École des chartes » ELEC » LI DIX-NEUVIESMES LIVRES » XXV. De demende qui est fete devant la mort à la feme, et enprès.
[p. 301]

XXV. De demende qui est fete devant la mort à la feme, et enprès.

§ 1.

Uns hons si a feme ; et au vivant cele feme, si li demende l'en cent sols, et dit l'en de quoi, et que termes est passez ; et li hons le nie. Ou demènement dou plet, sa feme se mort. Enprès la mort sa feme, il quenoist cele dete. Or demende l'en se les choses sa feme i sont tenues, ou si héritier, par la reson des choses ? Et l'en dit que oïl, s'il ne provent le contraire. Mès il jurra seur sainz, de sa main nue, as héritiers, que il ne le fet pas por malice, ne il ne le fet por soi légier, ne por apeticier lor droit.

Et se li plez n'est pas commoinciez, enprès la mort à l'un, demande l'en cele chose, et soit queneu et prové qu'ele soit deue : les choses au mort i sont-eles tenues ? Oïl, s'el fu fete en son tens ; ou se ce non, non.

En aura l'en serement de celui qui remaint ? Nenil, se la chose est [p. 302] provée, selonc la forme de droit. Et se est queneu sanz recevoir prove, l'en aura le serement, ausint comme en la cause devant dite. Et se li héritiers est non aagé ou desvé, en recevra les proves. Ne deffant jusque il soit d'aage ou jusque il soit revenuz en son seu ? L'en dit que oïl, mès l'en li baillera tutor ou curator.

§ 2.

Enprès l'en dit, quant li hons muert, ou la feme, et il ont fet dete en lor mariage, cil qui se font heirs chescuns est tenuz par la dete, chascuns por la moitié ; et s'il n'i a nul hoirs, les choses au mort i sont tenues.

§ 3.

Or véons se aucuns se muert, et il n'a pas de quoi il puisse paier sa part de la dete, se cil qui remaint est tenuz à la sodre ? L'en dit que oïl ; por ce que la dete fut fete commune, chascun i est tenuz por le tot. Et se li uns ne li autres n'a nule chose, cil qui remaint vis est toz jorz tenuz, ne ne puet riens aquerre ne gaagnier, que lui et ses choses ne soient tenuz.

§ 4.

Et se la feme que je prendrai doit, et n'a riens, et je aie assez, sui-je tenuz à sa dete, ou ele en ceste forme ? Oïl, car je la praing atot son fès. et ele moi atot le mien.

§ 5.

Et se li enfes qui est del premier mariage, a ses biens aconpaigniez aveques les noz, sera-il tenuz de la dete ausi comme nos de nos ? Oïl, tant com li moble porront soffire ; et l'éritage non, se l'en ne voit que la chose qui a esté enpruntée soit mise el profit de son héritage ; car l'en doit toz jorz aidier as menors.