« Universis presentes litteras inspecturis Albertus, decanus Sparnonensis, salutem in domino. Noverint quod Raginaldus, major de Vado Petroso, et Alesia uxor ejus in nostra presentia constituti, dederunt et concesserunt et etiam resignaverunt coram nobis, prioratui Sancti Thome de Sparnone et priori et monachis ejusdem loci in puram et perpetuam elemosinam, totam partem seu portionem et totum jus quod ipsi Raginaldus et Alesia habebant et habere poterant vel debebant ratione hereditatis, possessionis, dominii et proprietatis vel aliacumque ratione, in omnibus minutis decimis de Vado Petroso et in Granchia leprosorum de Sparnone que dicitur La Pifaudière et ubicumque alibi in parrochia de Hanchiis ; ab eisdem priore et monachis imperpetuum possidenda et habenda. Et fidem corporalem dederunt in manu nostra dicti Raginaldus et Alesia, de mandato et assensu et voluntate dicti Raginaldi, quod contra donacionem et concessionem predictas per se vel per alios non venient in futurum, neque in dictis minutis decimis aliquid in posterum reclamabunt nec per alios facient reclamari, immo ipsis priori et monachis dictas minutas decimas bona fide garantizabunt. In cujus rei testimonium et munimen eidem priori et monachis tradidimus presentes litteras ad petitionem dictorum Raginaldi et Alesie uxoris sue sigillo nostro sigillatas. Actum et datum anno domini millesimo CCº XLº septimo mense aprilis die veneris post Resurrectionem domini. »