École des chartes » ELEC » L'Obituaire du Saint-Mont (1406) » Acte 9

Acte 9

Le prieur et les chanoines du Saint-Mont s'engagent à célébrer une messe hebdomadaire à l'autel de la chapelle Sainte-Croix, pour Jean Vicaire de Mirecourt25, chanoine du Saint-Mont, qui a donné à cette chapelle un livre, un calice et des ornements. Ils assignent six florins de cens annuel, assis sur des biens à Remiremont, pour la célébration de cette messe.

  • B Copie du début du XVe siècle, Metz, Médiathèque du Pontiffroy, ms. 1156, fol. 39v°-40.

Nous, frere G[uillaume], priour, et tout li convent de Rombech, de l'ordre saint Augustin, on diocese de Toul, appertenant sen nul moien au Saint Siege de Rome, salut et continuele orison en acroissement de bien, en celui qui est vray salvour et salvement, faisons savoir, que nous, considerans et entendans la pure devotion et bonne voluntei de honeste et discreite personne monsire Jehan Vicaire de Mirecourt, inspirei de Deu par devote et singulere affection a nostre englise, et es persones d'icelles, presens et a venir, pour plusours bienffais, servises, almosnes, et courtoisies, que nous avons receu de li on temp passei, et entendons encor recevoir, a son humble priere, et devote supplication, volans estre participans de sa bonne devotion, avons obligier et obligons nous et nos successours a tousjor mais de faire dire et celebrer une messe chascune sepmainne a l'altei de nostre chapelle Sainte Croix, situee en nostre montaingne devant nostre englise, par ung de nos conchanoinnes religious habituei de nostre dicte englise, liquel serait esleu pour ce faire par nous conjunctement priour et convent, selond nostre bon resgard. A laquelle chapelle li dit sire Jehan ait donnei ung livre, ung calice, et entier vestement de preste, avec les draps et corporals de l'altei. Et pour plus condescendre a la bonne voluntei et chariteuse devotion dou dit sire Jehan, et pour avoir memoire especial de lui, et de tous ceulx pour cui il est tenus et vuelt faire prier, nous avons assignei et assignons pour tousjor mais a la dicte chapelle seix florins de cens, deix gros pour lou florin, assis et assignei en Espinal sur certainnes places dont nous avons lettres. Lesquels seix florins, deix gros pour lou florin, nous li priour par lou consentement dou convent, et nos successours priours receverons chascun an pour departir par la meniere que sensuigt. C'est a savoir trois florins, deix gros pour lou florin, pour celui qui dirait la dicte messe, et les autres trois florins seront pour lou profit commun dou cellier, et de la lumiere de l'englise. Et on cas que nous, li priour, ou nos successours priours, ne delivreriens ou paieriens pasiblement et bonnement les dis trois florins pour chascune annee au frere qui averoit dite la messe, ou se li dit frere conchenoinne ne faisoit bien son devoir de dire ou de faire dire et celebrer la dicte messe chascune sepmainne, ensi volons nous et ordonnons, que li convent metoit la main au dis seix florins et aus assignals, et en ordonnoit a sa bonne voluntei, par ensi que la dicte messe soit continuelment bien et devotement servie. Et est a savoir que li dit nostre frere qui serait esleu, com dessus est dit, ne deverait avoir quelconque cause ne nommee en la dicte chapelle de Sainte Croix pour office de chapellenie, mais que tant soulement lou leu de l'altei pour icelle messe dire une foi la sepmainne, en reservant tousjors l'ancien droit et costume de la dicte chapelle dehu a l'office dou secrestain de nostre dicte englise, ensi com devant, sen avoir aucune franchise ou libertei pour cause de la dicte messe. Item encor est a savoir, que nous summes tenus et obligies pour nous et nos successours et obligons a tousjour mais de faire chascun an une foi ung anniversaire pour lou dit sire Jehan et pour sa bonne entention ensi comme nous avons acostumei de faire nos autres anniversaires pour les bienffaitours de nostre englise. Lesquelles choses dessu dictes, nous priour et convent dessu dis par commun acord de nous tous prometons et creantons pour nous et nos successours religious par nos sairemens en vraie foi de prestes, et sur lou vot de nostre religion, de tenir bonnement et lealment en la loange de Deu, et de tenir fermes et estables en perpetuitei toutes et singulieres les choses dessus escriptes. Ce fuit fait et ottroier par nous, priour et convent dessus dis en nostre englise de Rombech, l'an mil CCCC et XVII.


25 Mirecourt, Vosges, arr. Neufchâteau, ch.-l. cant.