Mons^r le Chancellier,

[1.] Je receuz hier une lettre du cardinal de Tournon, ensemble ung estat qu'il m'a envoyé. Et affin que vous entendez ce qu'il me faict sçavoir, je vous envoye le tout et par la vous verrez la difficulté qui se trouve de recouvrer argent par dela, pour satisfaire a l'estat que j'ay faict dresser pour mons^r de Humieres. Par quoy il est besoing, sur peine de veoir tomber mon affaire du costé de Piemont en trop grant inconvenient et desordre, d'envoyer argent audict cardinal et pour ceste cause, je vous prie, Mons^r le Chancellier, bien veoir et noter tous les poincts touchez par sadicte lettre et aussi par led. estat, et trouver moyen de luy envoyer argent et, en actendant que la somme que luy envoyerez puisse estre devers luy, l'advertir de l'ordre et provision que vous y aurez donnee, dont vous ne fauldrez aussi de me donner advis.

[2.] Vous verrez aussi par ce que m'escript icelluy cardinal qu'il est besoing de faire expedier des commissions ung peu plus rigoreuses pour le faict de l'engaigement et vendition de mon domaine que celles qui ont esté depeschees par ci devant, lesquelles vous pourrez faire dresser ainsi que verrez estre necessaire, à ce que par faulte de cela mon affaire ne demeure en arriere.

[3.] Et à ce que vous entendez la response que je fays presentement audict cardinal, je vous en envoye le double, qui est tout ce que je vous diray pour ceste heure, sinon que je prie a Dieu, Mons^r le Chancellier, qu'il vous aie en sa Saincte et digne garde.

Escript au camp davant Hedin le xx^me jour de mars mil v^c xxxvi.

Françoys.

Breton.

Mons^r le Chancelier,

[1.] Je vous ay dernierement envoyé tout ce qu'il m’est venu du cardinal de Tournon, et par cela aurez entendu de combien il est requis et necessaire de pourveoir à luy envoyer promptement argent pour satisfaire entierement à l'estat qui a esté dressé pour le s^r de Humyeres, qui ne vouldra veoir dedans peu de jours tout mon affaire de Piedmont tumber en manifeste ruyne. Et depuis j'ay receu une autre lectre dudict cardinal, le double de laquelle je vous envoye avecques celle qu'il a escripte à mon cousin le grant maistre. Et par la vous congnoistrez encore de plus en plus qu'il est requis de luy envoyer promptement deniers en toute dilligence pour ne tomber en l’inconvenient que dessus.

[2.] Par quoy je vous prie, Mons^r le Chancelier, veoir bien le contenu esd. lectres et le plus dilligemment que faire ce pourra envoier argent audict cardinal sy desja faict ne l'avez. Car entendez que estant les choses comme elles sont du costé dud. Piedmont, vous ne me sçauriez faire service plus agreable, vous priant ne faillir de m'advertyr incontinent de l'ordre et provision que vous aurez donnee en cest endroit, car vous sçavez de combien cela importe.

[3.] Je feray ce jourd'uy dresser la response que j’entends estre faicte audict cardinal, de laquelle je vous envoyeray le double affin que en entendiez le contenu. Et ce pendant, pour ne perdre temps à ce que vous puissiez tousjours pourveoir en son affaire, je vous ay bien voullu faire ceste depesche.

Priant Dieu, Mons^r le Chancelier, qui vous aict en sa saincte garde.

Escript au camp pres Hedin, le xxiii^e jour de mars mil v^c xxxvi.

Françoys.

Breton.

Mons^r le Chancellier,

[1.] Le sieur d'Estourmel m'a adverty que pour le paiement du charroy qu'il convient faire des vivres que j'ay ordonné estre menez en ma ville de Therouenne pour l'advitaillement d'icelle et dont led. d'Estourmel a la charge, il convient luy envoier quatre mil cinq cens livres, oultre les douze ou treize cens livres qu'il a espargnez sur l'achapt des grains, ainsi qu'il vous a faict entendre par homme expres. Et d'autant que je desire sur tout led. advitaillement estre faict le plus promptement qu'il sera possible pour estre chose de l'importance et consequence que vous povez panser et estimer, à ceste cause je vous prye, Mons^r le Chancellier, que incontinant vous donnez ordre de faire tenir a icelluy d'Estourmel lad. somme de iiii^m v^c £. ou autre somme que verrez estre necessaire et requise affin que par faulte d'argent icelluy advitaillement ne puisse estre retardé ne differé. Et vous me ferez service tres agreable.

Priant Dieu, Mons^r le Chancellier qu'il vous aict en sa garde.

Escript au camp pres Hedyn le xxvii^me jour de mars mil v^c xxxvi avant Pasques.

Françoys.

Breton.

Mons^r le Chancellier,

[1.] Vous sçavez le proces et differend qui est entre maistre Jehan de Nismes, mon premier cirurgyen et vallet de chambre ordinaire, et maistre Claude Bourgeois, aussi mon cirurgien, duquel je vous ay commis et attribué la congnoissance. Et pour ce que je desire qu’il soit vuydé en la meilleure et plus briefve expedition que faire se pourra, afin de relever led. de Nismes de la peine et sollicitude en laquelle il est à l'occasion dud. proces, à ceste cause, je vous prie, Mons^r le Chancellier, donner ordre de le faire vuyder et expedier le plus tost qu'il vous sera possible et vous me ferez service en ce faisant.

Priant Dieu, Mons^r le Chancellier, qui vous ayt en sa garde.

Escript au camp pres Hesdin le xxx^e jour de mars mil v^c xxxvi.

Françoys.

Breton.

Mons^r le Chancellier,

[1.] Pour ce que je veulx et entends que ma cousine la marquise de Rothelin sois payee et satisfaicte promptement de ce qui luy est deu à cause de la pension que je luy donne des deniers de mes finances estans en mes coffres d’Amyens, suyvant l'acquict que je luy en ay faic expedier, à ceste cause je vous prie et ordonne l'en faire incontinant payer. Et vous me ferez plaisir.

Priant Dieu, Mons^r le Chancelier, qu'il vous ayt en sa saincte garde.

Escript au camp pres Hedin le viime jour d'avril mil v^c xxxvii.

Françoys.

Breton.

Mons^r le Chancellier,

[1.] Ma cousine la duchesse de Vendosme1 m’a pryé de faire veoir et visiter aucuns tiltres touchans et concernans ce qu’elle pretend n’estre de l’appanage de sa maison. Et d’autant que je veulx luy subvenir en cest endroict, je vous prye recevoir lesd. tiltres, lesquelz vous verrez et visiterez de poinct en poinct bien et deuement pour aprés m’en faire votre rapport quant vous serez devers moy. Et en ce faisant vous me ferez service tres agreable.

Priant Dieu, Mons^r le Chancelier, qu’il vous aict en sa saincte garde.

Escript au camp du Mesnil2 pres Hedyn le vii^me jour d’apvril mil v^c xxxvii.

Françoys.

J. Breton.

Mons^r le Chancellier,

[1.] Pour ce que Mons^r d’Allebrot est venu icy par devers moy me solliciter de la pension de ma fille la royne d’Escosse et pareillement de l’assignation qui est baillee à mon filz le roy d’Escosse et à elle pour le surplus de son dot, je vous prie, Mons^r le Chancellier, adviser de luy faire bailler quelques autres terres que la conté du Mayne1, lesquelles il puisse avoir et en joyr en toute preheminance et auctorité jusques ad ce qu’il ait esté remboursé de la somme qui luy est deue dud. dot, vous priant derechief faire en cela user de si bonne diligence que led. d’Allebrot puisse estre promptement expedié. Et vous me ferez service tres agreable en ce faisant.

Priant Dieu, Mons^r le Chancellier, qu’il vous ait en sa garde.

Escript au camp de Hedin le neufviesme jour d’avril aprés Pasques mil cinq cens trente sept.

Françoys.

Bochetel.

Mons^r le Chancelier,

[1.] J’ay sceu par mon cousin le cardinal de Tournon la diligence que Gymbre et Borna, marchans de boulletz, font au parachevement des quinze milliers boulletz qu’ilz doyvent et sont tenuz fournir en ma munition à Lyon, et qu’il leur est besoing fournir jusques à la somme de cinq ou six cens livres sur ce qu’il leur peult ou pourra estre deu. Pareillement led. cardinal m’a escript que les pouldriers de Lyon ne peuent besongner aux pouldres grevees dont leur avoys escript, s’ilz n’ont argent.

[2.] Par quoy j’ai fait depescher deux ordonnances au tresorier Vyon pour, des deniers qu’il a en ses mains pour le payement desd. boulletz et pouldres, fournir comptant assavoir cinq cens livres ausd. marchans et pareille somme de v^c £. t. ausd. pouldriers à Lyon pour fere leurs achaptz de boys, provisions et preparatif, en vous priant, Mons^r le Chancelier, d’advertir mond. cousin le cardinal et pareillement led. Vyon, afin qu’il soit satisfait et donné provision à ce que dessus, vous advisant que j’ai fait expedier ausd. pouldriers une commission pour le recouvrement des boys qui leur sont neccessaires, laquelle aprés l’avoir fait seeller vous l’envoyerez à mond. cousin le cardinal pour la leur fere tenir. Et en ce faisant vous me ferez plaisir et service tres agreable.

Priant Dieu, Mons^r le Chancelier, qu’il vous ayt en sa saincte garde.

Escript au camp pres Hedin le xii^me jour d’avril mil v^c xxxvii.

Françoys.

Bochetel.

