François I^er à Antoine du Bourg

[adresse au dos] À mons^r le chancellier.

Mons^r le Chancellier,

[1.] J’accorday dés le premier jour du mois passé moy estant à Lyon à mon beau frere le roy de Navarre l’office de greffier civil de ma court de parlement de Thoulouze que tenoit lors feu m^e Jehan Boorassol, ou cas que le led. Boorassol allast de vie a trespas de la malladie en laquelle il estoit detenu et ce pour et en recompense de la pension de mond. beau frere montant douze mil livres tournois pour demy annee commancee le premier jour d’avril dernier passé et qui finira le dernier jour de septembre prochain venant. Et depuis, icelluy Boorassol est allé de vie à trespas au moyen de quoy mond. beau frere m’a escript et envoyé devers moy, me suppliant vouloir faire expedier ledict office en faveur d’un nommé m^e Jehan Burnet1 avecques quelque dispance qui luy est necessaire pour l’exercice d’icelluy office, ce que je luy ay liberallement accordé soubz la condicion dessusd., par quoy je vous prie, Mons^r le Chancellier, ne faire difficulté de sceller les lettres dont cy dessus est faicte mention. Et vous me ferez plaisir.

Priant Dieu, Mons^r le Chancellier, qu’il vous ayt en sa saincte et digne garde.

Escript à Vallence le ix^me jour d’aoust mil v^c xxxvi.

Françoys.

J. Breton.

[note dorsale, d’une écriture contemporaine] Le roy pour l’offre de greffier civil de la court de parlement de Thoulouse.