il (ne) mostre s'essoine an leu ou en tens, il ne se puet changier, tot l'ait-il.

§ 2.

Qui apèle de rat doit metre en sa demende le leu et le tens, ou il n'i a pas gage.

§ 3.

Cil qui apèle de mahing, si doit metre le jor et le leu que il fut fez.