Vente de cent sous de rente sur le travers Je Maisons par le chevalier Gasce de Poissy.

A tous ceus qui ces presentes lettres verront et orront. Je Gasce de Poissy chevalier salut. Sachent tuit que je ai vendu quitié et delessié a touz iours mes au mestre, a la prieuse aus freres et au suers de la Meson Dieu de Pontoise cent soulz de paris de rente annuel a prendre et a lever dudit mestre de la prieuse et des sereurs devanz diz ou de leur procureur chascun an a la Charesme sur toute ma partie que jé ou puis avoir ou port et ou travers de Mesons sus Seine que je tiens en fié et en hommage de Nostre sire le Roy de France pour le pris de quatrevins lb. parisis lequiex jé receu en bone monnoie nombree du mestre de la prieuse des freres et des suers devant diz, desquiex je me ting pour bien poiez et premest par mon serment que contre ceste vente je ne vendré ne venir ne feré par moi ne par autre ou temps a venir et que au mestre a la prieuse au freres et au suers ou a leur qmandement portant ces lettres sanz autre procuration porter pour pledier ne pour autre chose fere quele quele soit, poieré ou poier feré ladite rente annuel chascun an ou terme dessus dit a poine de deus soulz parisis pour chascune journée que moi ou mes hoirs ou autres qui auront ma cause seront defaillant de poier les cent souls de rente annuel devant diz tantost que le porteur de ces lettres aura requis ledit poiement. Et leur garantiré et deffendié les devant diz C. soulz de rente annuel deuz chascun an encontre touz et enver touz a mes propres couz despend au us et aus coustumes de France a tous jours. Desquiex couz et despens le porteur de ces lettres ou nom desdiz mestre prieuse freres et sereurs sera creu par son simple serement sanz autre preuve fere pour laquele rente annuel et pour la poine couz et despenz dessus diz rendre et poier touz sanz relache ou diminucion toutes les fois quil seroit deuz ou encouruz et pour ladite garantice fere en la maniere dessus devisée je oblige moi et mes hoirs, touz mes biens et les biens de mes hoirs muebles et non muebles presenz et avenir ou que ils soient trouvez par la joustice souz qui il seront trouvez touz pour vendre et despendre sanz moi appeller et sanz dilacion avoir jusques a tant que satisfacion soit fete au mestre a la prieuse au freres au suers devant diz Et especiaument a ce tenir fermement et garder lealment je oblige le remanent qui mafiert u port devant dit et u travers pardevant les devant dis C. soûls Renonscant en ce fet pour moi et pour mes hoirs et pour ceus qui aront ma cause a l'excepcion desdites quatres vins lb. non nombrees, non eues et non recepeues, a l'excepcion de decevance outre la moitié de droit pris, et de toute autre excepcion, à toutes autres excepcions de fet escript et non escript a touz privileges donnez et a donner de pape ou de Roy de prince pour ost pour tournoiement pour chevauchiee ou pour autre cause quele que elle soit, au droit qui dit que general renonciacion non valoir, et a toutes autres exceptions expresses et non expresses. Et soupli a nostre sire le Roy devant dit de qui je tenoie en fié les diz C soulz de rente devanz diz que il toutes les choses dessus dites et chacune dicelles welle greer loer approver et confermer par ses lettres pendanz. Et en tesmoinz de laquele chose jé scellé ces presentes lettres de mon propre scel duquel je use, qui furent festes lan de grace mil trois cenz et nuef le juesdi devant la feste de la translacion saint Benoit.