Amortissement de biens à Gérocourt par Jehanne, dame de Cormeilles

A touz ceus qui ces presentes lettres verront et orront. Noble fame Jahane fame feu Dreue de Cormelles chevalier, et Tibaut son fiz heritier du dit Dreue jadis son pere, prumiers arrieres segneurs du fié de la quarte partie dune masure à Geraucourt... Nous vous fesons a savoir que Jahan le Jeune drapier bourgois de Pontoise tenant de nous en fié ce que il avoit en ladite quarte partie, requenut par devant nous que les rantes et les cens et quant que il avoit ou povet avoir en celle dite quarte partie mouvant de nostre fié avoit vendu et quité... au metre a la prieuse au freres et au sereurs de la Meson Deu de Pontoise... et que eus et leurs successeurs tiegnent, aient et poursaient des ore en avant en main morte ces choses et que ils en puissent pleinement fere leur volenté. Nous iceste vente et toutes ces choses desus nomees aprouvous, voulons et otroions, et quitons au metre... et aus sereurs de la dite meson Deu et a leurs successeurs quanque nous i avions et povions avoir a tenir, a avoir et a pourseuvoir en main morte desore en avant... et a toutes ces choses a emplir et fermement garder nous obligon Nous noz hoirs et nos successeurs de tant come il apartient a nous... Ce fut fet en lan de grace mil deus cens et quatre vinz et deus, au mois de avril, le jour de jeudi devant Pasques.