François I^er à Antoine Du Bourg

1537, 30 avril. — Camp de Pernes

1. Ordre de remettre 1 500 écus à Philippe Le Tirant pour acheter de la vaisselle de Vermeil comme cadeau pour Rodolfo Pio di Carpi qui quitte la France et qu'il remette la vaisselle à Nicolas de Neufville que Du Bourg devra avertir de tout cela et à qui il remettra la lettre que le roi lui adresse. 2. Approbation des dispositions prises par Du Bourg concernant Boisrigault et les Suisses. 3. Approbation du mémoire concernant la lettre du secrétaire du duc de Gueldre et ordre de lui remettre 200 écus pour son voyage. 4. Ordre de proposer au cardinal de Carpi les postes royales pour l'éventuelle expédition d'un paquet à Lyon.

Orig. signé et contresigné, jadis scellé d'un cachet de cire rouge au verso. Arch. nat., J 965, dossier 6, pièce n° 22, 19,5 cm x 26,6 cm, papier, 1 page.

[adresse au dos] À Mons^r le Chancellier.

Mons^r le Chancelier,

[1.] Pour autant que Mons^r le cardinal de Carpy a prins congié de moy pour se retirer a Romme et que je desire qu’il luy soit fait ung present de vaisselle jusques a la valleur de quinze cens escus, à ceste cause je vous prie que incontinant vous escripviez à Paris soit au viconte Le Tirant ou autre que adviserez, à ce qu’il achapte de lad. vaisselle vermeille doree ou autre de belle façon, jusques à la somme dessusd., et qu’il la mecte es mains du s^r de Villeroy auquel, suyvant ce que je luy escriptz ainsi que verrez, arrivé que soit led. cardinal aud. Paris, il la luy presentera de ma part. Et advertissez led. s^r de Villeroy de l’ordre que vous aurez donnee quant à ce point et luy faictes tenir la lettre a luy adressant. Et vous me ferez plaisir.

Priant Dieu, Mons^r le Chancelier, qu’il vous ayt en sa saincte et digne garde.

Escript au camp de Pernes le dernier jour d’avril mil v^c xxxvii.

Françoys.

Breton.

[post-scriptum dans une écriture d'un module plus petit]

Mons^r le Chancellier,

[2] J’ay veu les lettres que vous m’avez escriptes par ce porteur et entendu par icelles l’ordre qu’avez donné, tant sur ce que je vous avoys escript touchant Boisrigault, le paiement des Suisses que autres poincts mentionnez en vosd. lettres dont j’ay esté tres aise.

[3] J’ay semblablement veu le memoyre par vous dressé pour la depesche du secretaire du duc de Gueldres, lequel j’ay trouvé tres bon et me semble que vous n’y avez rien obmys. Je vous renvoye ledict memoire et pareillement toutes les autres pieces que vous m’avez envoyees, vous priant depescher incontinant led. secretaire et luy faire bailler deux cens escuz pour faire son voiage.

[4] Et au reste, si le cardinal de Carpy vous faict bailler ung pacquet pour Lyon, donnez ordre de le faire courir audict Lyon par mes postes. Et vous me ferez plaisir.

[note dorsale d'une écriture contemporaine] Lettres du roy pour le faict du present de monsr le cardinal de Carpy.