Sentence contre Symon de Poissy, chevalier

Lan de grace mil ccc. vint sis le vendredi veille de feste Sainte Luce vierge fu fete relacion à nous soubailli de Poissi de par Jehans Hur (?) nostre sergent jure en la chastellerie de Poissi par son serment, que par la vertu d'un jugié ou sentence ou arrest de Parlement pour la Meson Dieu de Pontoise contre monsieur Symon de Poissy chevalier, contenant cent et quatorze solz par. de rente annuel et perpetuel, et dont icelle rente estoit deue du terme de la Toussaint darrenier passé, il avoit arresté et mis en la main de Madame la Roine Jehanne ce que ledit chevalier peut avoir sus le port de Mesons sus Seine ; et pour ce que il estoit venu à la congnoissance du procureur dudit chevalier larrest et la main mise de par Madame es biens d'ycellui chevalier, et que il sopposa encontre et requist ou non dudit chevalier a avoir journée, li dit nostre sergent lavoit aujourdhui adjourné pardevant nous pour dire ce qu'il cuideroit que bon fust contre ledit arrest afin que execution nen deust estre faite. Auquel jour se presentant offri le procureur et porteur du jugié de la dite Meson Dieu souffrir si comme il dut, et ledit chevalier son dit procureur ne autres pour eus vindrent ne envoierent, mes furent du tout deffaillanz. Pourquoy nous discretames execucion estre faite dudit jugié sus les biens arrestez dudit chevalier comme reson deuvroit. Ce fu fait lan et le jour dessus diz. R.Mareschal.