École des chartes » ELEC » LI DIX-NEUVIESMES LIVRES » XXXVIII. Comment l'en puet home apeler de plévine.
[p. 313]

XXXVIII. Comment l'en puet home apeler de plévine.

§ 1.

Plévine si est quant aucuns dit tex paroles : Je doi à P. vingt livres, à paier à tel jor ; si vos pri, G., que vos me plévissiez. P. dit : G., plévissiez-vos ceste home de vingt livres qu'il me doit ? Et G. dit : Oïl, s'il m'i met. — Et je vos i met. — Et ge i antre. — Et ge reçoif.

Enprès, l'en dit : quant li termes est passez, P. doit vanter (nanter) son plége et prandre dou suen. Et se l'en demande le suen à recroire, l'en le doit avoir jusqu'à ès nuiz, et as nuiz l'en doit fere valoir le gage la dete. Et celui gage il doit garder, s'il velt ; et s'il ne le rant, il le puet vendre et offrir à celui qui il est, por tant comme il en puet avoir. Et s'il ne le velt prandre, la vente est ferme.

§ 2.

Uns hons dit issi : G. est mis pléges por vingt livres de parisis que Estiennre me devoit de deus dras verz. Je li ai requis qu'il me ballast ses nanz, car termes est passez ; ne le vost fere ; si m'en plaing : car s'il viout dire que ce ne soit voirs, je sui prez de mostrer et de l'avérer par moi et par garanz, qui en fera ce qu'il devra.

Li guaranz vet avant, et tant son gage. G. fet encontre tel ni et tel deffansse comme il doit, et met ce en ni.

L'en demande qu'en dit droiz ? Et l'en respont que G. est loisanz de prendre la prove de lui et de son garant, et de quenoistre que c'est voir, ou d'escondire par gage de bataille.

§ 3.

En plévine a bataille quant a passé cinq sols ; ne l'en ne puet apeler sanz garanz.