Vente à l'Hôtel-Dieu d'une part dans le travers de Maisons par Guiart de Poissy, clerc

A tous ceus qui ces presentes lettres verront Guillaume de Hangest garde de la prevosté de Paris salut. Nous fesons a savoir que par devant nous vint Guiart de Poissi clerc fuiz feu monseigneur Gace de Poissi jadis chevalier sires de Betemont en partie, si comme il disoit ; et recognut avoir vendu... au mestre, a la prieuse, aus freres et aus sereurs de la Meson Dieu de Pontoise vint livres parisis de rente annuel, a prendre et a lever dudit mestre... chacun an a l'Ascension sus toute la partie que il avoit et pooit avoir ou port et ou travers de Mesons sus Saine, que il tenoit en fié et en hommage de Nostre Seigneur le Roy de France, pour le pris de treize vins livres parisis siens quités, les quiex il recut en bonne monnoie numbree dont il se tint pour bien poiez... promettant par son loial creant que contre ceste vente ne vendra ne venir ne fera par lui ne par autre ou temps avenir et que audit mestre... fera paier ladite rente annuel au terme desusdit a peine de deus solz de parisis pour chacune journée que il ou ses hers ou ceus qui auront sa cause seront deffaillant de paier... et garantira ledit Guiart les dis vint livres parisis... aus us et coustumes de France... et obliia touz ses biens et les biens de ses hers muebles et immuebles, presenz et avenir ou que ils soient en notre joustice ou en lautrui tous pour vendre et despendre, a tel feur tele vente, sans dilacion avoir... Renuncant... a toutes excepcions barres et deffenses, cavillacions queles que elles soient... En tesmoing de laquele chose nous avons mis en ces lettres le seel de la prevosté de Paris lan de grace mil cc. iii^xx et quatorze le samedi avant la saint Lorenz.