François I^er à Antoine Du Bourg

[adresse au dos] À mons^r le chancelier.

Mons^r le Chancellier,

[1.] Pour ce que j'ay deliberé et advisé de faire venir par deça les douze pieces d'artillerie qui sont à Lyon ja chargees es bateaulx et avecques icelles six cens boulletz à double canon1, cinq cens à canon serpentin2, autres cinq cens a grande coullevryne3 et huict cens à coullevrine bastarde4, douze milliers pouldres5 avecques leurs municions et suitte pour m'en servir ou et ainsi que je verray qu'il sera besoing, à ceste cause, Mons^r le Chancellier, je vous prie que incontinant la presente receue vous mandez le cappitaine Salla6 et Jehan Girard, commis du contrerolleur general de mon artillerye, ausquelz vous ordonnerez et commanderez de par moy que promptement ilz facent partir les pieces et municions susd. dudict Lyon et les faire conduire devers moy en ceste ville de Vallence par le commis du tresorier garde de mon artillerie ou autre qu'ilz adviseront, auquel je feray entendre à son arrivee ce qu'il aura à faire.

[2.] Et de ce qu'il commendra pour les voictures et autres fraiz pour mener les choses susd. jusques en mon camp s'il est besoing, vous pourvoirez qu'il soit promptement fourny selon les marchez qui en ont esté faictz avecques ceulx de mon artillerie à ce que riens ne demeure à faulte de paiement.

[3.] Aussi commanderez au tresorier de l'extraordinaire de mad. artillerye que aprés avoir fourny ausd. fraiz, il s'en vienne en mond. camp pour faire ce qu'il luy sera ordonné et vous me ferez service tres agreable.

Priant Dieu, Mons^r le Chancellier, qu'il vous aye en sa saincte garde.

Escript à Vallence le iii^me jour de septembre mil v^c xxxvi.

Françoys.

J. Breton.