Acte 1

Nous Pierres fil Wyrion de la Porte, adonc priours de Rombech, Jehans dis Brido, Renals de Plommieres, Jehans de Darney, et Simon de Faucoigneys, preste et chanoinne de Rombech, faicons savoir a tous, que a la priere et a la requeste de Signour Estienne fil Vincent dit Sergent bourgois de Romarimont, nostre cochenoinne, en recompensation des mises qu'il ait faites pour les voltes de la nef de nostre eccleise, et pour seix deniers tornois, lesquels il nos ait donei sur ses acquas, que a tousjours seront pris sus les acquas qu'il ait fais, dont nos avons les lettres, et doient estre departir en nostre cimitiere par lui tant comme il viverait, et apres som deces par nostre secrestain, ou par aultre esleu par nostre chapitre, es chanoinnes prestes presens ou dit cimitiere, disans lour sept psalmes et les orisons acostumees anciennement ai dire quant nos soliens aivoir propre anniversaire. Et par ensi que ce des dis seix deniers demoroit aucun en la main des autres departours apres som decet, que il les doient par lour fois garder tant c'om les mette en aucunne chose censable, pour accrestre les devantdis seix deniers. Et comme encors nos ait requis pour Deu, que apres lou maingier dou soir diessiens De profundis pour lou remeide des aimes ai nos bienfactours. Nous pour les choses devantdictes mener a bone fin, assemblei en nostre chapitre, deliberation haue entre nos, nous sumes tuit acordei es choses devantdictes, et promittons par nos fois, et sus le vot de nostre religion, en obligent quant a ceu nous et nos successours acomplir et maintenir perpetuelment tout ceu que dessus est dit, en tous les temps que om pourrait ce faire par raison. Encores acordons que li departeres des seix deniers devantdis ait les dis seix deniers pour la poinne de recepvoir les censals et dou departir, es sepmainnes de Noel, de Pasques, et de Penthecoste, car adonc ne chante om pas por les trespaisseis, avec les chapons que sunt es lettres des acquas fais pour assevir les choses devantdictes, par ensi que le jour de l'anniversaire au devantdit signour Estienne, il donrait es chanoinnes presens ou cimitiere lou double qu'il suelt doner autrefois. Ce fuit fait et acordei, l'an mil trois cent et vint et nuef, le vanredi apres la sainct Barnabe apostre. Doneez desous nos saelz de nos lou priour et dou chapitre dessux dis.