Lettres de Marguerite, reine de Sicile, au sujet de la vente d'une grande maison à Paris, rue Andry Mallet, en la rue Saint Merry, par la veuve de Gui du Mez, prévôt de Paris
- A Arch. hosp. Pontoise, B 72. Vidimus de Jehan de Montigni, garde de la prévôté de Paris, en date du mardi après la St Denis, 11 octobre 1289, « collacion fete de la procuracion par G. de Brebant et par Huede de Saint Denys». Détruit en 1944.
- B Bibl. nat. de France, lat. 5657, fol. 106.1
- a Cartulaire de l'Hotel-Dieu de Pontoise, éd. Joseph Depoin, Pontoise, 1886.
Marguerite par la grace de Deu Reyne de Iherusalem et de Sezile et contesse de Tournuerre salut. Nous faisiens a savoir a touz que en nostre presence establie Marguerite de Jimay femme feu Gui du Mex jadis prevost de Paris, veuve, fist ordena et establit ses procureurs et messages especiaus, home hennourable nostre amé maistre Henri de Saint Meeinge chanoine de Tourz et de Chaalons et Hunbert d'Ausone clerc, ambedeus ensemble et chascun par soi, en tele meniere que la condicion du premierement occupant ne soit pas meillieur que de l'autre, et que ce qui sera comencié de lun ou par lun de els puisse estre terminé ou parfait par lautre. C'est a savoir a confesser et recognoistre el nom de ladite dame Marguerite et pour li, devant li prevost de Paris, que ladite dame a vendu... a touz jours mes pour le pris de quatre cenz livres de parisis au mestre a la prieuse aus freres et aus sereurs de la Maison Deu de Pontoise de la dyoceise de Roan... une maison si comme ele se comporte et toutes ses appartenances assise à Paris vers la rue Saint Merri en une rue qui est appelée la rue Andri Mallet, dont plusieurs estages appartenent à cele maison, sestendent par darriere jusques a la rue de la Juyerie aus deus portes , en la censive le Roy, sur la charge que ele doit : laquele maison fu conquise de ladite Marguerite et du devantdit feu Gui quand il vivoit, durant le mariage entre els et de laquele la moitié appartenoit a ladite Marguerite pour sa part dudit conquest, et l'autre moitié li appartenoit par division fete entre li et Guiot son fil et Bernart fil dudit feu Gui dune autre femme... sus la charge de quatre deniers et maille ou environ, de fonz de terre deuz pour la grant maison, et de quarente solz de crois de cens deuz pour une maison appartenent a ladite grant maison, joignant a la maison Saint Antoine, et quatre solz de cens deuz au Temple pour une maison qui est en la rue de la Juyerie, sanz autre charge..... En tesmoing de ce, nous a la requestre de ladite Marguerite avons fet seeller ces presentes lettres de nostre propre seel, données en .