Mons^r le Chancellier,

[1.] Je vous escripviz dernierement que je trouvoys bon que l’on baillast l’office de conseiller en ma court de parlement de Paris, vaccant par le trespas de feu maistre Loys Seguyer à maistre Anthonin Royllard, soubz les condicions contenues aux lettres que vous avez auparavant escriptes et fournies touteffoiz qu’il se trouvast suffisant pour exercer led. office.

[2.] Et depuis je m’est souvenu que ma seur la royne de Navarre m’avoit fait prier de vouloir pourveoir d’iceluy office ung nommé Seguyer, nepveu dud. deffunct.

[3.] Et pour ce que je desire gratiffier en cela et toutes autres choses mad. seur, à ceste cause je vous prie et ordonne examiner ou faire examiner led. Seguyer, vous advisant que je veulx et entends que celuy des deux que vous trouverez le plus suffisant soit pourveu d’iceluy office, aux condicions touteffoiz des vi^m £. que vous savez, par quoy vous suyvrez en cela mon intencion. Et m’advertirez lequel des deux vous aurez trouvé le plus capable, affin que je luy en face depescher ses lettres1. Et en ce faisant vous me ferez plaisir.

Priant Dieu, Mons^r le Chancelier, qu’il vous ayt en sa saincte et digne garde.

Escript au camp pres Hedin, le xiii^e jour d’avril mil v^c xxxvii.

Françoys.

Bochetel.

Mons^r le Chancellier,

[1.] Vous entendrez par ce porteur la cause pour laquelle le seigneur de Langey l’a envoyé devers moy et la responce et depesche que je luy ay faicte la dessus, car je luy ay donné charge expresse de vous communicquer le tout. Et pour ce qu’il est necessaire faire rambourser promptement quelque party qui a esté par cy devant emprunctee par led. Langey et Boutières pour l’affaire que vous dira ced. porteur, à ceste cause je vous prie, Mons^r le Chancellier, que vous veuillez incontinant pourveoir et donner ordre à cela et au surplus faire dresser, si desja n’a esté faict, les depesches qui sont necessaires contenues en ung article que vous verrez en son instruction. Et en ce faisant vous me ferez tres singullier plaisir.

Priant Dieu, Mons^r le Chancellier, qu’il vous aye en sa saincte et digne garde.

Escript au camp de Hedin, le xv^me jour d’avril m v^c xxxvii.

Françoys.

Breton.

Mons^r le Chancellier,

[1.] Vous sçavez comme j’ay ordonné à ma fille la royne d’Escosse la somme de trente mil frans de pension pour son estat et entretenement, commancent lad. pension le premier jour de janvier dernier passé. Et pour ce qu’elle m’a faict entendre que avant son embarquement elle desire bien se pourveoir de beaucoup de choses neccessaires, je vous prye à ceste cause, Mons^r le Chancellier, adviser de luy faire presentement et promptement fournir le premier quartier de sad. pension dont les troys mois sont desja passez, sans attendre le temps acoustumé aprés led. terme, vous pryant derechef à ce ne faire faulte car cela pourroit retarder sond. embarquement.

[2.] Vous donnerez ordre aussi de faire mectre quelque argent entre les mains du tresorier Barquyn pour payer la façon de la vaisselle que j’ay donnee à mad. fille.

Priant Dieu, Mons^r le Chancellier, qu’il vous ayt en sa garde.

Escript à Hedyn, le xvii^e jour d’avril m v^c xxxvii.

Françoys.

Mons^r le Chancellier,

[1.] J’ay faict don au s^r de La Pommeraye, mon maistre d’hostel ordinaire, de la somme de douze mil livres tournois à prandre sur les debetz de maistre Jehan Parajau, par cy devant tresorier et receveur general de Bretaigne, moiennant laquelle somme led. Parajau baille et delaisse aud. de La Pommeraye son office de président des Comptes audict Bretaigne en luy fournissant encores la somme de douze cens livres tournois. Et pour ce que je veulx et entends que le don que j’ay faict audict de La Pommeraye de lad. somme de xii^m £ sorte effect, à ceste cause je vous ordonne que vous ayez à seeller l’acquict que je luy ay pour ce faict expedier, sans y faire aucune difficulté car je veulx que ainsi se face.

Priant Dieu Mons^r le chancellier qu’il vous ayt en sa garde.

Escript à Hedyn le xviii^e avril mil v^c xxxvii.

Françoys.

Mons^r le Chancelier,

[1.] Pour ce qu’il a esté depesché une provision pour saisir tous les papiers et autres choses appartenans au feu archediacre d’Angiers, maistre Ravaud Bochetel, qui a eu charge des affaires de la maison de Rohan, laquelle provision, à ce que j’ay entendu, a esté executee et au moyen d'icelle ont tous ses biens meubles esté arrestez, et d’autant, Mons^r le Chancellier, que ses pouvres serviteurs m’ont fait remonstrer qu’ilz n’ont esté payez de leurs sallaires et services, qui est chose qui pour la raison ne doit estre retardee, à ceste cause, je vous prie leur expedier telle provision qu’il appartiendra pour, sur lesd. meubles de leurd. feu maistre, estre payez de ce qui leur est deu de leursd. services.

Priant Dieu, Mons^r le Chancellier, qu’il vous ait en sa sainte garde.

Escript au camp de Monchy le xix^e jour d’avril m v^c xxxvii.

Françoys.

Breton.

Mons^r le Chancellier,

[1.] Je vous envoye le double d’une lettre que Boisrigault escript a mon cousin le grant maistre avecques ung autre double de l’acord qu’il a faict avecques les Grisons suivant lequel, je vous prie, Mons^r le Chancellier, adviser de donner ordre qu’il soit pourveu à l’argent pour ce necessaire et aussi à quelques pensions d’aucuns particuliers dont il envoye le mémoire.

[2.] Au demeurant, Mons^r le Chancellier, pour ce que j’ay certain adviz tant par led. Boisrigault que par autres que le pape s'esforce de faire quelque levee de Souysses qui ne se peult faire que à mon préjudice et dommaige, j’escriptz presentement aud. Boisrigault se haster le plus qu’il pourra d’aller par delà pour, par tous moiens à luy possibles, mectre paine de rompre lad. levee. À ceste cause, je vous prie, Mons^r le Chancellier, regardez qu’il soit envoyé aud. Boisrigault partie de ce qu’il luy fut dernierement ordonné pour les effectz que vous sçavez car c'est chose grandement necessaire.

[3.] Il fauldra aussi mectre paine que ces quictances de Berne soient trouvees, autrement ce sera argent perdu pour moy. Par quoy vous les ferez sercher le plus diligemment que vous pourrez.

Priant Dieu, Mons^r le Chancellier, qu’il vous ait en sa sainte garde.

Escript au camp de Pernes, le xx^e jour d’avril mil v^c xxxvii.

Françoys.

Bochetel.

Mons^r le Chancellier,

[1.] J'envoye presentement Noailles1 par delà, auquel j'ay donné charge vous dire et declarer aucunes choses de par moy, desquelles je vous prie le croyre et dilligemment vous employer à ce que ce qu'il vous dira soit executé. Et vous me ferez service tres agreable en ce faisant.

Priant Dieu, Mons^r le Chancellier, qu’il vous ait en sa saincte garde.

Escript au camp de Pernes, le xxiii^e jour d’avril mil v^c xxxvii.

Françoys.

Bochetel.

Mons^r le Chancellier,

[1.] Au moyen des provisions dernierement expediees, il a esté apporté de Champaigne en ma munition de Paris ung nombre de salpestre. Et pour ce que j'escriptz à Raconis besongner en diligence aux pouldres et qu'il m'a adverty n'avoir argent, je vous prie que par le tresorier Vyon et des deniers qu'il a receuz pour les pouldres et boulletz, luy faictes fournir comptant par vertu de l'ordonnance que luy en ay faict depescher, laquelle vous envoye jusques à quatre cens livres pour achapt de bois, charbon, preparatifz, façon et composition de trente troys miliers trois cens trente trois livres grosses pouldres, qui est le tiers de cent milliers ; et que ce soit incontinant, à ce que led. Raconis ne s'excuse la dessus. Et s'il ne se peult faire de ce costé, pourvoyez-y par le moien du viconte d'Orbec à Paris. Et vous me ferez plaisir et service tres agreable.

Priant Dieu, Mons^r le Chancellier, qu’il vous ait en sa saincte garde.

Escript au camp de Pernes, le xxv^e jour d’avril mil v^c xxxvii.

Françoys.

Bochetel.

Mons^r le Chancellier,

[1.] Vous sçavez l'importance de ma ville de Péronne et le service que ceste annee elle a faict à moy et à tout mon royaume. Et pour ce que je desire la remettre en telle et si bonne fortiffication qu'elle puisse cy aprés demeurer en toute seureté, j'ay advisé par l'advis et deliberation de plusieurs gens de bien que je y ay envoyé pour la visiter qu'il est requis prendre tout autour de la ville par le dedans oultre le rempart jusques à trente piedz de terre tant pour la fortiffication dud. rempart que pour mectre gens en bataille. En quoy faisant, il fauldra abbatre et demolir quelque petite quantité de maisons dont j'ay bien voullu vous advertir à ce que vous faictes depescher commission à quelque bon personnaige pour faire visitation desd. maisons et regarder à la valleur et estre d'icelles, à quoy je vous prye ne faire faulte1. Et vous me ferez service en ce faisant.

Priant Dieu, Mons^r le Chancellier, qu’il vous ait en sa garde.

Escript au camp de Pernes, le xxvii^e jour d’avril mil v^c xxxvii.

Françoys.

Bochetel.

