Littera de possessionibus pertinentibus ad Johannem Quoquatrix et specialiter de lxx libris et vi solidis redditus super archa et prepositura Corbolii.

A touz ceux qui ces présentes lettres verront et orront Jehan Loncle garde de la prévosté de Paris, salut. Savoir faisons que nous, l'an de grâce mil trois cens vint et quatre, le vendredi prochain après la Conception Notre-Dame, veismes unes lettres scellées du scel de la prévosté de Paris, contenenz de mot à mot la fourme qui s'ensuit :

A touz ceux qui ces présentes lettres verront et orront Jehan Loncle, garde de la prévosté de Paris, salut. Savoir faisons que par devant Simon de Buci et Pierre Prévost, clers, notoires jurés establiz de par notre sire le Roy ou Chastelet de Paris, ausquelx en ces choses nous avons commis et commettons du tout notre povoir, en adjoustant leur plenière foy en ce cas et en greigneur, et à ce qui s'ensuit oyr et rapporter de par nous et en notre lieu espécialement envoiez, furent personnelment establiz Jehan Quoquatrix, filz et hoir de feu Geuffroy Quoquatrix, et Jehanne fame dudit Jehan, bourgeois de Paris, affermèrent en vérité que il, seuls et pour le tout, tant du propre héritage dudit Jehan à lui venu et descendu par la mort dudit Geffroy, son père, comme de leur propre conquest fait estant le mariage de eux, avoient, tenoient et paisiblement comme leurs, seulz et pour le tout, les héritages, cens, rentes, possessions et immeubles ci-dessous divisiez, séanz au terrouer de Corbueil, es appartenances d'icelui terrouer et environ, appartenenz au manoir du Val Quoquatrix, assis delez le Viel Corbueil : — Premièrement le manoir que l'en dit le Val Quoquatrix tout si comme il se comporte ; — De rechief soissante dis livres et sis solz de rente Parisis, prises sur l'Arche de Corbueil, sur la prévosté et émolumenz d'icelle, du don le Roy, à la Toussainz et à l'Ascension. — En tesmoing desquelx choses nous, à la relacion desdiz clercs jurez qui concordamment à une voiz nous rapportèrent toutes les choses dessus dites avoir esté ainsi acordées par devant eux, avons mis en ces lettres le seel de la prévosté de Paris, qui furent faites en l'an de grâce mil trois cent vint et quatre le vendredi avant la Saint Jehan-Baptiste.

Et nous cest transcript avons seellé du seel de ladite prévosté de Paris, l'an et le jour premiers diz.