Acte 10

A tous ceuls qui ces presentes lettres vairont et oyront, nous freire Guillaume de Remeiremont, humble priour dou Saint Mont, et tous le covent d'icelluy meisme leu, de l'ordre saint Augustin, on dyocese de Toul, sen nunlz moien appartenant au Saint Siege de Romme, conjunctement faisant chapiltre, salut et continuelles orisons. En acroissement de bien, en cellui qui est a tous salvour et salvement, et par especial qui par fervant devocion, et humble charitei en sa debonnaire et divine majestei ont esperance, que humble peticions et justes requestes par le merite des sains, especialment de la Virge Marie meire de Deu, de monsire saint Pierre et saint Poul apostole es orisons des bonnes et devotes creatures, davant lou siege de sa misericorde, et throne de la divinitei, seront esleis, aidies a presenteiz, si que en priant l'ung pour l'autre en vray espoir et foy estre salveiz, par graice en perpetuelle vision et fruicion de biens eurouse. Pour quoy devotes personnes, noble homme seignour Warry de Hairouuel, chevalier, et dame Marguerite de Toullon, sa femme, de Deu inspires par devocion et singuleire affeccion a nostre ecglise, et es persones d'icelle presens et adveir en esperance de nos orisons et prieres devotement, et en saint desir nous ont prier que en remission de lour pecchiez, et pour l'aleigement de lour ames, de lours peires, de lours meires, de lours enfans et de tous ceulz de qui ilz sunt tenuz, et de qui il ont entencion de faire prier, volsissiens en nostre dit covent et englise dou dit Saint Mont, perdurablement par nous, nos freires presens et advenir, dire ou faire dire et celebrer quaitres messes chascunne sepmainne, jusques a la fin de cest siecle, c'est assavoir, le lundi, le mescredi, le vanredi et le sambedi, ou en aultrez jours d'icelle meisme sepmainne, selonc nostre bon rawart et conscience. Et pour plus condescendre a lour peticion et charitouse demande, et pour avoir memoire especial deulz, et de ceulz pour qui ilz sont tenus et veulent faire prier, nous en avons recepheu la somme de seix cens vies florins de bon or, et de juste pois, dont nous nous tenons pour bien solt et contans. Laquelle somme des dis seix cens vies florins, par nous ensi haue et recepheue, nous avons mis et convertis es acquests ci apres escripts. C'est assavoir, en quaitres cherres de vin blanc, de cens annuel et perpetuel, en l'esquest d'une mason et le treffont d'icelle avec le chaucheu, qu'est en la dicte maison, en l'aquest de la moitie dou molin de Sercuer en treffont on ban d'Espinal, en treise gros de cens perpetuel en la fin de Remeiremont, et en quinse gros de cens perpetuel en la fin d'Espinal, lesquellez quaitrez cherres de blanc vin, la dicte mason, la moitie dou dit molin, et les aultres censes davantdictes nous avons achetes de la devantdicte somme des seix cens vies florinz en nom de nostre englise, aus persones ci apres escriptes, com plus plainnement apert par les lettres sur ceu faictes que nous avons par devers nous. Premier avons acheter a Jehan Phister et a Grede sa feme de Tonne le bourg une cherre de blanc vin, qui ait coster seix vingt viez florins. Item a Hannus Schwechuser escuier une cherre de blanc vin, qui ait coster cent et XII vies florins. Item a Reudeger de Tonne la ville une cherre de bla[n]c vin, qui ait costeir cent et X viez florins. Item a Henselin filz le dit Reudeger et a Heyle sa feme de Tonne la ville, demey cherre de blanc vin qui ait coster L viez florins. Item a Henselin Zschanck et a Elsy Karlerzim sa feme de Tonne le bourg demey cherre de blanc vin, qui ait coster cinquante viez florins. Lesquelles quaitre cherre de blanc vin nous ou nostre comandement debvons chascun an panre, lever et recepvoir es vignobles de Tonne le bourg et de Tonne la ville. Et la dicte mason avec le chaucheu avons nous achetei en treffont a Werulin B"o"urkelin, et a Claus B"o"urkelin freirez de Tonne le bourg et ont coster XLIII viez florins, et siet la dicte maison on defuer bourg de Tonne le bourg. Et la moitie dou dit molin avons nous acheter en treffont et franche de tout censal et debitez a maistre Ottim filz Jehan Lailet, par le consentement de Perrin son freire, et plusours