Mons^r le chancellier,

[1.] J’ay icy faict dresser une ordonnance et declaration de mon voulloir sur ce que j’entens que les gens de mes Comptes ayent doresnavant pour leurs espices et droictz de l’audition des comptes des payeurs des compaignies de mes ordonnances, pour et ou lieu des sommes de deniers qu’ilz soulloient prandre et exiger desdits payeurs, ainsi que pourrez veoir par les lettres de lad. ordonnance et declaration, lesquelles je vous prie voulloir incontinant seeller, affin que le contenu soit entretenu gardé et observé, ainsi qu’il est requis pour les causes que savez et entendez. Et vous me ferez plaisir et service tres agreable.

Priant Dieu, Mons^r le Chancellier, qu’il vous ait en sa saincte et digne garde.

Escript au camp de Perne le xxvii^e jour d’avril mil v^c xxxvii.

François.

Breton.

Mons^r le Chancelier,

[1.] Je vous envoye une lettre que j’ay presentement reçue de mon cousin le cardinal de Tournon par laquelle vous verrez de combien il est necessaire pour le bien de mes affaires que Boisrigault se haste d’aller en Suysse et qu’il soit promptement pourveu tant à l'argent qui luy a esté ordonné que à ces deux annees que pretendent leur estre deues ceulx de Berne ou bien que les quictances leur en soient monstrees.

[2.] Et pour ce que cela est chose forcee, je vous prie sur tout le service que faire me desirez, donner ordre qu’il y soit pourveu et satisfaict en la plus grande dilligence que faire ce pourra et pareillement à la partie des Grisons, si fait n’a esté. Et vous me ferez service tres agreable en ce faisant.

Priant Dieu, Mons^r le Chancellier, qu’il vous ait en sa garde.

Escript au camp de Pernes le xxviii^e jour d’avril mil v^c xxxvii.

Françoys.

Breton.

Mons^r le Chancellier,

[1.] Pour autant que je veoy les villes et chasteaulx tant de Hedyn que de Sainct Pol quasy du tout en deffence, lesquelles il est trop plus que requis et necessaire d’advitailler promptement et pourveoir de ce qu’il est besoing pour estre, comme vous sçavez, de l’importance et consequence quelles sont, à ceste cause, Mons^r le Chancellier, j’ay advisé d’envoyer devers vous le s^r de La Bourdaizière, porteur de cestes, pour vous communicquer de cest affaire et quant à ce poinct vous faire entendre mon voulloir et intention et la diligence que je desire que vous faciez et faciez faire de vostre part pour nous servir promptement de vivres pour le faict desdictz advitaillemens. Par quoy je vous prye voulloir croire led. s^r de La Bourdaizière de ce qu’il vous en dira et exposera de ma part, tout ainsi que vous vouldriez faire moy mesmes et faire en cela ainsi que j’ay en vous parfaicte et entiere fiance. En quoy faisant, vous ne me sçauriez faire service plus agreable.

Priant Dieu, Mons^r le Chancellier, qu’il vous ait en sa saincte garde.

Escript au camp de Pernes le xxix^e jour d’avril, l’an mil v^c xxxvii.

Françoys.

Breton.

Mons^r le Chancellier,

[1.] Pour ce que mon cousin le cardinal de Tournon et le s^r de Humieres m’ont dernierement escript qu’il est requis et necessaire, d’autant que je desire la conservacion de mes affaires de Pyemont, qu’il n’y ait faulte à ce que le payement pour le moys de may prochain ne soit envoyé par dela, à ceste cause je vous prie, Mons^r le Chancelier, veoir bien les lettres que led. cardinal m’a escriptes, lesquelles je vous envoye pour cest effect, et vouloir trouver moyen de satisfaire aud. payement et mesmement à ce qu’il fault pour Thurin le plus dilligemment qu’il sera possible. Et ne faillez d’advertir led. cardinal de l’ordre et provision que aurez donnee en cest endroit affin qu’il sache à quoy il se devra arrester.

[2.] Au demourant, Mons^r le Chancelier, pour ce que Honnorat de Quayz, mon ambassadeur en Portugal, m’a dernierement fait savoir qu’il luy est deu dix moys de son estat, sur quoy il n’a receu que cinq cens escuz que luy a, ces jours passez, fait tenir l’ambassadeur du roy dud. Portugal estant par deça, à ceste cause et qu’il est bien necessaire de le secourir de quelque argent, je vous prie faire incontinant mectre es mains dud. ambassadeur de Portugal jusques à la somme de six cens escuz pour icelle faire delivrer aud. Honnorat de Caiz, affin qu’il s’en puisse ayder en actendant plus grosse somme. Et en ce faisant, vous me ferez plaisir.

Priant Dieu, Mons^r le Chancellier, qu’il vous ayt en sa saincte et digne garde.

Escript au camp de Perne le xxix^e jour d’avril mil v^c xxxvii.

Françoys.

Breton.

Mons^r le Chancelier,

[1.] Pour autant que Mons^r le cardinal de Carpy a prins congié de moy pour se retirer a Romme et que je desire qu’il luy soit fait ung present de vaisselle jusques a la valleur de quinze cens escus, à ceste cause je vous prie que incontinant vous escripviez à Paris soit au viconte Le Tirant ou autre que adviserez, à ce qu’il achapte de lad. vaisselle vermeille doree ou autre de belle façon, jusques à la somme dessusd., et qu’il la mecte es mains du s^r de Villeroy auquel, suyvant ce que je luy escriptz ainsi que verrez, arrivé que soit led. cardinal aud. Paris, il la luy presentera de ma part. Et advertissez led. s^r de Villeroy de l’ordre que vous aurez donnee quant à ce point et luy faictes tenir la lettre a luy adressant. Et vous me ferez plaisir.

Priant Dieu, Mons^r le Chancelier, qu’il vous ayt en sa saincte et digne garde.

Escript au camp de Pernes le dernier jour d’avril mil v^c xxxvii.

Françoys.

Breton.

Mons^r le Chancellier,

[2] J’ay veu les lettres que vous m’avez escriptes par ce porteur et entendu par icelles l’ordre qu’avez donné, tant sur ce que je vous avoys escript touchant Boisrigault, le paiement des Suisses que autres poincts mentionnez en vosd. lettres dont j’ay esté tres aise.

[3] J’ay semblablement veu le memoyre par vous dressé pour la depesche du secretaire du duc de Gueldres, lequel j’ay trouvé tres bon et me semble que vous n’y avez rien obmys. Je vous renvoye ledict memoire et pareillement toutes les autres pieces que vous m’avez envoyees, vous priant depescher incontinant led. secretaire et luy faire bailler deux cens escuz pour faire son voiage.

[4] Et au reste, si le cardinal de Carpy vous faict bailler ung pacquet pour Lyon, donnez ordre de le faire courir audict Lyon par mes postes. Et vous me ferez plaisir.

Mons^r le Chancellier,

[1.] J’envoye Lavau mon varlet de chambre porteur de cestes par delà pour les causes que par luy entendrez dont il vous prie le croire. Et vous me ferez plaisir.

Priant Dieu, Mons^r le Chancellier, qu’il vous ayt en sa garde.

Escript du camp de La Conté le iiii^e jour de may mil v^c xxxvii.

Françoys.

Breton.

Mons^r le Chancellier,

[1.] Le conte de Carmaing m'a supplyé voulloir evocquer en mon Grant Conseil ou en quelqu'une de mes courtz de parlement autre que celle de Bordeaulx ung proces qu'il a pendant ou parlement dud. Bordeaulx pour les causes de recusacion contenues en une requeste qu'il m'a presentee. Et pour ce que je desire qu'il soit traicté en toute bonne et briefve justice en faveur des bons et agreables services qu'il m'a cy devant faictz au faict de mes guerres et faict chacun jour en l'armee ou je suis presentement en personne, à ceste cause, Mons^r le Chancellier, je vous envoye lad. requeste, laquelle vous prye veoir et sur icelle luy faire pourveoir de ce que verrez qu'il se debvra faire par raison.

Priant Dieu, Mons^r le Chancellier, qu’il vous ayt en sa garde.

Escript du camp de La Conté le iiii^e jour de may mil v^c xxxvii.

Françoys.

Breton.

Mons^r le Chancellier,

[1.] J’ay esté adverty que quelque poursuicte que ayt jusques icy sceu faire mon cousin le cardinal Du Bellay de faire vuyder en mon Grand Conseil le proces qu’il y a pendant pour raison de la provision de l’abbaie de Saint Vincent du Mans1, ce neantmoins ses parties adverses ont trouvé et treuvent journellement tant de nouveaulx incidens que, combien que vous soyez mis en vostre plain devoir pour accellerer à l’expedition dud. proces, il n’en a peu avoir la fin, ce qu’ilz font pour acrocher le principal et cuyder esgarer la matiere. Et font cependant à Romme plusieurs poursuictes et menees, serchans tous les moyens qui leur sont possibles pour cuyder corrumpre mes privilleges touchans ceste matiere et tirant tousjours en longueur et dissimulation led. proces soubz umbre desd. incidens qui devroient estre joinctz au principal. À ceste cause, Mons^r le Chancellier, je vous prie tenir main et avoir l’œil à ce que, joinctz lesd. incidens audit principal, il soit de plus promptement et dilligemment que faire se pourra en toute justice procedé à la vuydange et decision dudit proces, ouquel nous avons tel interest que vous sçavez. Et vous me ferez service tres agreable en ce faisant.

Priant Dieu, Mons^r le Chancellier, qu’il vous ayt en sa garde.

Escript au camp de Contay le vi^e jour de may m v^c xxxvii.

Françoys.

Bochetel.

