Acte 2

Nous Guillames priour, et tous le convent de Rombech faicons savoir, que comme Baulduyn Hercegnon bourgoix d'Espinal qui fut, resgardent le salut de son aimme, heust deviseir et enchargier ai Florate sa file qu'elle assignait ai nos et ai nostre eccleise du Sainct Mont la somme de cent sols de cens annuel et perpetuel, monoie cursable es censes d'Espinal, por une messe chascune sepmainne dire et celebrer en nostre eccleise a tousjors mais, et li dite Florete en deschergans son aimme et sa conscience ait assignei et delivrei ai nostre eccleise la dicte somme de cent sols de cens annuel et perpetuel, ensi comme il est contenuis es lettres sur ce faictes que nos avons, en priant humblement et en requerant pour Deu, et par saincte charitei, coment li devotion et recommendation dessu dicte fuit receupte, aggree, et acomplie par nos et par nos successours en nostre dicte eccleise de Rombech ai tousjors mais, especialment pour le salut et le remeide des aimmes du dit Bauduyn Hercegnon, de Katherine sa feme, de Florete lor file, de lors peres, de lors meres, et ancessours, et de tous lors bons amis, et de tote lor bone entention. Assavoir est que nos priour et convent devantdis, considerans et resgardens mahurement la devotion et l'effect de charitei de part les personnes devant nommees, et inspirees de Deu et de bone voluntei et saint desir ai nos et ai nostre dicte eccleise, avons receup et aggreei, recepvons et aggreons tres benignement et charitablement, et devant la divine majestei offerons et presentons les devantdis nommeis. C'est assavoir Baulduyn Hercegnon, Katherine sa feme, Florate lor file, auxi lors peres, lors meres, et ancessours, et lors bons amis, et totes celles personnes es quelles lor bone entention est, pour estre parsoniers specialment et participans en une messe perpetuelle que nos avons ordenei et establi en nostre dicte eccleise chascunne sepmainne au jor du mercredi, que serait dicte et celebree par nos, et par nos successours, por eols, et por nos altres bienfactours et recommandeis, et generalment les associons en tous les bienfais que par la graice de Deu seront fais par les persones de nostre dicte eccleise, en messes, en orisons, en juenes, en abstinence, en almosne, en labour et en tous altres biens et vertus. Et les choses dessu dictes toutes et singuleires avons promis et creantei en veraie foy, et soub le vot de nostre religion dou tenir fermes et estables. Ce fut fait et concedei par nos priour et convent dessu dis, l'an mil CCCCVII.