Lettres de plusieurs choses que la prevosté de Parviller tient de Céens.

Ego Maria preposita de Parviler notum facio universis tam presentibus quam futuris presentes litteras inspecturis, quod ego de dilectissimis in Christo ac religiosis mulieribus domina abbatissa et conventu Beate Marie Morgnevallis teneo in homagium et feodum sex bonaria terre in territorio quod dicitur a Essartis, duo bonaria retro leprosariam de Parviler, duo bonaria in campo retro gardinum dicte domine abbatisse et conventus Morgnevallis, furnum de Parviller, quinque bonaria et dimidium terre site inter Parviler et Daumeri1 retro managium meum de Parviler cum toto predicto managio sicut se comportat et investituras terrarum masnalium et managiorum de Parviler. Teneo etiam de dicta domina abbatissa et conventu homagia inferius annotata : homagium videlicet Oudardi de Houssoi ad servitium roncini, homagium Arnulphi de Fonches, Roberti de Fonches et Radulphi dicti Prepositi ad servitium curie et placiti. Teneo insuper hospites quos habeo in villa de Parviler in homagium et feodum supra dictum. Hec omnia et singula prenotata teneo et recognosco me tenere in homagium et feodum memoratum de dicta domina abbatissa et conventu Morgnevallis. Cui recognitioni a me facte personaliter interfuerunt ex parte earum ad hoc specialiter evocati, dominus Hugo decanus charistianitatis de Parviler, dominus Johannes presbiter de Morgneval, dominus Radulphus presbiter de Andechi, frater Petrus de Morgneval, Arnulphus de Fonches, Robertus de Fonches, Martinus de Roya, Hubertus faber de Parviler et Bartholomeus de Bolonia2. In cujus rei testimonium presentes litteras sigilli mei munimine roboravi.

Actum anno domini millesimo ducentesimo quinquagesimo secundo, mense mayo, die dominica post Ascensionem Domini.