Mons^r le Chancellier,

[1.] Aiant esté adverty de la vacation de l'office de contrerolleur general de ma gabelle et mesurage establyz à Ingrande de tout le sel montant contremont la riviere de Loire et autre fleuves descendant en icelle par le trespas de feu Victor Lancelot1 et saichant qu'il est bien requis y pourveoir de quelque bon personnage et de bonne loyaulté, preudommie et experience, à ceste cause et aussi en consideration et faveur des bons et agreables services que m'a par ci devant faictz et faict encores chacun jour Anne de Rennes dict Michellet, mon premier huissier de chambre, je luy ay faict don dudict office et faict expedier ses lettres, comme verrez par icelles, lesquelles vous ne ferez aucune difficulté de luy seeller. Car c'est chose que je veulx et entends estre faicte et led. don sortir effect.

Et sur ce pointct prye Dieu, Mons^r le Chancellier, qu’il vous ayt en sa saincte garde.

Escript au camp de La Conté le vii^e jour de may mil v^c xxxvii.

Françoys.

Mons^r le Chancellier,

[1.] J’ay receu la lettre du vi^me de ce moys que m'avez escripte par Lavau par laquelle me faictes entendre la cause dont est provenue ceste discontinuation de vivres, à quoy je seray tres aise que cy aprés il ne puisse plus intervenir de faulte, vous advisant, Mons^r le Chancellier, que ce m'a esté aussi tres grant plaisir d'entendre que ayez pourveu à l'advitaillement de Hesdyn et de Sainct Pol et que dedans jeudy ou vendredy le tout sera fourny1. Toutesfoiz, Mons^r le Chancellier, pour ce que cest affaire est de l'importance que povez assez considerer et qu'il fault que l'effect s'en ensuyve tel que la parolle, je vous prie, Mons^r le Chancellier, sur tout le service que faire me desirer, haster et dilligenter cela de telle sorte que j'en veoye led. effect car jusques là je vous advise que je ne pourroye estre en repoz.

[2.] Dilligentez principallement l'advitaillement de Sainct Pol car c'est le plus necessaire.

Priant Dieu, Mons^r le Chancellier, qu’il vous ait en sa saincte garde.

Escript au camp Sainct Martin2 le vii^e jour de may mil v^c xxxvii.

Françoys.

Bochetel.

Mons^r le Chancellier,

[1.] Pour ce que j'ay depesché le conte de La Myrandolle pour s'en retourner chez luy et qu'il ne reste plus que à luy faire bailler argent, à ceste cause je vous prie et ordonne que incontinant vous luy faciez bailler et delivrer comptant, sans le remectre à Venise, pour ce qu'il a necessairement affaire d'argent icy, la partie qui luy est deue de reste, montant deux mil livres dix solz, et oultre cela, la somme de troys mil livres dont je luy ay faict don pour aucunement le recompenser des fraiz et dommaiges qu'il a soustenuz et supportez par cy devant au moyen de la guerre. Et aprés l'on en expediera l'acquict en vertu de la presente que j'ay pour ce signee de ma main pour servir à la reddition des comptes de celluy de mes officiers comptables que besoing sera. Et en ce faisant vous me ferez service tres agreable, vous priant ne voulloir fere faulte à ce que dessus affin que ledict conte ne puisse aucunement retarder son partement.

Priant Dieu, Mons^r le Chancellier, qu'il vous ait en sa saincte et digne garde.

Escript à Chasteauthierry1 le xxix^e jour de may mil cinq cent trente sept.

Françoys.

Mons^r le Chancelier,

[1.] Le seigneur de Langey m'a faict entendre que, de plusieurs dons que je luy ay par ci devant faictz, il a faict si bonne poursuicte que les choses en sont quasy venues du tout a lumiere, tellement que dedans peu de jours s'en pourra tyrer une bonne grosse somme de denyers et dedans quelque temps aprés une autre meilleure, lesquelz dons il m'a remys en mes mains et s'en est desisté affin que de ce qui en proviendra je m'en puisse aider et subvenyr a mes urgens et pressez affaires. À ceste cause vous entendrez de luy les moiens de tirer le prouffict desd. choses et prandrez les pieces, instructions et memoires qu'il vous en baillera, dont vous aurez souvenance à ce que, s'il en sort quelque bien, je puisse donner ordre par cy aprés de l'en recompenser ainsi que la raison le veult.

Priant Dieu, Mons^r le Chancelier, qui vous aict en sa saincte garde.

Escript à Fontainebleau le premier jour de juillet mil v^c xxxvii.

Françoys.

Breton.

Mess^rs,

[1.] J'ay tout à ceste heure receu la lectre que vous m'avez escripte du jour d'hier et par icelle entendu la bonne et grande diligence que vous faictes pour recouvrer deniers dont avez desja faict fond jusques à six vingts mil livres, desquelz avez faict partir une portion pour envoyer a mon filz1, chose que j'ay eu tres grant plaisir d'entendre. Et vous prie, sur tout le service que vous me desirez jamais faire, que vous faciez la plus grande et extreme diligence qu'il vous sera possible de mectre à execution la charge que je vous ay donnee. Et vous ferez chose qui me sera tres agreable.

Priant Dieu, Mess^rs, qu'il vous ayt en sa saincte et digne garde.

Escript à Fontainebleau le iii^e juillet mil v^c xxxviii.

Françoys.

Breton.

Mons^r le chancellier,

[1.] Vous aurez entendu par le commissaire Bourran qui est dernierement venu de Pyemont, lequel je depeschay hier pour aller devers vous, en quelz termes et disposicion sont mes affaires de ce cousté là et de combien il est requis et neccessaire d'y envoyer argent, qui ne vouldra veoir tumber mesd. affaires en totalle ruyne.

[2.] J'ay depuis receu une lettre de mon cousin le cardinal de Tournon, laquelle je vous envoye affin qu'en entendiez le contenu, vous priant, Mons^r le Chancellier, sur tout le service que vous me desirez jamays faire, adviser de secourir promptement d'argent led. cardinal et l'advertir ordinairement par mes postes de l'ordre et provision que y aurez donnee. Et oultre cela luy escripre le chemyn et moyen que vous tenez par delà pour recouvrer deniers affin que, s'il ne s'est jusques icy aydé dud. moyen, qu'il le puisse faire, combien que je pense estre tout asseuré qu'il n'aura failly d'avoir fait en en cest endroit tout ce qu'il aura peu.

[3.] Et ne faillez de m'escripre ce que aurez fait touchant ce que dessus. Et vous me ferez tres grant plaisir.

Priant Dieu, Mons^r le Chancellier, qu'il vous ayt en sa tres saincte et digne garde.

Escript à Fontainebleau le quatreiesme jour de juillet mil v^c xxxvii.

Françoys.

Breton.

Mons^r le Chancellier,

[1.] Pour ce que j’ay ordonné au s^r de La Fayette1 s’en aller présentement en Pyemont pour mon service avec sa compaignye et qu’il sera contrainct, estant là, de faire de la despense, à ceste cause je vous prye et ordonne veoir ce qu’il luy est deu de sa pension pour l’en faire payer ou luy en faire bailler une partie en l’assignant du reste affin qu’il puisse partir pour faire sond. voyaige. Et en ce faisant, vous me ferez plaisir.

Priant Dieu, Mons^r le Chancellier, qu’il vous ayt en sa saincte et digne garde.

Escript à Fontainebleau, le v^me jour de juillet mil v^c xxxvii.

Françoys.

Breton.

Mons^r le Chancellier,

[1.] Depuis le partement de Bochetel pour aller devers vous, j’ay receu une autre depesche de Boysrigault, laquelle je vous envoye1 affin que vous en entendiez le contenu et que tout par ung mesme moyen vous advisez de faire et dresser la responce tant sur lad. presente depesche que sur celle que vous a portée led. Bochetel. Vous verrez des poinctz que touche led. Boysrigault, sur quoy il est bien besoing de regarder à luy bien satisfaire. Et pour ce, je vous prie y bien penser et avoir l’œil. led. Bochetel vous pourra faire souvenir des depesches qui ont esté par cy devant faictes qui vous aydera à ce que dessus.

[2.] Au demourant, Mons^r le Chancelier, à ce que vous entendez de plus en plus de combien il est requis et neccessaire secourir promptement le s^r de Humieres d’argent, qui ne vouldra veoir tumber mon affaire de delà en totalle ruyne, je vous envoye des lettres que j’ay ce jourd’huy receues de luy, lesquelles vous verrez sans les communicquer à autre à cause du dernier article qui est en icelles.

[3.] Je vous envoye pareillement une lettre que j’ay receue du cardinal de Tournon, par laquelle aussi vous sçaurez comme il a faict fournir à Venise la somme de dix mil escuz dont il luy a esté par cy devant escript par messire Lyvio. Et qu’il ne fault pas qu’il y ait faulte que lad. partie ne soit remboursee au temps qui a esté par luy promis et accordé, vous priant y donner si bon ordre et provision que par faulte de cela l’on ne puisse perdre le credit.

[4.] Et me renvoyez incontinant lesd. deux lettres desdits s^rs cardinal et de Humieres, et m’advertissez de l’ordre que vous aurez donnee ou esperer donner à ce que je vous escriptz affin que je leur puisse faire faire responce. En quoy faisant vous me ferez plaisir et service tres agreable.

Priant Dieu, Mons^r le Chancellier, qu’il vous ayt en sa saincte et digne garde.

Escript à Chailly, le vii^me jour de juillet mil v^c xxxvii.

Françoys.

Breton.

Mons^r le Chancellier,

[1.] Je vous prye et ordonne que, incontinant la presente receue, vous faictes fournir au tresorier et commis au payement de mon bastiment de Fontainebleau, present porteur, la somme de deux mil livres tournois en actendant que l’on puisse recouvrer deniers du greffe d’Orléans que j’ay ordonnez et assignez pour le faict dud. bastiment, lequel je veulx estre continué en la meilleure dilligence que faire se pourra. Et, lesd. deniers dudit greffe receuz, l’on se remboursera de lad. somme de ii^m £ que vous baillerez presentement ainsi que je vous escriptz cy-dessus. Mays je vous prye encores une foys n’y voulloir faire faulte. Et vous me ferez service tres agreable.

