Acte 13

[A] tous ceulz quilz ces presentes lettres voiront et oiront, nos G[uillaume] priour et tout le covent du Sainct Mont, faicont savoir, comme devote et honeste feme, Bietrix35 fille de fuit Jehan Paixour d'Espinal, resgardant mahuerement et considerant la misericorde et le jugement de Deu on tempt a advenir, en vraie foy et esperance de salut, nous ait humblement supplier et requis, pour Deu et en sainte charitei, que une messe fuit dicte et celebree chascunne semenne en l'an en nostre esglise du dit Sainct Mont, a tousjour mais pour le salut et l'aligement de son ame, et ausi des ames de son peire et meire, enfans, maris, ancessours, amis et bienfaitours. Et pour plus condescendre a sa peticion et request la dicte Bietrix en pure donation inrevocable faite entre les vis, en perpetuitei ait donner a nostre esglise du dit Saint Mont LX et V solz de cens monoie cursable ez censes d'Espinalz, a paier chascun ans a tousjours a nous et a nos successours ou a nostre certains comandement a Espinal et ce comme il apert plus a plains par les lettres sus ceu faictes que nous avons par devers nous creantees, l'an mil CCCC et XVIII, le XXVII^e jour du mois de novembre. Et item la dicte Bietrix pour ades meulx acomplir lou desir aussi pour acompaingnier a sa devotion, Didier de Savegney son maris, elle par la voluntei et consentement de son maris nous ait encor donner en perpetuitei la motie d'ung prei c'om dit le Prei Gabrel partable avec nous, seant on finaige de Deivillei. Item X sols de cens pour faire chascun ans son anniversaire selon l'usaige de nostre esglise, lesquels X solz de cens Collin Cholloi d'Espinal, et Jannatte sa feme debvoient a la dicte Bietrix, comme il apert plus a plains par les lettres sus ceu faictes que nos avons par devers nous. Assavoir est que nous priour et covent dessu dit resgardant et considerans la devotion, l'affect et charitei que la dicte Bietrix ait a nostre esglise et ez personnes d'icelle, par bonne et mahure deliberation sus ceu haue, et par communs acort, avons receupt, acceptez et aggraez, recepvons, acceptons et aggreons, et davant la divine majestei offrons et presentons la devantdicte Bietrix, son peire, sa meire, ses enfans, ses maris, ses amis et bienfaitours. Pour lezquelz especialment avons ordenes et ordenons por nous et nos successours, que une messe serait dicte en nostre dicte esglise du dit Saint Mont, chascunne semainne, a tousjour mais le mardi a houre de tierce, principalment pour le sauvement des davantdis, et generalment pour tous nos altres bienfaiteurs et amis. Laquelle ordenance, nous priour et covent dessu dis pour nous et pour nos successours, presens et advenis, nous avons obligiers et obligeons par ces presentes, et en la melour forme et maniere que nous poons et debvons et tant comme a la divine majestei est aggreable et acceptable le prometons de tenir loialment. Ceu fuit fait et ottroier par nous priour et covent dessu dis en nostre dicte englise du Saint Mont, l'an mil CCCC et XXVII.