« Petrus1, Dei gracia, Senonensis archiepiscopus, omnibus ad quos presentes littere pervenerint, salutem in vero salutari. Ad omnium volumus noticiam pervenire quod cum, auctoritate apostolice indulgentie, ad nos et decanum Senonensem, pro Katerina, nobili comitissa Blesensi, directe ita quod nos exequeremur si decanus interesse non posset, inter dictam comitissam, ex una parte, et venerabilem fratrem nostrum episcopum et dilectos filios Capitulum Carnotense, ex altera, coram nobis controversia verteretur super quadam sentencia contra prepositum Carnotensem ipsius comitisse a judiciis ordinariis, scilicet decano et subdecano Carnotensibus, lata, de emendatione facienda, pro detentione Morelli, clerici chori Carnotensis, et cujusdam servientis Drocensis archidiaconi, et super sentencia interdicti propter hoc prius per dictos judices prolata in civitatem et banleugam Carnotensem, et postmodum per episcopum Carnotensem in archidiaconatibus Blesensi et Dunensi, nos, super hiis omnibus inquisita diligentius veritate, habito magnorum jurisperitorum consilio, decano Senonensi collega nostro per suas litteras legittime excusato, parte comitisse contumaciter absente, predictas sentencias judicavimus nullatenus irritandas, sed firmas manere et usque ad emendationem congruam inviolabiliter observandas. Datum Senonis, anno Domini MºCCºIXº, pridie nonas februarii. »