A tous ceuls qui ces presentes lettres verront et orront, nous frere Guillames de Romarimont humble priour du Sainct Mont, et tous li convent d'icellui meisme leu, de l'ordre sainct Augustin, ou diocise de Toul, sen nunl moyen appertenent au Sainct Siege de Rome, conjunctement faicens chapiltre, salut, et continuelle orison, en accroissement de bien en celui qui est a tous salveur et salvement, et par especial qui par fervent devotion et humble charitei en sa debonaire et divine majestei ont esperance, que humbles petitions et justes requeste, par le merite des saincts, especialment de la Virge Marie mere de Deu, de momsignor sainct Pierre et sainct Paul apostoles, es orisons des bones et devotes creatures devant le siege de sa misericorde et throne de la divinitei serons esleus, aidies et presenteis, si que en priant l'un pour l'autre en verai espoir et foy, estre salvei par graice, en perpetuelle vision et fruition de bien eureuse. Pour quoy devotes persones noble home Signour Warric de Harouuel chevalier, et dame Marguerite de Toullon sa femme, de Deu inspireis par devotion et singulere affection ai nostre ecclise, et es persones d'icelle presens et advenir, laquelle eccleise est fondee, donee et intitulee de la Virge Marie mere de Deu, de momsignour sainct Pierre et sainct Paul apostoles, en esperance de nos orisons et prieres devotement, et en saint desir, nous ont prier que en remission de lours pechies, et pour l'aligement de lors aimmes, de lours peres, de lours meres, de lours enfans, et de tous ceuls de quilz il sunt tenuis, et de quil il ont entention de faire priier volsissiens en nostre dit convent et eccleise perdurablement par aulcun de nos freres, faire dire et celebrer une messe la sepmainne jusque a la fin de ce siecle. C'est assavoir lor vie durent conjunctement ensembles le vanredi du Sainct Esperit, et apres le deces du premier d'euls, le dit vanredi de Requiem, ai tousjors mais. Et pour plus condescendre a lour petition, et charitouse demande, et pour avoir memoire especial de euls, et de ceuls pour qui il sunt tenuis et vuellent faire priier, nous en avons receup de present la somme de cent et douze vierf florins, de bon or et de juste poix, dont nous nos en tenons pour bien solt et contents. Lesquels cent et douze vief florins d'or, nous les avons mis et convertis en l'esquest d'une charre de vin, de cens annuel et perpetuel, que nos avons acquestei novellement por tousjors mais, pour nous, et pour nos successours, ai Hannus Schvvechuser, a panre chascun an ou cours de vendenge, ou vignoble de Tannes le bourg, et de Tanne la ville, si comme il appert plus pleinnement par les lettres que nos en avons du dit Hannus sur ceu faictes. Laquelle charre de vin de cens, nous, ne nos successours ne debvons vendre, aliener, ne mettre fuer de nostre main ai nunlz jours, maix la debvons warder et tenir pour nous, et pour nos successours, pour acomplir ai tousjor maix la devotion dessu dicte. Lesquelles choses dessus dictes nous li dessus dis priour, et freres du dit convent, par commui accord de nous tous promittons et creantons par nos sairement en veraie foy de prestes religious, et sub le vot de nostre religion de tenir, et ycelle messe come dessus est devisee continuerons, dirons, et celebrerons, continuer, dire, et celebrer ferons ai tousjour maix, toutes les sepmainnes, par aulcun de nos freres lealment et en bone foy, a la louange de Deu, pour les dis priians, au salvement de lours aimmes, et de ceuls ausquels il sunt tenuis, et volroient faire priier. Et pour faire tout ceu que dessus est devisei fiablement et lealment ai tousjours maix tenir et acomplir, pour nous, et pour nos successors presens et advenir, nous avons obligiei et obligeons par ces presentes lettres en la meilour forme et maniere que nos poons et debvons, et tant comme a la divine majestei est aggreable et acceptable, le promittons a tenir lealment. Et pour tant que toutes les choses dessu dictes soient plus fermes et estables, nous avons mis les seels de nos devantdis priour et convent a ces presentes lettres, que furent faictes l'an de graice nostre Signour mil quatre cent et nuef, le vingt et octime jour du mois de may.

