Littera foragii cavec Petri le Courant.

A touz ceux qui ces lettres verront Dreue Harchier, prévost de Corbueil, et Jehan de Grain, garde du seel de ladite prévosté, salut.

Sachent tuit que par devant nous vint Pierre le Courant, bourgois de Corbueil, adprésent receveur de très haute et puissent dame Madame la Royne Clémence, et affierma par devant nous que, comme il eust acheté de Jehan Lechien et de Pierre le Potier de Corbueil une pièce de terre vuide ou une masure cheoiste, si comme elle se comporte en lonc et en lé par devant et par derrière, séant à Corbueil en la Poterie tenant audit Pierre le Potier, d'une part, et au cemetière de Saint-Guenaut le Petit, d'autre part, en la censive et seignorie du chapitre de Saint Sepire de Corbueil, chargiée de vint deniers de droit cenz chascun an le jour de la Saint Remy, et il eust ja commencié à faire faire et édifier en ladite place ou masure une cave pour mettre et vendre vins, et ycil Pierre pour ce présent par devant nous cognut et confessa que il avoit accensé le forage que le dit chapitre avoit et povoit avoir en ladite cave et place, pour lui et pour ses hoirs et pour ceux qui de lui auront cause des ores en avant à touz jours mès, de honorables hommes et discrez l'abbé et le chapitre de Saint Sepire de Corbueil devant dit, c'est assavoir pour vint deniers parisis de franchise de forage que il, ses hoirs et ceus qui de lui auront cause rendront et paieront audit chapitre aveques ledit cenz des ores en avant, par chascun an perpétuelment, au jour de ladite feste Saint Remi, retenu toutevoies audit chapitre toute la justice en ladite masure et cave et touz les émolumenz d'icelle justice ; toutes les choses dessus dites ledit Pierre promist par sa foy donnée en notre [main] garder, tenir et entériner et acomplir en la manière que là dessus sont escriptes, senz nulle deffaute, audit chapitre et à leurs successeurs, et à rendre leur touz couz et touz domages que l'en auroit en aucunne des choses dessus dites par son deffaut. Et quant à ce acomplir il obliia (?) audit chapitre et à leurs successeurs ladite cave pour y assigner pour leur dit cenz et pour lesdiz vint deniers de forage.

En tesmoing de ce, nous avons mis en ces lettres le seel de la prévosté de Corbueil, l'an de grâce mil trois cens vint et cinq le jeudi après les huitieves de la Typhaine.