Priant Dieu, Mons^r le Chancellier, qu’il vous ayt en sa saincte garde.

Escript à Ablon le xi^me jour de juillet mil v^c xxxvii.

Françoys.

Mons^r le Chancellier,

[1.] Vous sçavez le propoz que je vous ay par cy devant tenu touchant l’affaire de Emanuel Riccio, porteur de cestes. Et pour ce que j’ay entendu qu’il n’est point encores depesché et que je veulx en toutes façons que tout ce qui luy a esté par cy devant prins et osté et pareillement ce qu’on luy a faict payer, contre le sauf conduict qu’il avoit de moy1, luy soit entierement rendu et restitué. À ceste cause, je vous prye et ordonne parler de cest affaire à mon cousin le cardinal de Bourbon, affin qu’il donne promptement ordre que mon vouloir et intencion soyt en cest endroict de poinct en poinct ensuivy, car j’ay trouvé et trouve merveilleusement estrange que, contre mond. sauf conduict et parolle, l’on ay faict ung tel tour aud. Riccio, vous pryant encores une foiz me faire entendre ce qui aura esté faict en ce que je vous escriptz. Et vous me ferez plaisir.

Priant Dieu, Mons^r le Chancellier, qu’il vous ayt en sa sainte garde.

Escript à Meudon le xvi^me jour de juillet mil vc xxxvii.

Françoys.

Breton.

Mons^r le Chancellier,

[1.] J'ay donné charge au general Bayard, porteur de cestes, de vous dire aucunes choses de ma part touchant le fait des gens de guerre, tant de cheval que de pyed que j'ay ordonné estre mis dedans aucunes places de mon pays de Champaigne pour la seuretté et conservacion de la frontiere de ce cousté là dont vous le croyrez comme moy mesmes. Et vous me ferez plaisir.

Pryant Dieu, Mons^r le Chancellier, qu'il vous ayt en sa saincte et digne garde.

Escript à Meudon le xvii^me jour de juillet mil v^c xxxvii.

Françoys.

Breton.

Mons^r le Chancellier,

[1.] Il est venu icy devers moy troys compaignons allemans, lesquelz m'ont esté addressez par le s^r des Essarts du pays de Normandie, qui ont puis nagueres trouvé et descouvert certaines mynes qu'ilz estiment et treuvent pour certain qui se trouveront merveilleusement bonnes et de grand proffict. Et pour ce que je ne me trouve pas à propoz pour parler à eulx, à ceste cause j'ay advisé de les vous envoyer avecques led. s^r des Essarts affin qu'ilz vous facent entendre bien au long et par le menu l'affaire dont il est question, vous priant aprés les avoir entenduz adviser à leur faire telle et si bonne depesche qu'ilz s'en puissent incontinant retourner pour besongner au faict desdictes mynes1. Et vous me ferez plaisir.

Priant Dieu, Mons^r le Chancellier, qu'il vous ayt en sa garde.

Escript à Meudon le xix^e jour de juillet mil v^c xxxvii.

Françoys.

Breton.

Mons^r le Chancellier,

[1.] Mes cousins les cardinal de Lorraine et l'arcevesque de Milan m'ont faict entendre la difficulté que vous avez faict de seeller les lectres patentes qui ont esté expedyees sur le brief du pape touchant l'arcevesché de Lyon1 pour les causes et raisons que avez escriptes à Villandry.

[2.] Et affin que vous saichez mon voulloir et intention quant à ce poinct, entendez que led. brief qui a esté depesché en faveur de mond. cousin le cardinal de Lorraine n'est que pour saulver les fruictz dudict arcevesché à icelluy arcevesque de Milan, desquelz fruictz en toutes façons je veulx et entends qu'il joysse en actendant qu'il ayt sa depesche de Rome, par quoy je vous prye, Mons^r le Chancellier, que si vous voyez que l'expedition faicte sur led. brief ne soit bonne ne raisonnable pour cest effect, que vous advisez quelque autre forme affin que icelluy arcevesque de Milan puisse joyr dudict arcevesché et s'il vous semble bon de depescher lesd. lectres patentes qui sont attachees audict brief, à la charge que dedans tel temps, que vous limiterez, l'on sera tenu de fournir les bulles et provisions deuement expediees d'icelluy arcevesché, faire le pourrez car, comme je vous dis cy dessus, je veulx quelque chose qu'il y ayt que led. arcevesque joysse desd. fruictz, par quoy vous en arresterez la depesche le plus tost que vous pourrez.

Priant Dieu, Mons^r le Chancellier, qu'il vous ayt en sa tres saincte et digne garde.

Escript à Meudon le vingtiesme jour de juillet mil v^c xxxvii.

Françoys.

Breton.

Mons^r le Chancellier,

[1.] Je vous envoye l'extraict d'une lettre que j'ay receue de mon cousin le grant maistre faisant mention du faict de la fonte d'artillerye que j'ay par cy devant ordonnee estre faicte en ma ville de Paris et vous envoye aussi une lettre que le commissaire de mon artillerye Tanneguy luy avoir escripte qu'il m'a renvoyee affin que vous veoyez et entendez le contenu de tout et pour autant que l'astellier de Paris est de present occuppé comme entendrez par led. Tanneguy porteur de cestes et que pour cela je ne veulx qu'il differe à besongner au faict de lad. fonte.

[2.] À ceste cause, je me suys arresté pour le mieulx qu'il aille besongner à Rouen en l'astellier dont sad. lettre faict mention, vous priant, Mons^r le Chancellier, savoir et entendre de luy quel argent sera necessaire pour le faict d'icelle fonte, quel nombre et quantité de metail il a et pourra avoir tant en vielles pieces d'artillerie rompues ou esvantees, reste de la derniere fonte que aussi de ce que doyvent ceulx de ma ville de Paris et quel nombre de nouvelles pieces il pourra faire de tout cela. Et selon l'ouvraige qu'il pourra faire, vous ferez delivrer argent tant pour ses façons que pour avoir du boys d'orme pour le remontage desd. pieces. Et vous me ferez plaisir.

Priant Dieu, Mons^r le Chancellier, qu'il vous ayt en sa saincte garde.

Escript à Meudon le xx^e jour de juillet mil v^c xxxvii.

Françoys.

Breton.

Mons^r le Chancellier,

[1.] La presente sera pour vous advertir que je ne veulx ne entends que vous seellez ne expediez les lectres d'office d'accesseur au siege de Chinon nouvellement cree et erigé sinon au nom de tel personnage suffisant qui par Burgensis, mon conseiller et premier medecyn, vous sera nommé et presenté, et en fournissant la somme à quoy led. office a esté taxé en mon conseil. Par quoy vous suyvrez en cela mon vouloir et intention.

Priant Dieu, Mons^r le Chancellier, qu'il vous ayt en sa garde.

Escript à Meudon le xix^e jour de juillet mil v^c xxxvii.

Françoys.

Breton.

Mons^r le Chancellier,

[1.] J'ay faict depescher Geys1 ainsi que vous verrez car je luy ay donné charge de vous communicquer sa depesche. Il faut surtout que vous advisez de pourveoir et donner ordre d'envoyer quelque argent du costé de Pyemont pour besogner au faict des fortiffications et reparations dont mencion est faicte aux instructions dud. Geys, vous priant pourveoir promptement à cela et l'advertir de l'ordre qu'y aurez donnee ou faictes compte de donner, affin qu'il en puisse donner advis au s^r de Humyeres à son arrivee devers luy. En quoy faisant vous me ferez plaisir et service tres agreable.

Priant Dieu, Mons^r le Chancellier, qu'il vous ayt en sa saincte et digne garde.

Escript à Meudon le xxiii^e jour de juillet mil v^c xxxvii.

Françoys.

Breton.

Mons^r le Chancellier,

[1.] J'ay commandé à Villeroy, porteur de cestes, s'en aller à Paris pour distribuer aux pauvres, ainsi que je luy ay ordonné, la somme de douze cens livres tournois, laquelle je vous prye luy faire incontinant bailler et delivrer ou à celluy qu'il vous nommera et aprés l'on en fera depescher l'acquict tel qu'il sera necessaire. Et en ce faisant vous me ferez plaisir.

Priant Dieu, Mons^r le Chancellier, qu'il vous ayt en sa saincte garde.

Escript à Meudon le xxiiii^e jour de juillet mil v^c xxxvii.

Françoys.

Breton.

Mons^r le Chancellier,

[1.] Pour ce que j'envoye presentement mon cousin le marechal d'Aubigny devers mon filz en Picardie pour là s'essayer à me faire service, ce que je suys tout certain qu'il sçaura tres bien et saigement faire, estant tout asseuré qu'il sera contrainct de faire de la despence, à ceste cause je vous prye, Mons^r le Chancellier, luy faire bailler et delivrer sur ce qui luy est deu à cause de sa pension, telle somme de deniers que vous adviserez pour le mieulx, à ce qu'il puisse faire promptement le voyaige dessud.. Et vous me ferez plaisir.

Priant Dieu, Mons^r le Chancellier, qu'il vous ayt en sa saincte et digne garde.

Escript à Meudon le xxiiii^e jour de juillet mil v^c xxxvii.

Françoys.

Breton.

