École des chartes » ELEC » Cartulaires d'Île-de-France » Morienval » Cartulaire » Accort entre l'église de Morienval et Roger de Palasne.

A tous ceulx qui ces présentes lettres verront et orront. Roger de Palasne, chevalier, Regnaulx à ce temps presbstre curez de Montegny, Isabelle de Roissy, femme jadis Thomas du Dou Moyen, escuyer, et Regnaulx de Roissy escuyer, fils d'icelle Ysabel, salut en Notre-Seigneur. Nous faisons assavoir à tous que comme discors fut entre nous d'une part et les religieuses dames, l'abbesse et le couvent de Morgnienval de l'autre part. Sur ce que nous disions et affirmions que les devant dictes abbesse et couvent avoient chascun an à tousjours le neufvienne en la disme sainct Martin de Roissy en bled et en avainne tant seulement. Et elles disoient et affirmoient à l'encontre quelles avoient, lever, penre, avoir debvoient en la dicte disme le neufviesme pour tout. C'est assavoir en blé, en avoinne, en pois, en fesbves, en vesches, en estrains et en feures et en toutes autres choses qui pouvoient et debvoient yssir et venir pour raison de la dicte disme chascun an et à tous jours, si comme elles disoient à ceux qui la vérité n'en savoient et le savoir en devoient, nous accordames à elles et leurs recognoissances et recognoissons que ce qu'elles disoient estoit vérités et qu'elles avoient le neufviesme et avoir devoient et prendre et lever chascun an et à tous jours en la dite disme partout et en toutes choses sont autres sauf comme elles les disoient et proposoient en la magnière devant dite et ad ce nous nous sommes octroyé et octroions et ad ce tenir, nous obligeons, nous, nos hoyrs et nos successeurs à toujours et les dites abbesse et le couvent se sont accordées en la magnière que cy après enssuit. C'est assavoir que ce nous trayons ou traire faisions la dite disme à nos chevaulx, à nos charrettes, et à nos sergents nous deverons prendre et lever et avoir le redisme de tous les biens de cette disme sans contredict d'elles et elles, par ce, seront quitte de tout ce que ladite disme averoit cousté à traire fors du loyer de la granche duquel elles doibvent partir les neufviesme et partiront les dites abbesse et le couvent et partir deveront et doibvent partout au remenont si comme dessus est dict nous deverons prendre le serment des sergens que ladicte disme quenont, le veront receveront et garderont que il la partie aux demanderesses abbesse et couvent et toute la disme devant dicte leur garderont sincèrement et loyaument autre saut comme la nostre propre partie sans dommage faire à elles et pour ce que ce soit ferme chose et estalle, nous Rogert chevaliers, Regnaux presbstre, Ysabel de Roissy et Regnaux escuyers devant dicts avons baillé et octroyé aux demanderesses, abbesse et couvent ces présentes lettres scellées de nos propres sceaux. Ce fut faict en .