François Ier à Antoine Du Bourg
. — Valence
1. Envoi d'une nouvelle version d'un pouvoir à sceller et transmettre au cardinal Du Bellay. 2. Accusé de réception des remarques du chancelier sur un mémoire envoyé de Paris pour aider à trouver de l’argent.
- Orig. jadis scellé d’un cachet de cire rouge au verso. Arch. nat., J 965, dossier 5, pièce n° 24, 20,5 cm x 28,2 cm, papier, 1 page.
Monsr le Chancellier,
[1.] J'ay veu par ce que m'avez fait savoir du dernier du moys passé comme avez envoyé au cardinal Du Bellay le povoir que vous avoys adressé aprés y avoir adjousté quelzques mots necessaires. Je vous envoye presentement celuy qui a esté reffaict, qui n'est que une mesme chose sinon qu'il n'y a point de ratures, affin que vous le seellez pour incontinant aprés l'envoyer aud. cardinal, auquel vous pourrez escripre ung mot pour ce que je ne luy escriptz riens de cest affaire.
[2.] Au demourant, j'ay veu la responce que vous me faictes sur le memoire contenant aucuns moyens pour promptement recouvrer deniers qui m'avoit esté envoyé de Paris, lequel je vous avoys fait tenir, a quoy je ne veoy point qu'il soit besoing que je vous face autre repplicque, estant tout asseuré que vous ne fauldrez en tout et par tout de chercher tous les moyens raisonnables que vous pourrez pour recouvrer deniers pour subvenir à mon affaire, lequel est de l'importance que vous savez, qui est tout ce que je vous diray pour ceste heure, sinon que je prie a Dieu, Monsr le Chancelier, qu'il vous aye en sa tres saincte et digne garde.
Escript à Vallence, le iiie jour de septembre mil vc xxxvi.
