François Ier à Antoine Du Bourg
. — Valence
1. Arrestation de quatre pilotes des navires du roi en Normandie. 2. Ordre de faire élargir les pilotes prisonniers par tous documents et moyens légaux possibles.
- Orig. Arch. nat, J 965, dossier 5, pièce n° 21, 21 cm x 29,2 cm, papier, 1 page.
Monsr le Chancelier,
[1.] J’ay esté adverty que Droyn Chaulieu, Jehan Bon, Jehan Boursier et Jacques Pignot, maistres pillottes de mes navires de Normandye sont pieça prisonniers en ma ville de Rennes pour raison de certaine prinse faicte par Bonneboz, cappitaine de ma gallere nommee L’Arbalestiere, d’une navire chargee de bled qui se menoit hors Bretaigne, laquelle prinse ainsi que j’ay entendu ne se trouve pas bonne ne juste. Au moyen de quoy l’on veult procedder par veoye de rigueur et justice à l’encontre desd. prisonniers, lesquelz pour la grande et singulliere experiance qu’ilz ont au fait de la mer je ne vouldroys perdre, estant asseuré qui seront pour me fere service de brief ainsi que j’ay deliberé.
[2.] À ceste cause, Monsieur le Chancellier, je vous prye et neantmoins ordonne que incontinant vous aiez a regarder et adviser de pourveoir à leur affaire soit de leur expedier remission, pardon ou autre lectre et provision de justice qu’ilz auront besoing pour leur elargissement, liberté et delivrance en satisfaisant les parties interessees, s’aucunes en y a, et faire ce doit.
Priant Dieu, Monsr le Chancellier, qu’il vous ait en sa saincte garde.
Escript à Valence le deuxiesme jour de septembre mil vc xxxvi.