Mons^r le Chancellier,

[1.] Pour ce que j'envoye le s^r de Nançay, l'un des capitaines de mes gardes, porteur de cestes, avecques sa bende et celle du seneschal d'Agenoys devers mon filz le daulphin en Picardie pour mon service et qu'il seroit bien difficile que ceulx desdictes bendes peussent vivre ne tenir ordre ne police sans qu'il leur soit baillé promptement quelque argent, à ceste cause je vous prie, Mons^r le Chancellier, adviser, actendu le long temps qu'il y a qu'ilz ne furent paiez, de les faire secourir de quelque somme de deniers, soit sur et en deduction de ce qui leur est deu, par maniere de prest ou autrement ainsi que adviserez pour le mieulx et les en faire depescher tout incontinant affin qu'ilz puissent partir dés demain pour faire leur voyaige.

[2.] Et donnez aussi ordre d'en faire bailler aud. s^r de Nançay sur ce qui luy est deu de sa pension, à ce qu'il ayt meilleur moyen de satisfaire à la despence qu'il sera contrainct de faire. Et vous me ferez plaisir et service tres agreable.

Priant Dieu, Mons^r le Chancellier, qu'il vous ayt en sa saincte et digne garde.

Escript à Meudon le xxiiii^e jour de juillet mil v^c xxxvii.

Françoys.

Breton.

Mons^r le Chancellier,

[1.] Je veulx et vous ordonne que promptement vous faictes fournir, bailler et delivrer comptant soit sur mes finances ordinaires ou extraordinaires ainsy que vous adviserez pour le myeulx à Emanuel Riccio1, porteur de cestes, la somme de troys cens escuz soleil en ensuivant la promesse que je luy ay faicte sur et en deduction de la somme de dix neuf cens vingt sept escuz soleil, à quoy j'ay moy mesmes accordé ce prix et marché avec luy pour certaines bagues que j'ay prinses de luy.

[2.] Et quant au paiement du reste de lad. somme de xix^c xxvii ▽, je luy ay pour ce accordé et octroyé le second office de l'un de mes notaires et secretaires soit boursier ou gaiger qui par cy aprés viendra à vacquer, le premier desquelz escheant vaccant a ja par moy esté promis à autre personnaige, comme vous sçavez. Toutesfoys si led. office second vaccant est boursier, led. Riccio sera tenu me rendre et restituer lad. somme de iii^c £ pour le supleement de la valleur d'icelluy office, ainsi que le tout pourrez veoir par les lectres de certiffication et promesse que je luy en ay signees de ma main selon lesquelles vous vous conduirez.

[3.] Et ne fauldrez de luy faire prompte delivrance d'icelle somme sans le remectre à aucune longueur et sans ce qu'il ayt plus occasion de retourner devers moy pour cest effect. Et au surplus lad. vaccation advenue dud. office de secretaire, vous aurez l'œil à ce que par inadvertance, importunité ou autrement autre personnaige que celluy que led. Riccio nommera et auquel il en disposera n'en soit pourveu. Car je veulx et entens que ainsi ce face.

Priant Dieu, Mons^r le Chancellier, qu'il vous ayt en sa saincte et digne garde.

Escript à Meudon le xxviii^e jour de juillet mil v^c xxxvii.

Françoys.2

Breton.

Mons^r le Chancellier,

[1.] Vous savez que je vous ay ordonné que Laguette soict remis en son office, par quoy depeschez le incontinent la presente veue car je m'en veulx servir ailleurs. Et ne luy demandez aucun prest pour le present, estant asseuré que faisant sond. office, il aura beaucoup meilleur moyen et credit pour ce faire et que lors il n'espargnera ne sa personne ne ses biens pour mon service.

Et à Dieu, Mons^r le Chancellier, qui vous ayt en sa garde.

Escript à Nemour le viii^e jour de septembre m v^c xxxvii.

[2] Ne faillez à vous en venir à Chastillon, comme je vous ay ce matin escript et à depescher led. Laguette car je le veulx incontinant envoyer en poste à Lyon avecques Velly.

Françoys1.

Breton.

Mons^r le Chancellier,

[1.] Faictes veoir ce qu'il est deu à Sainct Jullien1 et le luy faictes payer promptement affin qu'il puisse aller executer la charge que luy baillera mon filz le daulphin. Qui sera la fin.

Priant Dieu, Mons^r le Chancellier, qu'il vous ayt en sa garde.

Escript à Chavagnes le xxv^e jour de septembre l'an mil v^c xxxvii.

Françoys.

Breton.

Mons^r le Chancellier,

[1.] J'ay entendu que aprés le trespas du feu evesque de Beziers derrenier decedé, le seneschal de Thoulouze, lieutenant de mon cousin le grand maistre en Languedoc, saichant que le frere dud. evesque et son seul heritier est de present au service de l'empereur et tenant son party et pour la conservation de mon droict ou de celluy à qui il appartient, faict saisir et mectre en ma main tous et chacuns les biens meubles que led. evesque a delaissez par son trespas oud. pais de Languedoc1 et iceulx faict mectre et bailler en garde de gens suffisans, entre lesquelz biens s'est trouvé, ainsi que j'ay esté adverty, une somme de trois mil trois cens dix livres quatre solz quatre deniers tournois de deniers clers qu'il a faict mectre en garde es mains d'un nommé Pierre Plantevyt, s^r de Villenouette2.

[2.] Et pour ce, Mons^r le Chancellier, que vous sçavez assez que les affaires que j'ay de present requierent que je m'ayde de tout ce qu'il me peult appartenir, à ceste cause je vous prie adviser de depescher toutes les provisions qui seront necessaires pour faire venir lesd. biens à mon prouffict et iceulx faire apporter par devers vous le plus tost que faire ce pourra ensemble lad. somme et m'advertir quant le tout sera venu, pour, aprés avoir aussi entendu de vous si lesd. biens me peu[v]ent appartenir, vous ordonner ce que je veulx en estre faict. Et vous me ferez service très agreable en ce faisant.

Priant Dieu, Mons^r le Chancellier, qu'il vous ayt en sa garde.

Escript à Sillan le xvi^e jour d'octobre m v^c xxxvii.

Françoys.

Bochetel.

Mons^r le Chancellier,

[1.] M^e Guillaume Millet, mon conseiller et medecin ordinaire, m'a faict entendre qu'il y a ung sien parent qui luy a escript paier et fournir ce que le quart denier de la resignation de l'office d'esleu de Meaulx que faict me Philippes Bataille1 au prouffict de m^e Robert Bataille2 pourra monter.

[2.] Et pour ce qu'il m'a remonstré que de present il n'a argent pour y satisfaire, me suppliant voulloir faire desduire led. quart sur ce qui luy est et pourra cy aprés estre deu de ses gaiges et estat qu'il a en ma maison, ce que je luy ay accordé, je vous prie, Mons^r le Chancellier, que en faisant prendre par le tresorier et receveur general de mes parties casuelles promesse et seureté dudict Millet de luy paier des premiers deniers qu'il recevra de sond. estat tant du passé que de l'advenir, ce à quoy poura monter led. quart dudict office, vous luy faictes ou à celluy qu'il envoyera par delà delivrer les lectres dud. office d'esleu sans y faire aucune difficulté.

Priant Dieu, Mons^r le Chancellier, qu'il vous ayt en sa garde.

Escript à Sillant le xviii^e jour d'octobre m v^c xxxvii.

Françoys.

Bochetel.

Mons^r le Chancellier,

[1.] Pour ce que j'ay entendu que mon cousin le s^r de Ruffey, chevalier de mon ordre, a certains proces pendans en mon Grant Conseil à l'encontre du conte de Varax et que je desire qu'ilz preignent prompte fin et yssue, à ceste cause, je vous prie, Mons^r le Chancellier, tenir main qu'il soit proceddé à la vuidange d'iceulx en la meilleure et plus briefve expedition de justice que faire se pourra. Et vous me ferez service en ce faisant.

Priant Dieu, Mons^r le Chancellier, qu'il vous ayt en sa garde.

Escript à Sillant le xviii^e jour d'octobre m v^c xxxvii.

Françoys.

Bochetel.

Mons^r le Chancellier,

[1.] J'ay, à la requeste du s^r de Lasseigne, gentilhomme de ma venerie, permis et octroié à Jehan Selvancy1, marchant demourant à Paris, de pouvoir tirer et enlever de la ville d'Arras d'aucuns marchans de lad. ville qui luy sont debiteurs de quelques grosses sommes de deniers jusques au nombre de six cens pieces de sarges2 que lesd. marchans luy baillent en paiement pour les amener en mon royaume affin d'en faire son prouffit selon et ainsi que avez peu veoir et entendre par les lectres patentes que je luy en ay faict expedier, lesquelles je veulx en faveur dud. Lasseigne et pour la requeste qu'il m'en a faicte avoir lieu et sortir leur effect, par quoy vous ne fauldrez de les seeller sans ce qu'il soit plus de besoing vous en escripre.

Priant Dieu, Mons^r le Chancellier, qu'il vous ait en sa garde.

Escript à Vigille le xxvi^e jour d'octobre m v^c xxxvii.

Françoys.

Mons^r le Chancellier,

[1.] J'ay veu la responce que vous me faictes aux lectres que je vous escripviz ces jours passez touchant l'expedition de certaine lettre de permission que demendent aucuns marchans d'Arras de pouvoir apporter en mon royaume six cens pieces de serges dont Lasseigne, gentilhomme de ma vennerie, m'avoit faict requeste, et entendu les remonstrances que vous me faictes par votre lectre quant à ce poinct, lesquelles je trouve très justes et raisonnables. Et à ceste cause, je ne veulx ne entends que vous seellez ladicte permission, qui est tout ce que je vous diray quant à ce poinct.

Priant Dieu, Mons^r le Chancellier, qu'il vous ayt en sa saincte et digne garde.

Escript à Briançon le ve jour de novembre mil v^c xxxvii.

Françoys.

Breton.