de ses parens et ait coster LX vies florins, lequel molin siet sur la riviere de Drebyon entre Sercuer et Dompiere on ban d'Espinal. Et les "dis" XIII gros de cens perpetuelz avons nous encor acheter au dit maistre Otim, et a Perrin son freire enfans Jehan Lailet d'Espinal, assigneis surs plusours pieces de heritages a lour venant de part lour meire, seant en la fin de Remeiremont. Et ont costes XXIIII viez florins. Et des XV gros et demei dessur dis nous en avons acheter XII gros et demei de cens perpetuel a Bietrix fille Jehan Poxour d'Espinal, et sont assignez sur le prei d'Arreimenny ou finaige d'Espinal, et ont coster XXIIII viez florins. Et les aultres III gros de cens perpetuel avons nous acheter a Perrin dit Menupoint, fil Jehan Rasoille d'Espinal, et sont assigneis sur sa mason seant on grant Rualmenny d'Espinal et surs plusours de ses aultres heritaiges, et ont costes seix frans, XII gros pour le franc. Et s'il avenoit en aulcun temps que par droit, par us ou par coustume de paiis, on reimboit ou rachetoit alcune partie dou vin et rentes davantdictez en rendant a nous ou a nos successours la somme d'or et d'argent que nous en avons paier selonc le contenut des lettres surs ceu faites, nous li priours et covent dessus dit soub les obligacions desous escriptes, nous et nos successours sommes tenus et debvons remettre en acquest de revenues perpetuelles la somme d'or ou d'argent que nous ou nos successours en averiens recephu pour meintenir et assevir les davantdites IIII messes. Item nous ont encor donner les dessus dis monsire Warry de Hairouuel et dame Marguerite de Toullon, sa femme, seix resaulz de bleif de moture, a la mesure de la terre d'Orme28 a panre chascun an par nous ou par nostre comandement a tousjours maix, au terme de Noel sus le molin c'om dit de Waldegney sus la riviere de Madon entre Xirocour d'une part et le molin c'om dit de Villey desouz Waudeville d'aultre part, si comme il appert plus plainnement en certainnes lettres que nous en avons per devers nous sus ceu faites des dis monsire Warry et dame Marguerite sa feme, seellee du tabellion de monsire le duc de Loherainne de sa court de Nancy29 et dou seel de la court de Toul, laquelle donacion de dis seix resalz de blef de moture assigneis sus le dit molin de Waldegney, monsire le duc ait confermer, aggreer et amortir. Lesquels vins, mason, molin, blef, censes et revenues, nous ne nos successours ne debvons vendre, aliener, ne mettre fuer de nostre englise a nulz jours maix, par quelque meniere que ce soit, maix les devons tenir et varder, pour nous et por nos successours, pour acomplir a tousjours maix la devocion des dessus dis monsire Warry et dame Marguerite sa feme. Et pour les choses dessus dites assevir et bien ordonner, nous li priour et covent davantdit, conjunctement et par commung acort de nous tous, pour nous et por nos successours, avons ordenei et ordenons, que nous dirons, celebrerons, ou dire et celebrer ferons, chascune sepmainne a tousjours maix, les dictes quaitrez messes, es jours et par la meniere dessus dicte en nostre grant englise dou dit Saint Mont a l'ung ou au douz des alteiz d'icelle, selonc nostre boin rawart. Lesquelles choses dessus dites, nous li priour et covent dessus dit, par commung acort de nous tous, por nous et nos successours, prometons et creantons, par nos serement et surs le voult de nostre religion, de tenir et ycelles quaitres messes continuer dire et celebrer chascune sepmainne, comme dessurz est dit, a la louange de Deu, por les dis, prians au salvement de lour ames, de lours enfans, et de tous ceulz ausquels ilz sont tenus et volroient faire prier. Nous et nos successours en obligons par ses presentes en la meliour forme et meniere que nous poons et debvons, et tant comme a la divine majestei est aggreauble, et acceptable le prometons a tenir. Desquelles choses toutes et singuleires, les devantdis prians segnour Warry de Hairowel et dame Marguerite sa feme, ont lettres de nous, seelees des seelz de nous priour et covent, pour les davantdites choses estrez plus fermes et estaubles, lesquelles furent faites, creantees et seelees, l'an mil CCCC et XXIIII, le premier jour dou moys de may.