Lettres de l'achat des terres qui appendent à l'Essart.

Universis presentes litteras inspecturis magister Th. de Monte canonicus et officialis Suessionensis salutem in domino. Noverint universi quod Dominus Odo de Petrafonte miles et Domina Anastasia ejus uxor, coram nobis propter hoc personaliter constituti, recognoverunt se vendidisse pari assensu et pro sua utilitate communi Ecclesie Monialium beate Marie de Morgneval quamdam peciam terre arabilis sitam versus grangiam ejusdem Ecclesie de Essartis et in territorio ipsius ut dicebant contiguam fere domui cuidam ipsius Ecclesie que vocatur Cabaret, ex parte una et Haye de Essartis, ex altera, juxta terras Ecclesie predicte, continentem unum modium terre seminalis ad mensuram Petrefontis secundum ebornationem factam supra hoc inter ipsum militem et Ecclesiam memoratam, et sic eamdem peciam terre vendiderunt eidem Ecclesie venditione legitima tenendam ab ea et possidendam in perpetuum pacifice et quiete, pretio centum et quatuor librarum parisiensium, de quibus iidem Odo et Anastasia ejus uxor recognoverunt coram nobis sibi esse ab eadem Ecclesia plenarie satisfactum, promittentes fide prestita corporali ab eisdem in manu Roberti clerici fidelis curie nostre notarii, quod contra hanc venditionem per se vel per alium non venient in futurum nec ipsam Ecclesiam supra ipsa terra per se vel per alium in posterum molestabunt nec facient molestari. Immo promisit idem Odo quod ipsi Ecclesie supra dicta terra legitimam garandiam portabunt adversus omnes juri et placito parere nolentes. Memorata autem Anastasia expresse quittavit ipsi Ecclesie imperpetuum quicquid juris habebat et habere poterat et debebat in ipsa terra ratione dotis sive donationis propter nuptias vel quocumque modo alio quocumque nomine censeatur et in manu nostra resignavit spontanea voluntate non coacta sub predicte fidei religionis promittens se nichil reclamaturam in posterum in eadem. Johannes vero primogenitus Oudardus, et Bartholomeus fratres liberi et heredes ipsius Odonis, coram nobis propter hoc constituti, dictam venditionem voluerunt, laudaverunt et approbaverunt liberaliter et benigne, et quicquid juris habebant et habere poterant et debebant in dicta terra jure hereditario vel alio quocumquemodo eidem Ecclesie spontanei imperpetuum quittaverunt, fidem interponentes corporalem quod nichil de cetero in ipsa terra per se vel per alium reclamabunt. In cujus rei testimonium et munimen presentem cartam sigillo curie Suessionensis ad petitionem dictarum partium fecimus roborari. Actum presentibus et in testimonium evocatis Roberto notario nostro predicto, Gervasio canonico Morgnevallis, Johanne de Corbeya clerico abbatisse predicte Ecclesie, et aliis. Anno domini millesimo ducentesimo quadragesimo septimo mense aprilis.