Acte 12

[ A]pres toutes les choses davant escriptes c'est a savoir l'an mil quaitre cent et XXIX, le mescredi davant les Palmes, XVI^me jour dou moi de mars, dame Marguerite de Toullon davantdicte femme au dit sire Warry de Hairouel trespassait de cest munde, et rendit son esperilt a Nostre Seignour, liquel li veulle ottroier le repos de paradis. Celui an meisme, le XIIII jour d'octembre, le davantdit seignour Wairry vint ceans on Saint Mont, et demandait pour Deu en chariteir le pain espirituel et temporel, et la prevende comme l'ung des freires, fors que en distribucion et en vestiaire. Sur quoy et pour quoy, nous priour et covent davantdit, fumes ensemblez en chapistre, et fumes tuit d'ung acord, et li fuit donnee la prevende emsi comme il l'avoit demandee spirituelment et temporelment pour Deu et en chariteir, nous tous ensemble considerans les biens qu'il avoit fait a nostre ecglise, et es personnes d'icelle. Ung poc apres li dits seignour Wairry einsi apprebendez comme dessus "est" dit, appellait, nous priour et covent davantdits tous ensembles. Et fit son almosne, en nous delivrant la somme de trois cent vies florins, et seix taisxe d'argent, chascune d'ung marc, pour convertir en revenues pour l'ecglise quant on les pourait troveir. Et se deveront mettre en escript en cest present livre, selonc la custume de ceans. Ces choses einsi faictes, c'est assavoir l'an mil quaitre cent et trente, quant li dits seignour Wairry eust fait son an de probacion, lui considerant le grant fruct, et bien qu'est en obedience, per le consentement de nous priour et covent, il fit profession, et promit obedience comme a tel cas appertient. Et bien tost apres, li dits seignour Wairry, considerant que necessairement fault morir, et ne sceit on quant, ne coment, il priait a nous, les dits priour et covent, que nous li ottroiissiens la plaice entre les II petis aultel de nostre ecglise ou on chante les messes de tierce pour faire et estre sa sepulture, et que en la pitier et chariteir de toutes les ames qui attendent la mercy Nostre Seignour, nous plaisit de dire chascuns jours apres la messe de tier-'ce a tousjours' -ce, surs sa sepulture, davant que li preste soit davestus, ung De profundis, Pater noster et Ave Maria, et Ne nos, A porta inferi et cetera, et Fidelium Dominus omnium. Et nous les dessus dits priour et covent considerant ses peticions et requestez estrez humbles, bonnes et charitables, et aussi pour les biens qu'il ait fait on temps passeir en nostre ecglise, si comme il est contenu, escript et deviseir en cest present livre, li avons ottroiier la dicte plaice pour eslire sa sepulture, pour faire mettre une tombe, son nom, et ses armes, et de dire chascuns jours apres la messe de tierce, per le dit preste qui chanterait la dite messe de tierce en celui leu, le De profundis, et le Fidelium, selonc sa requeste. Et de toutes ses choses davantdites, nous priour et covent li avons promis, et nous en summes obligier, nous et nos successours par la melour forme et meniere que nous poons et debvons en tant comme a la divine majesteir est aggreauble, le prometons a tenir ferme et atauble. Ce fuit fait et promis l'an mil quaitre cent et trente, le quaiteime jour dou moix de janvier.