François Ier à François de Tournon et Antoine Du Bourg
. — Camp près d'Avignon
1. Arrivée à Avignon des 100 000 livres annoncées par les lettres de Tournon et Du Bourg du 15 septembre à destination de différentes troupes au service du roi. 2. Voyage du roi à Marseille et Arles avant son retour à Lyon où Tournon et Du Bourg doivent envoyer de l’argent pour le paiement de la gendarmerie.
- Orig. scellé d’un cachet de cire rouge au verso. Arch. nat., J 965, dossier 5, pièce n° 27, 22,5 cm x 29,3 cm, papier, 1 page.
Messrs,
[1.] J’ay receu voz lettres du quinziesme de ce moys et entendu les premiers cent mil livres dont elles font mencion estre ce jourd’huy arrivez en Avignon qui sont venuz bien à propoz pour satisfaire à partie de la soulde de mes gens de pied estans en ce camp dont j’ay cassé un bon nombre mesmes ceulx que j’ay estimez ne me povoir quant à present faire grant service et le surplus retenu principallement les Suisses, lansquenetz et quelques bandes de Françoys et Ytalliens pour m’en ayder au surplus de la parfection de mon entreprinse, lesquelz avant qu’ilz puissent desloger de ce lieu est besoing de payer ce qui sera des autres cm £ que faictes me sçavoir par vosd. lettres envoyer par deça et lesquelz actendz y estre dedans deux jours.
[2.] Ce pendant yray faire ung voiaige jusques à Marseille passant par Arles pour veoir les fortifficacions qui y ont esté faictes. Et ne sera mon voiaige long sans promptement retourner à Lyon ou j’ay advisé de faire payer ma gendarmerye du quartier d’avril derrenier, par quoy vous prie mectre ordre de y faire assembler la meilleure somme que faire se pourra. Et vous me ferez bien grant plaisir.
Et à Dieu, Messrs, qu’il vous ait en sa garde.
Escript au camp lez Avignon le xviime jour de septembre.
