La Commune de Pontoise et l'Hôtel-Dieu désignent comme arbitres mestre Hue, mestre de l'euvre Nostre-Dame de Pontoise, et Guillaume Le Tur.

A tous ceus qui verront et orront ces presentes lettres le mere et les pers de la quemune de Pontoyse salut en Nre Seigneur. Sachent tous que come descort fust meuz entre nous mere et pers de la dite quemune dune part et le mestre la prieuse les freres et les sereurs de la Meson Dieu de Pontoyse dautre, sur ceu c'est assavoir que les mestre prieuse freres et sereurs vouloient clorre et fere cloture de murs entour leur cimetiere qui est assis au bout du pont de Pontoyse... Et nous mere et pers ou non de laditte quemune disions encontre et pour le quemun profit de touz les habitanz de la ville que ce ne pouvoient il pas bien fere pour ce que le cours ou temps des granz yaues et des ravines seroit enpesché et destourbé et que par ce grant peril en pourroit venir au pont de Pontoyse et a toute la ville auxi... a la parfin par le conseil de bonnes gens et mesmement pour le profit et l'auneur de ladite Meson Dieu soutenir et essaucier Nous mere et pers ou non de nous et de lad. quemune avons accordé que led. cimetire soit clos au couz et au despens des diz mestre prieuse freres et sereurs et pour ycele cloture fere et ordener entour ledit cimetire nous nous en metons haut et bas sur mestre Hue mestre en ce temps de leuvre Nostre Dame de Pontoise et sur mestre Guillaume le Tur et acordons avecques ce que il se puissent conseillier et enfourmer lau ils verront que bien sera pour icele cloture fere et ordener au proufit du pont de la ville et de ladite Meson Dieu auxi. Et premetons a tenir ferme et estable a tourious sanz venir encontre tele cloture que lesdiz mestre Hue et Guillaume feront ou feront fere entour ledit cimetire et ordeneront. Et nous tere1 du tout en tout (quant a ce en marge) puis yceleure2 quil auront commencié a ordener dicele cloture su lobligacion de tous noz biens appendans a nous et a lad. quemune. En tesmoing de la quele chose nous avons scellé ces pres. lettres du scel de la quemune de Pontoise au causes. Donné lan de grace mil deus cenz quatrevinz et disenuef ou mois de juyg.