Mons^r le Chancellier,

[1.] En faveur, consideracion et recongnoissance des bons et très recommandables services que le s^r de Villandry m'a dès longtemps faictz comme il fait encores ordinairement par chacun jour ainsi que sçavez et entendez très bien, j'ay accordé la resignation qu'il fait à son filz2 de ses offices de general de Bloys et de secretaire au nombre des bourses soubz les condicions de survivance et autres que plus amplement verrez par les deux lectres de provision qui en ont esté dressees, lesquelles je vous prye et ordonne, Mons^r le Chancellier, ne faire aucune difficulté de seeller et expedier. Car je veulx que ainsi se face, sans ce que led. s^r de Villandry soyt tenu payer aucune chose pour le tiers desd. survivances, duquel tiers je luy ay faict don.

Pryant Dieu, Mons^r le Chancellier, qu'il vous ait en sa saincte et digne garde.

Escript à Briançon le cinquiesme jour de novembre mil v^c xxxvii.

Françoys.

Bochetel.

Mess^rs,

[1.] Mon cousin le conte Guido Rangon m'a faict entendre par son homme qui est icy resident aupres de moy comme il luy est encores deu, à cause de la pension qu'il a de moy montant dix mil livres par an, la somme de deux mil cinq cens et tant de livres pour une annee escheue dès le moys d'aoust derrenier, me suppliant luy vouloir faire payer ladicte partie à ce qu'il s'en puisse ayder à supporter les fraiz et despences qu'il est contrainct de faire ou lieu où il est.

[2.] Et pour autant que je desire bien subvenir audict conte tant en cest androict que autres ses affaires en faveur des services qu'il m'a faictz et faict chacun jour, à ceste cause je vous prye, Mess^rs, vouloir faire fournir lad. partie dont cy dessus est faicte mention ès mains de messe Raphael Coursin qui vous presentera la presente en prenant la quictance dud. conte de luy, auquel à ce que j'entens il a desja advancé lad. partye.

[3.] Au demourant, Mess^rs, j'ay aussi par cy devant accordé, au mesmes temps que j'acceptay de rechief en mon service mond. cousin le conte Guido Rangon, au cappitaine Nicolo de Plombin qui fut lors envoyé devers moy par ledict conte la somme de iiii^c £ de pension par an, dont une annee est seullement escheue dès led. moys d'aoust derrenier. Et pour ce que ledict conte m'a faict entendre que icelluy cappitaine Nicolo est de present prisonnier ès mains des Florentins, me suppliant vouloir estre content de ly faire payer sad. pension pour l'aider à délivrer et mectre en liberté, à ceste cause je vous prye aussi faire fournir lad. partye de iiii^c £ à celluy qui vous fournira de la quictance dud. de Plombin et ne faillez de advertir l'evesque de Rodetz de ce que vous aurez faict touchant ce que je vous escriptz affin qu'il le face entendre aud.1 conte. Et vous me ferez plaisir.

Priant Dieu, Mess^rs, qu'il vous ait en sa saincte et digne garde.

Escript à Briançon le xi^me jour de novembre mil v^c xxxvii.

Françoys.

Breton.

Mons^r le Chancellier,

[1.] J'ay veu par votre lettre du viii^e de ce moys ce que m'avez escript en faveur du conseiller du Peyrat1 touchant l'office de president en la petite chambre des Enquêtes de ma court de parlement de Paris. Et pour ce que auparavant la reception de votred. lettre j'avoys conclud et arresté de ne pourveoir audict office jusques à mon retour par dela, entendez, Mons^r le Chancellier, que je demeure encores en ceste mesme opinion, mays à mon arrivee là où vous serez, j'adviseray de pourveoir aud. office. Et jusques là, je ne suis point deliberé d'y toucher.

Priant Dieu, Mons^r le Chancellier, qu'il vous ait en sa saincte et digne garde.

Escript à Suzanne le xii^e jour de novembre mil v^c xxxvii.

Françoys.

Breton.

Mess^rs,

[1.] Mon cousin le s^r Jehan Paule de Cere, chevalier de mon ordre, m'a faict entendre que combien que de tout temps et antienneté il y aict en la ville de Ponthoyse dont il usuffructuaire1 troys jours de marché la sepmaine, c'est assavoir au mardi, jeudi et sabmedi où se vendent et distribuent respectivement diverses marchandises et danrees, toutesfoiz au moys de septembre derrenier, mon procureur en la court des generaulx sur le faict de mes aides a faict faire commandement aux habitans dud. Ponthoise qu'ilz eussent à justiffier de leurs tiltres et lectres de chartres touchant l'institution et establissement desd. marchez, ce qu'ils ne pourroient faire pour les causes contenues et declarees en la requeste que led. s^r Jehan Paule et lesd. habitans vous ont faict presenter ces jours passez, voulant icelluy procureur par ce moyen les troubler et empescher en leur immemorialle possession et joyssance desd. marchez au très grant interest, prejudice et dommaige d'icelluy s^r Jehan Paule, sur laquelle requeste vous les avez renvoyez par devant lesd. generaulx de la justice.

[2.] Et d'aultant que je ne vouldroys souffryr ne permectre que pendant et durant l'absence d'icelluy s^r Jehan Paule qui de present est occupé en mon service comme vous sçavez, il luy fust faict chose prejudiciable ne dommageable, mesmement en cest endroict, à ceste cause, sans les remectre en longueur, sollicitation ne invollution de proces, je vous prye et ordonne de luy faire et pourveoir sur le contenu en lad. requeste de la meilleure et plus prompte expedition de justice que faire ce pourra, de sorte que les supplians puissent demourer en leurd. possession et joyssance d'iceulx troys marchez selon et ainsi qu'ilz se trouverront avoir esté paisiblement et d'ancienneté, sans ce que plus en cela ilz soient aucunement troublez ne empeschez à faulte de la justiffication de leursd. tiltres. Et vous me ferez service très agreable.

Pryant Dieu, Mess^rs, qu'il vous ait en sa saincte et digne garde.

Escript à Carignan le xviii^e jour de novembre mil v^c xxxvii.

Françoys.

Breton.

Mess^rs,

[1.] L'ambassadeur de Portugal estant de present à Lyon m'a fait advertir que par les lectres qu'il a eues dernierement du roy son maistre, il luy fait savoir entre autres choses la continuacion des maulx, inhumanitez et pilleryes qui se font journellement par mes subgectz sur les syens, chose dont led. roy est en une merveilleuse peine et ne peult entendre la cause pourquoy il ne se y donne de ce cousté autre provision, actendu la bonne amytié et alliance qui est entre luy et moy.

[2.] Et m'a fait dire davantaige iceluy ambassadeur que combien que toutes les lectres de provisions et mandemens patens qui luy ont par cy devant esté depeschees pour le fait des prinses et depredacions1 ayent esté levees et publiees par touz mes portz où il a esté besoing, neantmoings les juges et officiers de la Marine n'en ont fait ne font aucun compte. Et n'a jamays sceu faire rendre ne restituer pour quelque poursuicte qu'il ayt faicte ne fait faire ne pour mandement qu'il ayt sceu obtenir de moy ung seul denier desd. prinses ne n'a jamays esté faicte pugnicion aucuns de ceulx qui ont prins les quatre albatoz2 du roy son maistre, qui sont toutes choses dont il me desplaist très fort car vous sçavez, Mess^rs, combien de foiz j'ay commandé qu'il fust pourveu à toutes les choses dessusd. en façon que led. roy de Portugal ne sesd. subgectz n'eussent plus cause d'eulx plaindre.

[3.] Et puis que ainsi est que les officiers de lad. Maryne ne veullent faire autrement leur devoir en l'affaire dont il est question, je veulx et vous ordonne que vous ayez incontinant à faire expedier une declaration telle que vous verrez estre requise et necessaire par laquelle il leur sera doresennavant deffendu la congnoissance des choses qui toucheront e fait de lad. Maryne sans ce qu'ilz s'en puissent par cy aprés mesler ne entremectre en quelque façon ou maniere que ce soit jusques à ce que par moy autrement en soit ordonné, laquelle congnoissance je veulx et entends estre baillee à3 mes juges et officiers ordinaires des lieux où besoing sera, ausquelz vous manderez et enjoindrez qu'ilz ayent à faire eur vray et loyal devoir et à administrer prompte et briefve justice ès matieres qui s'offriront doresennavant devant eulx touchans et concernans le fait de lad. Maryne, en sorte que par cy aprés je n'en puisse plus avoir aucune plaincte ne doleance. Et ne faillez de m'advertir de l'ordre et provision que vous aurez donnee à ce que dessus. Et vous me ferez très grant plaisir.

Priant Dieu, Mess^rs, qu'il vous ayt en sa saincte et digne garde.

Escript à Carignan le xviii^me jour de novembre v^c xxxvii.

Françoys.

Breton.

Mess^rs,

[1.] L'ambassadeur du roy de Portugal m'a faict entendre que journellement plusieurs de mes subgectz de Normendye et Bretaigne prennent et admenent navires et biens des Portugaiz esd. pays, esquelz navires ne se treuvent à leur arrivee aucuns maistres ne gens estans de la prinse ne semblablement les chartes parties ainsi qu'il est requis par les enciennes ordonnances. Mais affin que leursd. prinses et depredations soient ocultes et ne viennent en lumiere en justice et que aucun n'en puisse demander restitution, ilz tuent et gectent en mer tous ceulx qui se treuvent dedans icell. navires, qui est chose par trop inhumaine et que je ne vouldroix pour riens passer soubz dissimulation sans estre corrigee et reprimeee pour le devoir de l'amytié, confederation et alliance d'entre led. roy de Portugal et moy.

[2.] À ceste cause je vous ay bien voulu escripre la presente, vous priant que incontinant vous advisez et regardez de bailler et delivrer en ces endroict aud. ambassadeur toutes les provisions requises et necessaires pour faire cesser lesd. inhumanitez, de sorte que par cy aprés il ne m'en vienne plus aucune plaincte. Et vous me ferez service très agréable.

