François Ier à Antoine Du Bourg
. — Hesdin
1. Rappel de l’envoi de la lettre précédente et transmission du double d’une lettre de Tournon à Montmorency relative également aux besoins d’argent de Humières en Piémont. 2. Ordre à Du Bourg, s’il ne l’a fait, d’envoyer de l’argent à Tournon. 3. Prochaine réponse du roi à Tournon dont Du Bourg aura le double.
- Orig. signé et contresigné, scellé d'un cachet de cire rouge sous papier partiellement conservé au verso. Arch. nat., J 965, dossier 6, pièce n° 2, 19,5 cm x 27,5 cm, papier, 1 page.
Monsr le Chancelier,
[1.] Je vous ay dernierement envoyé tout ce qu'il m’est venu du cardinal de Tournon, et par cela aurez entendu de combien il est requis et necessaire de pourveoir à luy envoyer promptement argent pour satisfaire entierement à l'estat qui a esté dressé pour le sr de Humyeres, qui ne vouldra veoir dedans peu de jours tout mon affaire de Piedmont tumber en manifeste ruyne. Et depuis j'ay receu une autre lectre dudict cardinal, le double de laquelle je vous envoye avecques celle qu'il a escripte à mon cousin le grant maistre. Et par la vous congnoistrez encore de plus en plus qu'il est requis de luy envoyer promptement deniers en toute dilligence pour ne tomber en l’inconvenient que dessus.
[2.] Par quoy je vous prie, Monsr le Chancelier, veoir bien le contenu esd. lectres et le plus dilligemment que faire ce pourra envoier argent audict cardinal sy desja faict ne l'avez. Car entendez que estant les choses comme elles sont du costé dud. Piedmont, vous ne me sçauriez faire service plus agreable, vous priant ne faillir de m'advertyr incontinent de l'ordre et provision que vous aurez donnee en cest endroit, car vous sçavez de combien cela importe.
[3.] Je feray ce jourd'uy dresser la response que j’entends estre faicte audict cardinal, de laquelle je vous envoyeray le double affin que en entendiez le contenu. Et ce pendant, pour ne perdre temps à ce que vous puissiez tousjours pourveoir en son affaire, je vous ay bien voullu faire ceste depesche.
Priant Dieu, Monsr le Chancelier, qui vous aict en sa saincte garde.
Escript au camp pres Hedin, le xxiiie jour de mars mil vc xxxvi.
