Vente à l'Hôtel Dieu, par Jehan de Montigny, d'un fief à Champagne

A tous ceus qui ces presentes lettres verront et oiront Pierre de Monteigni garde du scel de la prevosté de Biaumont seur Oyse salut — Sachent tous que pardevant nous vint present Jehan de Monteigni le viel, bourgeois de Champagnes recognut de sa bonne volonté sans force que pour son pourfit et utillité a vendu quitié et delessié en nom de pure et perpetuelle vente a tousjours perdurablement de li et de ses hoirs sans james rapeler ou venir encontre a religieus hommes et femmes le mestre la prieuse les freres et les sereurs de la Meson Dieu de Pontoise et a ceus qui deus auront cause un fief et les apartenances diceli fief sans riens retenir exepté les ufruis diceli fief que ledit Jehan tiendra tant que il vivra et apres le dessept dudit Jehan enquel point que il meure que les dits acheteurs puissent entrer audit fief comme en leur propre acqui sans contredit de nule ledit fief mouvant desdits achateurs, auquel fief appartiennent les choses ci apres nommées. Cest assavoir un arpent de vignes ou environ seant au Charnie, tenant dune part a la masure sire Raoul Fourner et dautre part a Arnoul de Liaue. Item demi arpent de vigne ou environ seant en Burel tenant dune part a Martin Fauvel escuyer et dautre part a Marie la Ferquoque. Item le champart de trois journées de terre seans es monz de Champaignes tenant a Adnet Deferes escuyer. Item ung arpent de terre seant es mons tenant a Jehan le Fius Thibaut. Item quatorse souls ou environ de cens. Item demi Masure que Vignes que Meson ou la entour seant dessous le Moustier de Champaignes tenant dune part a Goron de la Vaine et dautre part au chemin du Moustier. Item les trois parts dun pressoir tenant dune part a lestre du moustier de Champaignes et a la fame Saussevert et a Geoffroy le Cousturier dautre part. Item une rente que Marie la Massonne doit que li que ses personniers sus trois quartiers de vignes ou la entour tenant dune part a la vigne au prestre de Champaignes et dautre part a la vigne a la Burnele. Item Paque la fame Sausse vert une rente sus sa masure que vingne que meson tenant d'une part a Adam Aude et dautre part au cimentiere. Item messire Estienne de Goussonville une rente que li que ses personniers sus un arpent de vignes ou la entour. Item Jehan le Minier de l'outoyse une rente sur un arpent de vingne ou la entour seant es Eres tenant dune part a Hue le Minier et dautre part a Jehan de Bornel. Item Jehan le fius Thibaut une mine d'avaune de rente sus un arpent de terre ou environ seant au port Nostre Dame tenant aupres de lOstel Dieu. Item vesci un arriere fief. Premierement Bertaut de Monteigni tient de Jehan de Monteigni le quart d'un pressoir tenant dune part a Geoffroi le Cousturier et dautre part a Paque la Saussevert. Item deus arpens et demi environ vingne et masure ou la entour seans dessous le moustier. Item la vingne de Manchet le Henri tenant dune part a la damoysele de sainte Genevieve et dautre part a la niesce a levesque de Senlis avec tous les pourfits emonuments avenernans issues justice et seigneurie qui du fief dessus dit pourroient venir duire ou eschoir par quelquonques cause ou reson que ce soit sans riens retenir dudit fief audit Jehan ne a ses hoirs excepté les ufruits tant comme ledit Jehan vivra metant cessant et transportant des maintenant pour li et de li et de ses hoirs es dis acheteus et en ceus qui deus auront cause tout le droit action proprieté et possession reele ou personel miexte ou directe que il avoit et pouvoit avoir audit fief et appartenans sans retenir aucun droit, et sen desvesti pour li et pour ses hoirs, et lesdis acheteurs en revesti par le bailg de ces lettres. Tout pour le pris de trois cens livres par. fort monnoie, siens quités que il a eu et receu desdis acheteurs en bone monnoie bien contée et bien nombrée a li baillée et livrée sans refus, et sen tint pour bien payez pardevant nous sans fraude renonçant en ce fet a lexeption de la monnoie non eue et non receue ou que la chose ait esté autrement faite que escripte, et promist ledit Jehan par la foi de son cors donnée en nostre main et sus peine de lamende le roy que desoremes autrement ceste vente ou autrement aucune chose contenue en icelle il nira ne aler ne fera par li ne par autres, anchois la tendra ferme et estable et toutes les choses dessus escriptes sans iames rapeler ou venir encontre et garantira li et ses hoirs audis acheteurs et a ceus qui deus auront cause envers tous et contre tous en jugement et hors jugement a la simple requeste desdis achateurs ou de ceus qui deus auront cause ou du porteur de ces lettres et desdommagera de tous cous et domages que en aura ou par deffaute de sa garantie desquiex il promist a croire le porteur de ces lettres par son simple serment sans autre preuve fere, et pour ce fermement tenir ledit Jehan en a obligié li et ses hoirs tous ses biens et les biens de ses hoirs meubles ou non meubles presens et a venir pour vendre et pour despendre a tel jour tel vente par la gent le roy ou par la justice sous qui ils seroient trouvés sans quarantaine et sans delai et son cors tenir en la prison le Roy fermée a ses propres cous, se il estoit deffaillians dacomplir les convenances dessus dites ou aucunes dicelles, renonchans en ce fet a ce que il puisse dire estre dessus de la moitié du juste pris, a toutes exceptions deceptions de mal de fraude a toutes graces respis ou indulgences données et a donner a tout drois escript et non escript a tous us et coustumes de loi et de juge et a toutes les choses adverses qui contre ces lettres pourroient estre dites et opposées et au droit qui dit que general renonciation ne vaut pas. En tesmoing de ce nous avons seellées ces lettres du seel de la provosté de Biaumont en lan de grace mil trois cens et nuef au mois de Jung, le dimanche apres la Saint Barnabé l'Apostre.