Diplôme du roi Louis IX, portant concession de la terre de Champagne

In nomine sancte et individue Trinitatis. Amen.

LUDOVICUS Dei gratiâ Francorum Rex. Noverint universi presentes pariter et futuri quod cum ad illius summi Regis honorem qui pro nobis in terris pauper fieri voluit, ut ejus inopia ditaremur, Domum Dei et pauperum hospitalis Beati Nicholai juxta pontem Pontisare sitam, tenuem in redditibus et in edificiis pauperem et exilem, novis ac commodis edificiis dilatantes, ampliorem numerum personarum regulariter viventium ad divini cultus et pauperum infirmorum obsequium institui disposuerimus in eadem, ut in ipsa Christus Dominus in membris suis honorabilius ac competentius foveatur. Volentes insuper Domum ipsam dilatatam edificiis et personis, possessionibus etiam ac redditibus ampliare, pietatis intuitu et pro anime nostre nec non inclyte recordationis regis Ludovici genitoris nostri, regine Blanche genitricis nostre et aliorum antecessorum nostrorum animarum remedio, Domui supradicte et pauperibus ac personis in ea degentibus donamus et concedimus in puram et perpetuam elemosinam triginta libras parisienses quas percipere solebamus annis singulis in villa que dictiur Champaignes sita prope Chambliacum in comitatu Bellimontis, scilicet in tallia ejusdem ville. Item totum conductum vinorum ; tria pressoria et quidquid in dicta villa et pertinentiis ejus habebamus et percipiebamus in terris, vineis, pratis, corveis, censibus, redditibus, ventis, investituris, emendis, proventibus et exitibus quibuscunque. Item totum manerium nostrum quod habebamus ibidem. Hoc tamen nobis retento quod in aliqua parte dicti manerii prisones nostros de comitatu Bellimontis possimus facere custodiri. Item donamus et concedimus predicte Domui totum nemus nostrum cum fundo terre ipsius nemoris quod est situm prope dictam villam de Champaignes, et appellatur vulgariter nemus de Lortiay. Volentes et concedentes ut Domus predicta dictum nemus cum fundo terre librum et quittum in perpetuum teneat et possideat et ipsum nemus vendere possit et de eo suam facere voluntatem et illud in ea libertate tenere et possidere valeat qua illud tenebamus. Damus insuper et concedimus dicte Domui omnem justitiam, omne jus et omne dominium que in predicta villa et in hominibus ejusdem ville et in pertinentiis ipsius habebamus et solebamus habere. Retinentes tantummodo nobis et heredibus nostris in premissis omnibus feoda et feodorum homagia et totam altam justitiam et aliam ex qua mors, vel membrorum abscisio seu mutilatio sequi potest. Predicta vero Domus solvere tenebitur omnes elemosinas et redeventias que quibuscumque locis et personis de premissis omnibus debebantur. Volumus etiam et concedimus quod post decessum capellani qui capelle site infrà ambitum manerii nostri predicti deservit ad presens, prefata Domus Dei omnes fructus et proventus ipsius capelle seu capellanie cum domo eidem capellanie appendente integraliter habeat et in perpetuum precipiat et possideat ; ità tamen quod prior Domus Dei sepedicte qui pro tempore fuerit dicte capelle per aliquem de fratribus suis seu capellanis aliis dicte domus ultrà statutum numerum canonicorum domus ejusdem ad hoc specialiter deputandum tenebitur facere deserviri. Preterea damus et concedimus prefate Domui trecentas libras parisienses annui redditus percipiendas in locis et terminis infrà scriptis, videlicet centum libras parisienses de prepositura nostra Pontisare annuatim in crastino Purificationis Beate Marie. Et centum libras parisienses de eadem prepositura in crastino Ascensionis dominice. Et residuas centum libras parisienses de prepositura nostra Meullenti, in crastino Omnium Sanctorum. Quam pecuniam volumus et precepimus priori dicte Domus qui pro tempore fuerit ad dictos terminos sine dilatione vel difficultate persolvi. Quod ut perpetue stabilitatis robur obtineat, presentem paginam sigilli nostri auctoritate ac regii nominis caractere inferius annotato fecimus communiri.

Actum apud Asnerias anno dominice Incarnationis millesimo ducentesimo sexagesimo primo, mense Julio . Regni vero nostri tricesimo quinto anno. Astantibus in Palatio nostro quorum nomina supposita sunt et signa. Dapifero nullo. Signum Joannis buticularii. Signum Alphonsi camerarii. Signum Egidii constabularii.