François Ier à Antoine Du Bourg et François de Tournon
. — Guillestre
1. Réception des lettres de Du Bourg du 21 novembre 1537 relatives à l’évêque de Pamiers. 2. Ordre à Pierre de La Garde, conseiller au parlement de Toulouse, de faire son procès avant de le transmettre au Conseil privé. 3. Ordre au cardinal François de Tournon de donner commission pour faire son procès pour le délit commun à Montauban.
- Orig. signé, jadis scellé d'un cachet de cire rouge sous papier. Arch. nat., J 965, dossier 6, pièce n° 63, 21,5 cm x 23,5 cm, papier, 1 page, à laquelle il manque sans doute un quart inférieur.
Messrs,
[1.] J'ay veu et très bien entendu ce que m'avez escript par voz lectres du xxime du moys passé touchant l'evesque de Pamyers.
[2.] Et pour responce, j'ay trouvé et trouve bon pour les causes et raisons plus à plain contenues en vosd. lectres que led. evesque soit envoyé soubz bonne et seure garde en ma ville de Montaulban et que là maistre Pierre de La Garde, sr de Saignes, conseiller en ma court de parlement de Thoulouse, lequel a faict les informations à l'encontre d'icelluy evesque, face et parface son proces jusques à sentence diffinitive exclusivement, appellé avec luy le juge dud. Montaulban ou autre personne callifyee non suspecte ne favorable pour, aprés led. proces instruict, faict et parfaict, estre rapporté en mon conseil privé et diffiny par ceulx que je commectray cy aprés.
[3.] Je treuve bon aussi que vous, Mon Cousin le Cardinal de Tournon, adressiez commission à quelque bon personnaige qui, en lad. ville de Montaulban, face le proces aud. evesque pour le delict commung, affin d'eviter aux fraiz, longueur et perte de temps.
Et sur ce, Messrs, je prye à Dieu qu'il vous ait en sa saincte garde.
À Guillestre le iiiime jour de decembre mil vc xxxvii.
