François Ier à Antoine Du Bourg
. — Valence
1. Procédures contre les diocèses bretons qui refusent de payer les trois décimes.
- Orig. jadis scellé d’un cachet de cire rouge au verso. Arch. nat., J 965, dossier 5, pièce n° 25, 20,9 cm x 28,9 cm, papier, 1 page.
Monsr le Chancellier,
[1.] J’ay receu votre lettre du troysiesme de ce moys et entendu ce que me faictes savoir touchant la procedure faicte par me Nicolle Corbin contenant les offres que aucuns dioceses de mon pays de Bretaigne ont fait de payer à la raison de troys decymes et des autres qui ont chargé leurs offres des condicions plus à plain contenues en vosd. lettres. Et pour vous respondre à cela, j’ay trouvé et trouve tres bonne la provision par vous dressee contre les reffusans et la vous renvoye toute expedyee pour la seeller et aprés la faire mectre à execution, vous advisant, Monsr le Chancelier, que je trouve aussi tres à propoz que l’on face pareille depesche pour les dioceses de mon royaume qui n’ont encores acordé led. octroy, par quoy vous en pourriez faire dresser les expedicions par dela le plus dilligemment que faire ce pourra et vous me ferez plaisir.
Priant Dieu, Monsr le Chancelier, qu’il vous ayt en saincte et digne garde.
Escript à Vallence le vme jour de septembre mil vc xxxvi.
