Jugement d'arbitres entre l'Hôtel-Dieu et les religieux du Val au sujet des havage et bufetage de Pontoise

A tous ceus qui ces presentes lettres verront et orront Jehan dit le Berchier garde de la chastelerie de Pontoise de par madame la Roine de France et je Girars du Perchei chevalier saluz en Nostre Segneur. Sachent tuit que comme contenz fust entre labé et le couvent du Val Nostre Dame dune part, et le mestre, la prieuse, les freres et les sereurs de la Meson Dieu de Pontoise dautre part, dun havage et dun bufetage de Pontoise que li mestres, la prieuse, les freres et les sereurs de la Meson Dieu demandoient et requeroient au devant dit Abbe et au couvent du Val Nostre Dame, et li devant dit Abbes et li convenz disoient que il ne devoient point et de ce descort a la requeste des parties et des bonnes genz qui nous en requistrent nous les preimes seur nous, et les ii. parties creancerent que il tendroient ferme et estable ce que nous en ferions et dirions seur quarante livres de paine de Paris, et en baillierent bons pleges lune partie et lautre. Lesquels pleges sont ci desouz nommez, cest a savoir Raoul de Pierrelée, Guilliaume la Chievre bourgeois de Pontoise pour le mestre la prieuse les freres et les sereurs de la Meson Dieu de Pontoise devant dite, et Raoul de Waillaincourt et Mondre de Denincourt pour labbé et le couvent du Val Nostre Dame. Et nous par le consel de bonne gent pour la pes fere des parties, avons dit nostre dit en tele maniere que li devant dis abbes et li covenz seront quites a touz jours du havage et du bufetage de Pontoise ; et deus masures que li devant dit abbes et li convenz du Val Nostre Dame avoient a Champagnes avecques toutes teles redevances et rentes et avecques toute tele segnourie que il avoient et pooient avoir en ces devant dites masures seront tenues a touz jours... de la devant dite Meson Dieu de Pontoise. Cest a savoir la masure Colart qui fu fiex Pierre le Provost de Champaignes et qui est dalez les ourmes demmi la ville, et devant la mare qui est dalez les ourmes devant diz. Derechief la masure qui fu Guiart le Mere, si come ele se comporte de lonc et de lé. Et est icele masure qui fu Guiart le Meire assise au deseure du moustier de la ville. En tele maniere que le mestre... et les sereurs de la Meson Dieu de Pontoise rendront a labbé et au couvent du Val Nostre Dame ou a leur commandement diz souz de Paris de rente renduz chascun an en leur meson quil ont a Pontoise aus witaves de la Saint-Denis1. Et sil avenoit que il ne fuissent renduz a ce jour, leur en rendroit de toutes les journees que leur defaudroit de paiement, de chascune journee xii deniers parisis jusques a tant que les diz souz diz seroient renduz. Et en confermement de ceste chose, je devant dit Jehan le Berchier garde de la chastelerie de Pontoise de par madame la Roine de France ai mis le seel de la chastelerie de Pontoise en ces presentes lettres avec le seel du devant dit Girart du Perchei chevalier. Ce fu fet en lan de grace M. CC. soissante et quinze, au mois de septembre.