Echange entre l'Hôtel-Dieu et la Commune de Pontoise.

A tous ceus qui ces presentes lettres verront et orront li mere et li per de la commune de Pontoyse salut. Nous fesons a savoir que de nostre commun assentement u nom de la commune de Pontoyse pour le profit de nostre dite commune avons baillié octraié deleissié et quité du tout a touzjours en pure eschange desorendroit au mestre a la prieuse au freres et au sereurs de la Meson Dieu de Pontoyse deus deniers et maille parisis de fons de terre que nous avions et prenions a Pontoyse sur le bouel de la meson qui fu Richart de Lyus, c'est a savoir pour trais deniers parisis de fons de terre que la dite Meson Dieu avoit et prenoit chacun an a Pontoyse sur la meson que Pierres dii Marcheant de Chaumont a et tient par la reson de Alis de Benignecourt sa fame seant a Pontoyse en la rue de Malassis tenant a la meson Jehan le Moigne dune part et a la meson Mathyu de la Mare dautre part, a tenir, a recevoir et porseer audiz mestre a la prieuse, au freres et au sereurs de ladite meson et a ceus qui auront leus cause les deus deniers et maille assis sur ledit bouel et es lyus dentour, tiens comme nous les y avions et tout ceu qui appartient et puet apartenir en ices deus deniers et maille en la maniere et en la forme que nous les tenions bien et en pes, desore enavant sanz debat de nous et de nos successeurs, lesquieu deus deniers et maille de fonz de terre nous avons lessiez et ottraiez a ladite Meson Dieu en recompensation et en eschange des devantdiz trais deniers de chief cens qui nous ont esté donnez... U tesmoinz de laquele chose... avons seellé ces presentes lettres du seel de nostre dite commune lan de grace mil deus cens quatre vinz et seze le vendredi apres la feste saint Mathyu, apostre.