De compositione facta inter canonicos Sancti Mederici et Robertum, concanonicum eorumdem, super quibusdam redditibus annui census. Omnibus presentes litteras inspecturis L[ucas de Lauduno], decanus, totumque capitulum Parisiense, salutem in Domino. Notum facimus quod, cum causa verteretur intercanonicos ecclesie Sancti Mederici Parisiensis, ex una parte, et dominum Robertum, in ipsa ecclesia capellanum, ex altera, super eo quod dicti canonici petebant ab eodem Roberto l solidos parisiensium annui redditus, de quibus defunctus Nicholaus de Meldis, predecessor ejusdem R[oberti], legaverat super conquestus suos, in sua ultima voluntate, communitati dicte ecclesie, ut dicebant, quindecim solidos, ad opus anniversarii sui in predicta ecclesia annuatim celebrandi, et xxxv solidos dictis canonicis, ut dicebant, ad hoc ut jamdictos xv solidos permitterent dicte communitati in manu mortua possidere ; et etiam super hoc quod dicti canonici compellebant prefatum R[obertum] apponendi extra manum suam omnes redditus et possessiones, quos vel quas, in terra predicte ecclesie, ratione beneficii sui, tenebat et habebat, quia vero cognitioni ipsius cause non poteramus interesse, aliis negotiis perpediti, viris venerabilibus et discretis L[uce], decano, et magistro H[ugoni] de Caprosia1, canonicis nostris, eandem causam jugiter duximus committendam. Qui, auditis hinc inde propositis, de communi assensu partium, ordinaverunt inter ipsos modo inferius annotato, videlicet quod dictus R[obertus], capellanus, et ejus successores tenebuntur, singulis annis, reddere memoratis canonicis prefate ecclesie Sancti Mederici quinquaginta solidos parisiensium annui redditus, quatuor terminis principalibus Parisius consuetis, et nichilominus tredecim denarios capitalis census, in octabis beati Dyonisii, pro quibusdam domibus, quas tenet ratione beneficii, que, antequam dicto R[oberto] collatum esset beneficium, de dictis tredecim denariis erant honorate ; salvis etiam decem solidis, quos, in ipsa institutione beneficii, defunctus Guillelmus de Meldis et Sibilla, ejus uxor2, preceperunt distribui annuatim communitati Sancti Mederici, in anniversario eorumdem ; quorum medietatem dictus R[obertus], capellanus, tenetur solvere, in crastino octabarum beati Dionysii, et aliam medietatem in crastino Brandonum3. Preterea tenetur dictus R[obertus] solvere, in octabis Pasche, dicte communitati v solidos annuatim distribuendos in anniversario defuncti Nicholai de Meldis, predecessoris sui. Dictus vero R[obertus] et successores sui tenebunt, habebunt et possidebunt, in manu mortua in perpetuum, ratione predicti beneficii, omnes domos sitas in terra dicte ecclesie, inter domum Auberti, presbiteri, et domum que fuit quondam Agnetis Laboidie, sicut se comportant ante et retro, cum viridariis et appendiciis suis, usque ad domum que fuit quondam Roberti Leber. Promiserunt autem dicte partes coram nobis, legitima stipulatione precedenti, quod contra ordinationem hujusmodi, per se vel alios, non venient in futurum. Nos autem ordinationi predicte nostrum prebentes assensum, ad petitionem partium, presentes litteras sigilli nostri munimine duximus roborandas. Datum anno Domini Mº CCº LXVIIIº, mense junio.