Littera de pactione inter Stephanum Lemovicensem capellanum et Radulphum de Castris.
- A Original. Arch. de Saint-Spire, aujourd'hui Arch. dép. Essonne.
- B Bibl. de Corbeil-Essonnes, ms. 105, cartulaire du XIIIe siècle.
- a Cartulaire de Saint-Spire de Corbeil au diocèse de Paris, éd. Émile Coüard-Luys, Rambouillet, 1882.
Omnibus presentes litteras inspecturis prior Sancti Guenaili de Corbolio Parisiensis dyocesis, judex unicus a domino papa delegatus, salutem in Domino.
Noverint universi quod cum dominus Stephanus Lemovicensis, capellanus in ecclesia Sancti Exuperii Corboliensis, ad altare Sancti Clementis beneficiatus, traheret in causam coram nobis auctoritate apostolica Radulphum dictum Cacheban de Castris, laicum, et peteret ab ipso Radulpho ut ipse redimeret quamdam decimam sitam in parrochia de....., ut dicitur, quam ecclesie sancti Exuperii Corboliensis ad opus predicti altaris pignori obligaverat pro viginti libris Parisiensium prout in litteris curie Parisiensis sigillo curie sigillatis vidimus plenius contineri ; et cum idem Stephanus ab eodem Radulpho peteret novem modios bladi sibi reddi pro admodiacione dicte decime de anno nuper preterito ; et cum diu super predictis coram nobis inter partes predictas litigatum fuisset, et idem Radulphus impotenciam redimendi dictam decimam et solvendi dictum bladum allegasset, et se ad omnia predicta teneri bene recognovisset, spontaneus, non coactus, tandem de bonorum ac prudentum virorum consilio et ad preces quorumdam amicorum dicti Radulphi de predictis omnibus coram nobis in hunc modum fuit ordinatum, videlicet quod predictus Radulphus usque ad quatuor annos continuos infra dicto Stephano vel dicte ecclesie annuatim reddet centum solidos Parisiensium pro redemptione decime supradicte quousque dicte viginti libre Parisiensium integraliter persolvantur et quod dicto Stephano vel ejus mandatori reddet dimidium modium bladi laudabilis pro anno nuper preterito, et alium dimidium modium bladi pro admodiatione dicte decime de anno presenti, et dicta decima, quousque a dicto Radulpho prout superius dictum est fuerit redempta, in manu dicti Stephani remanebit, et de eadem decima quamdiu pignus duraverit faciet voluntatem suam. De predictis autem omnibus prout superius scripta sunt et divisa firmiter tenendis et inviolabiliter observandis, predictus Radulphus in manu nostra fidem prestitit corporalem, supponendo se juridictioni nostre, ubicumque esset et se transferret, quod nos possemus ipsum excommunicare auctoritate apostolica si deficeret in aliquo predictorum. Has autem pactiones et ordinationes voluit et concessit coram nobis dominus Radulphus dictus Episcopus, capellanus ad dictum altare cum predicto Stephano beneficiatus. In quorum omnium memoriam et testimonium ad peticionem utriusque partis presentes litteras sigilli nostri munimine duximus roborandas.
Actum publice .
