Acte 3

Nous, officials de la Cour de Toul, faicons savoir ai tous, que en la presence de nostre fiable Willerme d'Espinal, clerc, notaires jureis de nostre dicte Cour de Toul, auquel nos adjostons, et avoir volons foy en choses ci apres escriptes, et en plus grandes. Pour ceste chose personelment establie, Florete file Bauduyn Hercegnon, bourgois d'Espinal qui fut, ait recogneu et confessei de sa pure et franche voluntei sen nulle constraincte, come ysoit ensi que li dis Baulduyn ses pere li heust dit et enchergier a sa darrienne voluntei, tant par testament comme altrement, que elle volsist assignei la somme de cent sols de cens annuel et perpetuel, monoie es censes d'Espinal, pour une messe chascune sepmainne ai tousjor maix dire et celebrer en l'englise du Sainct Mont, pour le salut des aimmes du dit Baulduyn, de Katherine sa feme, de lours peres et meres, et de tous lors amis. Et pour ceu que la conscience de la dicte Florette en soit deschargie, et auxi pour assevir la voluntei et desir du dit Baulduyn som pere, de certain propos, de bon avis, par mahure deliberation sur ceu heue par la dicte Florete, elle ait assis et assignei et par ces presentes assiet et assigne pour tousjor maix, a la dicte enclise les censals ci apres nomeis. Primo vingt seix sols de cens, la moitie a la sainct Estienne, et l'autre moitie le jor de la sainct Jehan Baptiste, assis sur la maisom qui fut Stevenin Camus, et lou Boindeus, seant ou bourg d'Espinal, en la blaverie, entre le chemin d'une part, et la maisom ou demoure Landol d'autre part, et sur la maisom Jehan Busegnei ou grant Rualmengni, entre la maison Bietrix feme le dit Landol d'une part, et la maison la feme Albert Cordrey d'autre part. Item quatoirse sols de cens, la moitie a la sainct Estienne et l'autre moitie a la sainct Jehan Baptiste, sur la maisom la dicte feme Aubert Cordrey, apres la maison le dit Jehan Buzegnei d'une part, et la maison Katherine feme Jehan Gemei qui fut et la salnerie d'autre part. Item seix sols de cens le jour de la sainct Martin d'yvert, sur la maisom que fut Pariset dou Grant Molin, que Jehan Daxei tient de present, seant ou deffuer bourg dou Grant Molin, entre la maisom Wyriet Lou Masson d'une part, et la maisom Broquart d'atre part. Item dous sols de cens sur la maisom Gerardin Le Texeran, que fut Warry Guibourg ou grant Rualmengny, apres la maison que fut momsire Karle d'une part, et le chemin que vait au Galcheu d'altre part. Item vingt sols de cens, sur la dicte maisom que fut momsi Karle, que la dicte Florete tient, apres lou dit Gerardin Texerant d'une part, et la maison Jehan Raboulour d'atre part. Item quatres sols sur la maisom Durand Hullon, que fut la file Lou Vier, en la Rue darrier du grant Rualmenny, apres la Ruelle que vait sur les murs de la ville d'une part, et la maisom que fut Lou Taitelin par d'autre part. Item quatre sols de cens, sur la maisom Bertrand fil Failei de Sainct Valey, en la dicte Rue darrier, apres la dicte Ruelle d'une part, et la masom Jehan Rowey, que fut Huat de Poissie d'autre part. Item quatre sols de cens sus ung prei que Jehan Bienvenus tient, qui fut Baulduyn Auray Lou Pigney, seant ou Pin. Item vingt sols de cens, sur la maisom Jehan Layrie, que fuit Olivier som seure, ou grant Rualmengny d'Espinal, en la dicte Rue darrier, entre la maisom Vairei d'une part, et le chemin d'aultre part, au darrier de la maison que fut Poirat Boilie. Desquelles censes dessus dictes entierement, la dicte Florete por lie, et por ses herds c'est desmise et desvestie pour tousjor mais, et en ait investir, et mis en bone possession les Signours du dit Sainct Mont pour euls et lours successours, par la tradition de ces presentes lettres, et ait promis et promet la dicte Florete par sa foy de ceu donee corporelment en la main du dit notaire en leu de sairement, surs poinne d'excommuniement, et soub l'obligation de tous ses biens, mobles et non mobles, presens et advenir, non jamaix venir, ne faire aler au contraire des assignations et choses dessu dictes, ou d'aucunne d'icelles, en tout, ne en partie, coyement, ne en hault, par plait ne fuer plait esperituels ne mundains, ne par aultres manieres que soient ou puissent estre, maix les tanrait et vuelt quelles soient tenues a tousjours fermes et estables pour la dicte enclise comme dit est. En renuncent ai toutes exceptions de mal, de malice, de baret, de circumvention, de lesion, et ai toutes aultres et singuleires exceptions, cavillations1, deceptions, deffenses, aydes et raisons, que en cest fait porroient aidier la dicte Florete et ses hers, et es dis signours de la dicte enclise nuire ou greveir, et especialment au droit que dit general renunciation niant valoir. En tesmoingnaige de veritei nos officials dessu nommeis a la requeste et supplication de la dicte Florete faicte ai nos, par la fiable relation du dit notaire, avons fait mettre le seel de nostre dicte Cour de Toul en ces presentes lettres, que furent faictes et creantees, l'an de graice nostre Signour mil quatre cent et sept, londemain de la nativitei sainct Jehan Baptiste. Presens Stevenin Landot et Jehan Lentrexour, bourgois d'Espinal, tesmoingnaiges ad ceu faire appelleis especialment et requis.