A tous ceols que ces presentes varront et orront, nous G[uillaume] priour, et tout le convent de Rombech faicons savoir, come devotes persones, c'est assavoir Herard fil Treherey d'Arches, et Moingete sai feme, en resgardens et considerans mahurement la misericorde et le jugement de Deu ou temp ai advenir, en veraie foy, et en esperance, nous ont supplier humblement, et requis pour Deu, et en saincte charitei, que une messe fuist dicte et celebree chacunne sepmainne de l'an, en nostre eccleise de Rombech, a tousjors mais, en remission de lors pechies, et pour le salut et l'aligement de lours aimmes, et auxi de lors peres, de lors meres, de lours enfans et ancessours et amis, et de toute lour bone entention. Pour laquelle chose il ont donei et delivrei la somme de cent florins d'or, pour acquester censes et rentes pour nos et pour le profeit et utilitei de nostre dicte eccleise de Rombech, assavoir est que nous priour et convent dessu dis resgardens et considerans la devotion et l'effec de charitei en Deu, et l'amour qu'il ont a nostre eccleise, par bone et mahure deliberation sur ce heue, et par commui acort avons recepus23, acceptei, et aggrei, recepvons, acceptons, et aggreons, et devant la divine majestei offerons et presentons les devantdis, c'est assavoir Herard et Moingete sa feme, lors peres, lors meres, lors enfans, lours ancessours et amis, et toute lor bone entention pour estre parsoniers et participans en une messe que serait dicte et celebree chacunne sepmainne au sambedi, en nostre eccleise par nos, et par nos successours, presens et advenir, a tousjors mais en perpetuiltei, pour euls et por nos altres bons amis et bienfactours que sunt et qui seront recommendeis et receups en nostre eccleise, et pour tant que ceste devotion et ordonance devantdicte soit ferme et estable ou temp ai advenir, nous avons assignei et obligiei, assignons et obligeons ai ceuls qui diront et celebreront la dicte messe, les cens et acquast que nos avons fais cy apres deviseis, especialment nous assignons demie charre de vin de cens annuel et perpetuel que nos avons acquestei ai Werulin Meiger massons, bourgois de Tannes, et ai Ellin sa feme, ensi comme il est contenuis es lettres sur ce faictes que nos avons. Item XXIIII sols monoie cursable de cens annuel, que nos avons acquesteiz ai Jehan Gugney bourgoi d'Espinal, qui sunt assigneis sur le quart dou molin, que om dit des Grans Molins, dou foulet et gaucheu de coste icellui molin, et sur toutes les appartenances et aisances du dit molin, seant sur la rive de Moselle, defuer la porte dicte dou Grant Molin , partable contre les enfans Esterne Hullon bourgois d'Espinal, de quoi nos avons lettres. Item XX sols cursables de cens annuel, que nos avons acquestei ai Hawix file Le Petit Baulduyn d'Espinal, et sunt assigneis et deviseis par plusours leus. C'est assavoir XIII sols cursables de cens sur la maisom Jehan Le Couresey, seant on defuer bourg devant la porte de la Fonteinne, entre la maisom Demoinge Peussegnon d'une part, et la maisom Le Priour Le Charreton d'altre part, sus laquelle maisom nous avons XIII sols de cens. Item II sols et demei sur la maisom Jannete, file Wirion de Palgney24, seant ou grant bourg d'Espinal, en la Ruelle de coste la Maillole, entre la maisom que fut Merrelle d'une part, et le darrier de la maisom que fut Richart Jarron d'altre part. Item II sols et demei sur la maisom et heritaige que furent Thyrion Lambert que Odile file Richart Jarron tient. Item II sols sur la maisom Durant Houllon de Chavelot, seant ou grant Rualmengni, en la Rue darrier, entre la Ruelle que vait sur les murs d'une part, et la maisom que fuit le Taitelin d'altre part, sus laquelle maisom nos avons XIII sols. Et les choses toutes et singuleres ensi comme dessus est dit et devisei avons promis et creantei en bone foy, et soub le vot de nostre religion, du tenir fermes et estables, par nous et par nos successours ai tousjors mais en perpetuitei, ai l'honour de Deu, et au salvement des aimmes. Ceu fuit fait et ottroiei par nous priour et convent desus dis en nostre eccleise de Rombech, l'an mil CCCCX.