École des chartes » ELEC » LI DIX-NEUVIESMES LIVRES » XIII. Comment l'en puet home apeler de servage.
[p. 294]

XIII. Comment l'en puet home apeler de servage.

§ 1.

De serf, et comment l'en puet home apeler de servage. — Comment cil qui sont home à aucun, à rendre serf servise, et qui les cors sont et lavoirs, sanz fere au cors désavenant. — Uns hons apèle un autre de servage, et dit aissint : Gaubert est mis sers, par la reson de son père et de sa mère, qui fut ma serve et mis sers, et m'ont rendu li serf servise ; et s'il velt dire que ce ne soit voirs, je sui près del prover et de l'avérer par moi et par home del lignage, qui le mostrera si comme il devra. Gaubert fet encontre tel ni et tel deffensse comme il doit. L'en demende qu'an dit droit ? Et droiz dit que Gaubert est loisanz de prandre la prove de lui et de son guarant, et de mostrer que c'est voirs ou d'escondire par gage de bataille. Car nus ne puet apeler home de servage, s'i ne l'apèle par son cors, ou par home del lignage. Car servage est si granz crimes, que quant hons est sers, il pert le poer de soi et de ses choses, et est donez à autrui.