Priant Dieu, Mess^rs, qu'il vous ayt en sa saincte garde.

Escript à Carignan le xix^me jour de novembre mil v^c xxxvii.

Françoys.

Breton.

Mons^r le Chancelier,

[1.] J'ay faict expedier à l'evesque de Riez mes lectres patentes touchant l'economat et commission au regime, gouvernement et administracion des abbayes d'Estafarde et de Sainct Constans dont est abbé Jehan Loys de Saluces, estant de present retiré avec mes ennemys et adversaires, lesquelles lectres je vous prye et ordonne, Mons^r le Chancelier, voulloir incontinent seeller et delivrer aud. evesque ou à son homme qu'il envoyera devers vous sans y faire aucune faulte ne difficulté car les services que icelluy evesque et les siens m'ont par ci devant faitz et mesmement en ce derrenier voyage font et continuent chacun jour et sont pour me faire en l'advenir meritent bien ce que dessus et plus grant chose.

Priant Dieu, Mons^r le Chancelier, qu'il vous aict en sa saincte garde.

Escript à Carignan le xxi^me jour de novembre mil v^c xxxvii.

Françoys.

Breton.

Mons^r le Chancelier,

[1.] J'ay permis au s^r de Likerkes, nagueres ambassadeur devers moy de la part de l'empereur, qu'il puisse faire tirer de nostre royaume pour la provision de ses maisons en Flandres le nombre de cent muyz de vin et luy en ay faict expedier mes lectres, lesquelles je vous envoye avecques une rescription signee de ma main à vous addressant pour les seeller, ce que je vous prie faire incontinant et aprés les envoyer par la poste au s^r de La Rochepot en Picardye avecques la lectre que je luy escriptz affin qu'il puisse faire tenir lesd. lectres de traicte audict s^r de Likerkes pour s'en aider. Et en ce faisant vous me ferez service.

Priant Dieu, Mons^r le Chancellier, qu'il vous ayt en sa saincte et digne garde.

Escript à Carignan le xxiii^me jour de novembre mil v^c xxxvii.

Françoys.

Breton.

Mons^r le Chancellier,

[1.] J'ay accordé au s^r de Liedekerkes par cy devant ambassadeur de l'empereur devers moy qu'il puisse tirer et enlever de telz lieux et endroictz de mon royaume que bon luy semblera le nombre de cent muidz de vin pour la provision et despence de ses maisons qui sont en Flandres sans pour ce paier l'escu de nouvelle imposition pour muyd. À ceste cause et que led. s^r de Liedekerkes est personnaige à qui j'ay bien voulu complaire en cest endroict, je vous prye et ordonne ne faire difficulté de luy faire seeller les lectres qui luy en ont esté expediees, lesquelles pour cest effect je vous envoye. En quoy faisant vous me ferez service très agreable.

Priant Dieu, Mons^r le Chancellier, qu'il vous ayt en sa saincte garde.

Escript à Carignan le xxiii^me jour de novembre mil v^c xxxvii.

Françoys.

Breton.

Mons^r le Chancellier,

[1.] Je vous envoye une lectre de sauf conduict pour servir à ceulx que Cauves et Granvelle vouldront depescher pour le faict de la paix, laquelle lectre vous seellerez incontinant et en ferez ung pacquect que vous envoyerez à Nerbonne à mes cousins les cardinal de Lorraine et le grant maistre affin qu'ilz en puissent trouver là à leur arrivee.

[2.] Et là où le courrier que vous depescherez pour cest effect ne les trouveroit, advertissez le bien qu'il baille led. pacquect au seneschal de Thoulouze pour le garder à mesdictz cousins jusques à ce qu'ilz soient là, car entendez qu'il est besoing qu'ilz aient ladicte lectre à part, oultre le contenu en leur povoir.

Priant Dieu, Mons^r le Chancellier, qu'il vous ayt en sa saincte garde.

Escript à Briançon le iii^me jour de decembre mil 1537.

Françoys.

Breton.

Mess^rs,

[1.] J'ay veu et très bien entendu ce que m'avez escript par voz lectres du xxi^me du moys passé touchant l'evesque de Pamyers.

[2.] Et pour responce, j'ay trouvé et trouve bon pour les causes et raisons plus à plain contenues en vosd. lectres que led. evesque soit envoyé soubz bonne et seure garde en ma ville de Montaulban et que là maistre Pierre de La Garde, s^r de Saignes, conseiller en ma court de parlement de Thoulouse, lequel a faict les informations à l'encontre d'icelluy evesque, face et parface son proces jusques à sentence diffinitive exclusivement, appellé avec luy le juge dud. Montaulban ou autre personne callifyee non suspecte ne favorable pour, aprés led. proces instruict, faict et parfaict, estre rapporté en mon conseil privé et diffiny par ceulx que je commectray cy aprés.

[3.] Je treuve bon aussi que vous, Mon Cousin le Cardinal de Tournon, adressiez commission à quelque bon personnaige qui, en lad. ville de Montaulban, face le proces aud. evesque pour le delict commung, affin d'eviter aux fraiz, longueur et perte de temps.

Et sur ce, Mess^rs, je prye à Dieu qu'il vous ait en sa saincte garde.

À Guillestre le iiii^me jour de decembre mil v^c xxxvii.

Françoys.

[Breton]1.

Mons^r le Chancellier,

[1.] Le gentilhomme present porteur est venu devers moy et m'a apporté ung dictum d'arrest donné en ma court de parlement de Thoulouse que je vous envoye par lequel vous verrez comme lad. court, aprés avoir mis hors les conseillers d'icelle recusez par les parties nommees oud. dictum, s'est trouvee partie au jugement du proces dont est question et a ordonné que lesd. parties se retireroyent par devers moy pour leur estre sur ce pourveu.

[2.] Et pour ce, Mons^r le Chancellier, que je desire singulierement bonne et briefve justice estre faicte et administree à mes subgectz, à ceste cause je vous prye adviser de leur faire pourveoir de juges non suspectz ne favorables à l'une ne à l'aultre desd. parties ou bien, si voyez que bon soit, renvoyez led. proces en l'une de mes autres plus prochaines courtz pour y estre jugé diffinitivement, leur faisant sur ce expedier toutes les provisions qui y seront necessaires.

[3.] Et d'autant, Mons^r le Chancellier, que j'ay entendu que l'une desd. parties a, depuis led. arrest donné, obtenu quelque provision pour faire juger icelluy proces par ung nombre de conseillers dud. parlement de Thoulouse où par adventure elle pourroit avoir quelque faveur au prejudice de l'autre partie, aussi que ce seroit contrevenir à la teneur dud. arrest, je veulx toutesfoiz que nonobstant lad. provision, vous ne differez à faire tirer led. proces hors de lad. court et le faire vuyder ailleurs affin que, sans aucune faveur ne suspecion de juges, il soit jugé diffinitivement et le droict de chacune desd. parties esgallement gardé en justice ainsy qu'il appartient.

Priant Dieu, Mons^r le Chancellier, qu'il vous ayt en sa garde.

Escript à Ambrun le v^me jour de decembre l'an mil 1537.

Françoys.

Bochetel.

Mess^rs,

[1.] J'envoye presentement devers vous Pescheray, porteur de cestes, pour les causes et raisons que par luy entendrez, vous priant le croyre et pourveoir promptement à ce qu'il vous dira et exposera de ma part, ainsi que vous verrez et entendrez que mon affaire le requiert. Et vous me ferez service très agréable.

Priant Dieu, Mess^rs, qu'il vous ayt en sa saincte et digne garde.

Escript à Monosques en Provence le ix^me jour de decembre mil v^c xxxvii.

Françoys.

Breton.

Mons^r le Chancellier,

[1.] J'e panse que de ceste heure vous aurez entendu ce que ce sera monté le derrenier paiement qui a esté faict à Gap pour le present moys de decembre aux bandes de lansquenetz du conte Guillaume.

[2.] Et neantmoings je n'ay voulu laisser pour cela de vous envoier le double de l'estat du nombre des hommes qui y ont esté passez affin qu'en entendiez le contenu et combien il y en a moings que à la monstre preceddente.

[3.] Je m'attendz, Mons^r le Chancellier, suivant ce que le general de Normandie m'a dict, que avez donné ordre d'envoier au lieu où seront lesd. bandes l'argent qu'il fault pour leur paiement du prochain moys de janvier et qu'il y sera de si bonnes heures suivant ce qui a esté arresté que par faulte de cela, je ne seray contrainct d'entrer en nouvelle despence ne paier pour ung autre mois les bandes que j'ay ordonné estre cassees à la prochaine monstre, vous avisant, Mons^r le Chancellier, que encores qu'il eust par cy devant esté arresté entre mon cousin le grant maistre et led. conte que à la monstre qui s'est dernierement faicte aud. Gapt, l'on casseroit de ceste heure là trois bandes des quatres venues du duc de Wirtemberg, neantmoings led. conte me faict maintenant la plus grande instance du monde de les faire paier encores pour le moys de janvier, disans n'avoir jamais entendu que led. cassement se feist plus tost que du reste des xiii enseignes qui doivent estre cassees à la monstre qui se fera pour led. janvier, tant y a que j'ay escript bien amplement de cest affaire à mond. cousin le grant maistre et selon la responce qu'il me fera là dessus, il se fauldra conduire et gouverner.

Priant Dieu, Mons^r le Chancellier, qu'il vous ayt en sa saincte et digne garde.

Escript à la commanderye de Sainct Gilles le xviii^me jour de decembre mil v^c xxxvii.

Françoys.

Breton.