François Ier à Antoine Du Bourg
. — Commanderie de Saint-Gilles
1. Dernier paiement fait à Gap aux lansquenets de Guillaume de Fürstenberg. 2. Envoi du double de l’état de ces troupes. 3. Ordre de se conformer à ce que Montmorency décidera sur l’éventuelle cassation de ces troupes lors de la prochaine montre.
- Orig. signé et contresigné. Arch. nat., J 965, dossier 6, pièce n° 66, 21,6 cm x 31,2 cm, papier, 1 page.
Monsr le Chancellier,
[1.] J'e panse que de ceste heure vous aurez entendu ce que ce sera monté le derrenier paiement qui a esté faict à Gap pour le present moys de decembre aux bandes de lansquenetz du conte Guillaume.
[2.] Et neantmoings je n'ay voulu laisser pour cela de vous envoier le double de l'estat du nombre des hommes qui y ont esté passez affin qu'en entendiez le contenu et combien il y en a moings que à la monstre preceddente.
[3.] Je m'attendz, Monsr le Chancellier, suivant ce que le general de Normandie m'a dict, que avez donné ordre d'envoier au lieu où seront lesd. bandes l'argent qu'il fault pour leur paiement du prochain moys de janvier et qu'il y sera de si bonnes heures suivant ce qui a esté arresté que par faulte de cela, je ne seray contrainct d'entrer en nouvelle despence ne paier pour ung autre mois les bandes que j'ay ordonné estre cassees à la prochaine monstre, vous avisant, Monsr le Chancellier, que encores qu'il eust par cy devant esté arresté entre mon cousin le grant maistre et led. conte que à la monstre qui s'est dernierement faicte aud. Gapt, l'on casseroit de ceste heure là trois bandes des quatres venues du duc de Wirtemberg, neantmoings led. conte me faict maintenant la plus grande instance du monde de les faire paier encores pour le moys de janvier, disans n'avoir jamais entendu que led. cassement se feist plus tost que du reste des xiii enseignes qui doivent estre cassees à la monstre qui se fera pour led. janvier, tant y a que j'ay escript bien amplement de cest affaire à mond. cousin le grant maistre et selon la responce qu'il me fera là dessus, il se fauldra conduire et gouverner.
Priant Dieu, Monsr le Chancellier, qu'il vous ayt en sa saincte et digne garde.
Escript à la commanderye de Sainct Gilles le xviiime jour de decembre mil vc xxxvii.
