Amortissement du champart de Mézières par les sires de Chars, de Sannois et de Montmorency

A touz ceus qui ces presentes lettres verront et orront. Je Mahiu sire de Mont Morenci et je Hoite de Cent Noiz chevalier. Je Jehans di Gualois de Chars escuier et je Nicholas dit de Marc escuier et je Ysabel femme de celi Nicholas escuier, saluz en Nostre Seigneur.

Sachent touz cest asavoir que je Nicholas et je Ysabel sa fame avons vendu et a touz jours quite au mestre et à la prieuse de la Meson Dieu de Pontoise au freres et aux sereurs de celle meson pour VIII. vins lb. de parisis des quiex nous nos tenons bien et leaument pour paiez en deniers nombrez et renonçons espresseement a ce que nous inpuissions dire que les deniers ne nous aient esté contez et nombrez, XXV. setiere de blé yvernage de rente et XIII. setiere daveinne de rente à la mesure de Pontoise, que nous avons et prenons chascun an dedenz la feste Touz Saint sanz nul coust metre, en la champart de Mesieres qui fu Jehan Galois escuier frere jadis mesire Pierre de Charz chevalier, laquele champart monseigneur Gefroi de la Chapelle chevalier tient orendroit par la reson d'une eschange qui fete est entre celui monseigneur Gefroi et celui Jehan Gales si comme lendit. C'est a savoir les XX et V. setiere de tel blé comme il vient à la champart sanz nul empirement metre. Lequel blé et laquele aveinne nous prenions chascun an en tele maniere que celui qui la champart tenoit ne povet riens oster ne lever de ceste champart fors tant seulement i. mui de grein devant que nous fusions touz paiez de XX et V. setiere de blé et de XIII d'aveinne Et sil estoient defaillant de paier au devant dit terme il estoient tenuz a paier à nous pour defaute de chaucun jour apres le terme II. souz en non de peine toutes les foiz que il estoient defaillant de paier au terme devant dit, le devant dit blé et la devant dite aveinne. Lequel blé et laquele aveinne nous Nicholas et Ysabel avons vendu et a touz jourz quité a celui mestre a la prieuse au freres et aus sereurs de celle Meson et a leurs successeurs a prendre et avoir à chascun an en la maniere que nos le prenions et la maniere qui devant est devisée, et a tenir a longjour en main morte. Si avons promis je Nicholas et Ysabel sa femme que nous en ces XX et V. setiere de blé ne en ces XIII setiere daveinne que nous avons venduz, par reson deritage, de conquest, de mariage, daumone, de douere ne de don de noces ne par autre raison quele quelle soit desor en avant riens ne demanderons ne reclamerons et que celi mestre ne la prieuse, por reson de la vente... devant juge de crestienté ne de courtlaie, par nous ne par autres ne travallerons ne ne ferons travallier ; mes le devant dit blé et la devant dite aveinne, au devant dit priour et a la devant dite priouse, bien et realment guarantirons deffendrons et delivrerons contre touz, aus uzages et aus coustumes du pais.

Apres je Jehans Gales escuier dequi celi Nicholas et cele Ysabel se femme tiennent ce devant dit blé et celle devant dite aveinne et duquel estoient en mon homage comme prumier sire du fié, la devant dite vente lou, veil et otroi, et que li devant dit mestre et la prieuse teignent des ore mes en avant en main morte..... Apres je devant dit Hoide de Cent noiz chevalier secont sire du devant dit fié.... veil, lou et otroi ladite vente si comme elle est ci desus devisee... Apres je Mahiu de Montmorenci tiers sires du devant dit fié... la devant dite je voil, lo et otroi, et quanque je en puis avoir par reson de seignorie je le quit a touz jours a ces religieus et a leur successeurs bonnement et en tel maniere quils en puissent tenir et avoir en main morte..... En tesmoing de ceste chose, pour ce quelle soit ferme et estable... avons pendu chascun de nous nos scaus a ces presentes lettres, qui furent fetes en len de lincarnation Nostre Segneur Jhu Crist mil et cc. et sexante cinq el mois de may.