« Ludovicus, beati Maglorii Parisiensis abbas, et ejusdem loci Conventus, omnibus presentem paginam inspecturis perpetuam in Domino salutem. Noveritis quod cum inter nos, ex una parte, et religiosos viros abbatem et Conventum Majoris Monasterii et priorem de Esparnone ex altera, super decimis novalium in parrochia de Hermeroy contentorum, cujus parrochie patronatus ad eos pertinere dinoscitur, videlicet in nemore Diluvii quod ipsi asserunt infra dictam parrochiam contineri, coram venerabili viro Henrico officiali Carnotensi contencio verteretur ; tandem de bonorum virorum consilio, cum predictis abbate et Conventu Majoris Monasterii et Priore de Esparnone composuimus in hunc modum : Videlicet quod nos medietatem decimarum predicti nemoris novalium que a tempore eorum privilegii ceperunt excoli, de cetero annuatim percipiemus in quantum ipsa novalia in sua parrochia videbuntur contineri. Adjectum est eciam et concessum quod si quis nos vel ipsos super eisdem decimis in causam traxerit, vel alias aliquatenus molestare presumpserit, nos et ipsi predictas decimas in expensis communibus defendemus. In cujus rei memoriam presentes litteras scribi fecimus et sigillorum nostrorum munimine roborari. Actum anno domini, MºCCº vicesimo tercio mense octobri. »