École des chartes » ELEC » LI DIX-NEUVIESMES LIVRES » XLVIII. Se home ou beste a quatre piez fet domage.
[p. 321]

XLVIII. Se home ou beste a quatre piez fet domage.

§ 1.

Se home ou beste à quatre piez fet domage, premièrement l'en doit savoir la manière comment l'en fet domage ; se l'en le fet à esciant, ou sanz esciant.

§ 2.

Uns fet sa meson lez la moie, et fet un célier, et ne me semont pas que j'apoie ma meson, et par le croiz, ma meson font : amendera-il ma meson  ? Et l'en dit qu'il a devision en tel chose ; car se il fist sa meson si comme il la dut fere, et li autres le sot, et il ne vost apoier sa meson  : s'il i ot domage, siens set, et se issit foloie, que sis voisins riens n'en sot, et fist ce celéement : il est aparissant qu'il vost le domage, et il est tenuz, quant il garder l'an pot por fere li savoir.

§ 3.

Et se il a sa pile en sa meson à batre tan, et mis vins en torne, et mis murs en dépièce, et mes autres choses en périssent : amendera-le m'il ? Se ta chose qui ne puet estre remuée en périst, comme meson et adefice, il amendera. Et la chose qui puet estre remuée, comme vin et blé, et oille, en tel chose il n'est pas tenuz.

§ 4.

Et s'il prant mon vin à mener, et mis vins s'en vet, amendera-le-il ? Se la cherrete versse, ou se li fonz do tonel s'envole par trop aler d'aïr, il le m'amendera ; mès s'il vet si comme prodome doit alier, et fet ce que prodome doit fere, il n'i est mie tenuz.

§ 5.

Et se aucuns se fet mestres d'afetier ma chose, et no (sache  ?) sa chose fere, et je i aie domage, il m'amendera le domage que je i auré.

§ 6.

Et se aucuns me fet domage non à esciant, il le m'amendera en la forme davant dite ; car tel chose pas por oster acheson que l'en ne face domage.

§ 7.

Et se tu fés une fosse en ta place, qui n'est pas close, et ma beste i chiée, i es-tu tenuz ? Et l'en respont : Se la place est huée à aler, tu i es tenuz ; et se non, non ; jà soit ce que l'en demende que l'en doit clorre tel chose.

§ 8.

Et se ma cherrete est à une part de la voie, et tu la brises à ta [p. 322] cherrete, cil i est tenuz, se il le puet achever (esquiver) ; car tot ai-ge enpétrée la voie, tu n'en dois pas prendre vengance.

§ 9.

Et se mis chevaus vet la voie, et je sui desus, et nos aillem si com l'en doit aler, et li chevaus tut ou mehaingt un home, i sui-je tenuz ? non, mès li chevaus ; mès se tu aloies désordenéement, et an ce fust fet, tu seroies tenuz ; car il seroit aparissant qu'il seroit fet par ton ostrage.

§ 10.

Et se ton cheval ou ta beste, ton buef, ta vaiche, tes truies, me font domage, i es-tu tenuz ? Nenil, s'a ne l'a fet par ma négligence ou par mauvèse garde ; mès la beste i est tenue ; car l'en doit bien garder tex bestes, qui sont truies, et metre i grant diligence.

§ 11.

A totes les foiz que beste en quatre piez fet dommage, ou oissel privé, an issant hors, de ce, qu'an doit fere sanz la cope son seignor ? La beste ou li oisiaus privez i sont tenuz ; et se la colpe au seignor passe le quas, li sires i est tenuz.

§ 12.

Et se ge me plaing de mon domage, et il me soit niez, et veue en soit, et je l'ofre à prover par moi et par garanz, en seré-je oïz ? Et l'en dit que oïl, en tex choses jà, et en tex, non : non à forfez que ne sont pas movables, comme adefices, et quant l'en fet rafos par quoi ele chiée  ; et en tel chose n'a que la prove à l'oil ; an autres choses, comme à prandre et ravir choses, en tex choses puet avoir batailles, quant tel mot i sont mis par quoi bataille i soit.