École des chartes » ELEC » LI DIX-NEUVIESMES LIVRES » XXII. D'apeler home de péceure.
[p. 299]

XXII. D'apeler home de péceure.

§ 1.

Comment l'en doit apeler de dépéceure. — Péceure n'est pas, s'ele ne pert. Péceure est désirer robe, brisier uis, brisier paroiz, brisier autres choses an hostel. Et de ce puet apeler autres à gage, se li domages est si granz que gages en doie issir. Mès l'en ne puet home apeler sanz garanz, par la reson de ce que li ostés remaint à celui à qui l'en a fete la péceure.

§ 2.

Uns hons dit issi : Tex hons vint à ma meson, et brisa ma porte, et antra léanz, où je eu de domage en la péceure jusque à vingt sols. Et s'il veut dire que ce ne soit voirs, je sui prez de mostrer et de l'avérer par moi et par garanz ; et par moi qui soi ce de voir et de savoir.

Li autres requiert que la péceure, qu'il dit que l'en li a fete, soit veue. Et quant ele est veue, cil fet encontre tel ni et tel deffansse com il doit. Et droit dit, que se li domages de la péceure est tex que gages en doie nestre, qu'il i ait bataille : issit que li copables est loisanz de prandre la prove dou demendeor ou de son garant, ou de conoistre que c'est voirs, ou d'escondire par gage de bataille. Et se la querele est si petite que gages n'en doie mie nestre, ce n'est que seurmise.

§ 3.

Uns dit au prévost : Tel home m'a batu et féru, et desciré ma robe, et vez-là ci aparessant, don mes domages i gist jusqu'à dix sols. Et s'il viaut dire que ce ne soit voirs, je sui prez de mostrer et de l'avérer. Et li autres fet encontre tel ni et tel deffansse comme il doit. Et l'en dit que de tex moz nessent batailles.

§ 4.

A totes les foiz que aucun lédit autre, tot n'i ait-il sanc ne chaable, et il i ait domage de plus de cinq sols, l'en i puet gugier gage. Et an tex choses ne convient pas garanz traire, fors mostrer l'enpirement.